རྒྱ་ནག་གཞུང་གིས་བོད་ཀྱི་རིས་མེད་དགོན་སྡེ་ཁག་གི་ནང་རྒྱལ་གཅེས་ཆོས་གཅེས་ཟེར་བའི་སློབ་གསོའི་མིང་བྱང་འོག་དགོན་པའི་གྲྭ་བཙུན་རྣམས་ཆོས་ལུགས་སློབ་སྦྱོང་དང་ཉམས་ལེན་བྱས་ཏེ་བློ་བདེ་བག་ཕེབས་ངང་གནས་བཟོད་མི་ཐུབ་པར། རྟག་པར་རྒྱ་ནག་གཞུང་གི་དམར་ཤོག་གི་ལྟ་གྲུབ་དང། ཆབ་སྲིད། ཁྲིམས་ལུགས་སོགས་སློབ་སྦྱོང་དང་ཡིག་རྒྱུག་གཏོང་བ་དང། ཚད་གཞི་ལྟར་མ་ལོན་ཚེ་རྣམ་པ་འདྲ་མིན་གྱི་ཉེས་ཆད་གཅོད་པ་དང་ཐ་ན་བཙོན་འཇུག་བྱེད་པ་སོགས་ཀྱི་གནས་ཚུལ་རྟག་པར་ཐོན་གྱི་ཡོད། ཉེ་ལམ་གཞིས་རྩེ་གྲོང་ཁྱེར་ཁྲིམས་འཛིན་ལས་ཁུངས་དང་ཆོས་དོན་ལས་ཁུངས་མཉམ་རུབ་ཐོག་གཙང་ཁུལ་གྱི་དགོན་སྡེ་ཆེ་ཤོས་དང་པཎ་ཆེན་སྐུ་ཕྲེང་རིམ་བྱོན་གྱི་གདན་ས་བཀྲིས་ལྷུན་པོ་དགོན་པར་རྩ་ཁྲིམས་ཁྱབ་གདལ་ཞེས་པའི་ལས་འགུལ་ཞིག་འགོ་འཛུགས་བྱས་ཡོད་པ་དང༌། དེ་ཡང་རྒྱ་ནག་གཞུང་འབྲེལ་གྱི་གསར་འགྱུར་རྒྱུད་ལམ་ཁག་གི་ནང་འཁོད་པར་གཞིགས་ན།ཁྲིམས་བཞིན་དགོན་སྡེ་བཅོས་སྐྱོང་དང་། བསླབ་ཁྲིམས་ལ་བརྟེན་ནས་དགེ་འདུན་པར་དོ་དམ།དགེ་འདུན་པས་བཅའ་ཁྲིམས་དང་འདུལ་ཁྲིམས་སྲུང་དགོས་པའི་ཆ་རྐྱེན་ལྟར་། གྱོད་གཞི་དང་ཟུང་དུ་འབྲེལ་ནས་སྲོལ་ཡིག་འགྲེལ་བཤད་དང། ཡུལ་དངོས་སུ་བློ་དྲི་སོགས་ཀྱི་རྣམ་པར་བརྟེན་ནས་འཆད་ཁྲིད་བྱས་ཤིང། གོ་བདེ་རྟོགས་སླ་དང་གཏིང་ཟབ་ཞིབ་ཚགས་ཀྱི་དྲིལ་བསྒྲགས་ལས། རྩ་ཁྲིམས་དང་ཆོས་ལུགས་སྲིད་ཇུས། ཆོས་ལུགས་ལས་དོན་གྱི་སྲོལ་ཡིག བོད་ཀྱི་མཐའ་འཚམས་དོ་དམ་གྱི་སྲོལ་ཡིག་སོགས་ཀྱི་བཅའ་ཁྲིམས་དང་ཁྲིམས་སྲོལ་འགྲེལ་བཤད་བྱས་ཡོད་ཅེས་འཁོད་ཡོད། བོད་ཀྱི་རིས་མེད་དགོན་སྡེ་ཁག་གི་ནང་རྒྱ་ནག་གཞུང་གི་ཆབ་སྲིད་ལ་སློབ་སྦྱོང་དང་རྒྱུག་ལེན་བྱེད་པ་དེ་ནི་དེ་སྔ་ནས་འགོ་འཛུགས་བྱས་ཡོད་ཀྱང་། མཐའ་མཚམས་དོ་དོམ་གྱི་སྲོལ་ཡིག་ལ་སློབ་སྦྱོང་བྱ་རྒྱུ་དེ་སློབ་གཞི་གསར་པ་ཞིག་ཆགས་ཡིན་ཤས་ཆེ།
