རྒྱལ་གཅེས་པ་ཚེ་རིང་བག་གྲོ་ལགས་ནི་ལྷ་ས་གྲོང་ཁྱེར་མལ་གྲོང་གུང་དཀར་རྒྱ་མ་ཤང་ནས་ཡིིན་པ་དང། ཆུང་དུས་ནས་ལྷ་སའི་ཤར་ཕྱོགས་དགའ་ལྡན་དགོན་དུ་ཆོས་བཞུགས་ཀྱིས་ནང་བསྟན་གཞུང་ལུགས་ལ་ཐོས་བསམ་སློབ་གཉེར་གནང་མགོ་ཚུགས།་་ཡིན་ནའང་། ལོ་རབས་དགུ་བཅུ་པའི་ནང་རྒྱ་ནག་གཞུང་གིས་བོད་ནང་རྒྱལ་གཅེས་ཆོས་གཅེས་དང་སྤྱི་ཚོགས་རིང་ལུགས་ཀྱི་བསམ་བློའི་སློབ་གསོ་ཟེར་བའི་ཆབ་སྲིད་ཀྱི་ལས་འགུལ་རྒྱ་ཆེ་ཞིག་སྤེལ་་བ་དང། བོད་ཀྱི་རིས་མེད་དགོན་སྡེ་ཁག་གི་ནང་༸གོང་ས་མཆོག་གི་སྐུ་པར་བཤམས་མི་ཆོག་པ་སོགས་ཀྱི་གནས་སྟངས་ཛ་དྲག་གི་འོག་ཁོང་དང་རོགས་པ་འགའ་ཤས་ཀྱིས་སྤྱི་ལོ་༡༩༩༢ ལོའི་ཟླ་ ༦ ཚེས་ ༡༠ ཉིན་བོད་ཀྱི་རྒྱལ་ས་ལྷ་སར་ཞི་བའི་ངོ་རྒོལ་ཀྱི་ལས་འགུལ་སྤེལ་ནས་ལག་ཏུ་བོད་ཀྱི་རྒྱལ་དར་འཕྱར་བཞིན།་བོད་རང་བཙན་ཡིན། རྒྱ་མི་བོད་ནས་ཕྱིར་འབུད་བྱེད་དགོས། བོད་ཀྱི་བདག་པོ་བོད་མི་ཡིན་ཞེས་ངོ་རྒོོལ་སྐད་འབོད་བྱས་པ་དང། ༸རྒྱལ་བ་བསྟན་འཛིན་རྒྱ་མཚོ་སྐུ་ཚེ་ཁྲི་ལོར་བརྟན་པ་ཤོག་ཅེས་ངོ་སྐད་འབོད་བྱས་པ་དང། དེ་མ་ཉིད་དུ་རྒྱ་ནག་གཞུང་གིས་སྤྱི་བདེ་ཉེན་རྟོག་པ་མངགས་གཏོང་གིས་འཇུ་བཟུང་བཙན་འཁྲིད་བྱས་ཏེ་ལམ་བར་ཉེས་རྡུང་སྣ་ཚོགས་གཏོང་བཞིན་ལྷ་སའི་དགུ་ཚ་བཙོན་ཁང་དུ་བཙོན་འཇུག་བཀག་ཉར་བྱས་པ་དང། བཙོན་ཁང་གི་འཁོར་ཡུག་དང་ཆ་རྐྱེན་ཧ་ཅང་ཞན་པོ་ཡིན་པའི་ཁར། ཁ་ལག་གི་ཟས་བཅུད་མི་འདང་བ་དང། རྟག་པར་ཞི་དྲག་གང་རུང་གི་རྣམ་པའི་ཐོག་ནས་དྲི་རྩད་བྱས་ཏེ་ལུས་སེམས་གཉིས་ལ་མནར་གཅོད་ཇི་འདྲ་ཕོག་པ་ནི་བོད་ཀྱི་ཆབ་སྲིད་བཙོན་པ་ཚོའི་མྱོང་བ་ལས་ཤེས་རྟོགས་ཐུབ། མཐར་ལྷ་ས་གྲོང་ ཁྱེར་འབྲིང་རིམ་མི་མང་ཁྲིམས་ཁང་ཟེར་བས་མི་ལོ་ ༨ ཀྱི་བཙོན་འཇུག་ཁྲིམས་ཐག་བཅད་པ་དང། ཆབ་སྲིད་ཀྱི་དབང་ཆ་ལོ་གཉིས་བཙན་འཕྲོགས་བྱས་ཏེ་སྤྱི་ལོ་ ༡༩༩༢ ལོའི་ཟླ་ ༡༡ ནང་ལྷ་སའི་གྲྭ་བཞི་བཙོན་ཁང་དུ་བཙོན་འཇུག་བྱས། སྤྱི་ལོ་ ༢༠༠༠ ལོའི་ཟླ་ ༦ ཚེས་ ༩ ཉིན་དུས་བཀག་བཙོན་འཇུག་གི་ལོ་དུས་རྫོགས་ནས་བཙོན་ནས་གློད་བཀྲོལ་བཏང་བ་དང། བཙོན་ཁང་ནས་གློད་བཀྲོལ་ཐོབ་ཡོད་ཀྱང། རྒྱ་གཞུང་གི་འབྲེལ་ཡོད་མི་སྣས་དུས་རྟག་ཏུ་བལྟ་སྲུང་འོག་གནས་དགོས་ཀྱི་ཡོད་པ་དང་། མཐར་སྤྱི་ལོ་ ༢༠༢༠ ལོའི་ཟླ་༤ ཚེས་ ༢༦ ཉིན་དགོངས་པ་རྫོགས་པའི་ཡིད་སྐྱོའི་གནས་ཚུལ་ཐོན་འདུག
