སྤྱི་ལོ་ ༢༠༢༠ ལོའི་ཟླ་ ༡ ཚེས་ཤར་ནས་བཟུང་བོད་རང་སྐྱོང་ལྗོངས་མི་མང་འཐུས་མི་ཚོགས་ཆེན་དང་སྲིད་གྲོས་ཀྱི་ཚོགས་འདུ་གཉིས་སྐོང་འཚོགས་བྱེད་མུས་ཡིན་པ་དང། ཚོགས་འདུ་དེ་གཉིས་ནི་བོད་རང་སྐྱོང་ལྗོངས་ལ་ཆ་མཚོན་ན་ལོ་གཅིག་དུས་གཅིག་གི་གལ་གནད་ཤིན་ཏུ་ཆེ་བའི་ཚོགས་འདུ་ཞིག་རེད། ཚེས་ ༦ ཉིན་གྱི་ཕྱི་དྲོ་བོད་རང་སྐྱོང་ལྗོངས་མི་མང་འཐུས་མི་ཚོགས་ཆེན་གྱི་ཚོགས་གཙོ་བློ་བཟང་རྒྱན་མཚན་ཆོས་ལུགས་ལས་རིགས་ཀྱི་ཚོགས་ཆུང་ཁག་བགོས་ནང་ཆེད་བསྐྱོད་བྱས་ཏེ་གྲྭ་བཙུན་དང་ཆོས་ལུགས་ལས་རིགས་ཀྱི་མི་སྣ་ཚོས་༸གོང་ས་མཆོག་ལ་མཚན་སྨད་ཇི་ལྟར་བྱེད་དགོས་མིན་ཐད་ནན་བརྗོད་བྱས་དོན། ཆོས་ལུགས་རིགས་ཁོངས་ཀྱི་ཚབ་མཚོན་མི་སྣས“ཆབ་སྲིད་ཐད་བློས་འཁེལ་བ་དང་། ཆོས་ལུགས་ཐད་ཐོས་བསམ་ཟབ་པ། སྤྱོད་ལམ་ཐད་དམངས་མགུ་བ། འགག་རྩའི་དུས་སུ་ནུས་པ་ཐོན་པ”བཅས་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་བླང་བྱ་གཞིར་བཟུང་། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་གཏིང་ཟབ་དང་། ཏང་གི་མཛད་ཕྱོགས་སྲིད་ཇུས་ཁག་སློབ་སྦྱོང་གཏིང་ཟབ། ཡིན་མིན་ཆེན་པོའི་གནད་དོན་ཐད་ཐོག་མཐའ་བར་གསུམ་དུ་རིག་པ་དྭངས་གསལ་རྒྱུན་འཁྱོངས། ཀྲུང་གོ་གུང་ཁྲན་ཏང་གི་འགོ་ཁྲིད་ལ་བརྩི་བཀུར་མཐའ་གཅིག་ཏུ་ཞུ་བ། བློ་བརྟན་འགྱུར་མེད་ཀྱིས་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་འགྲོ་ལམ་ཐོག་སྐྱོད་པ། བློ་བརྟན་འགྱུར་མེད་ཀྱིས་མེས་རྒྱལ་གཅིག་གྱུར་དང་མི་རིགས་མཐུན་སྒྲིལ་སྲུང་སྐྱོང་། ལྷག་དོན་དུ“གདེང་ཚོད་བཞི”བརྟན་དུ་གཏོང་བ་དང་། “མོས་སེམས་ལྔ”ཆེ་རུ་གཏོང་བ། ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་ཟབ་ཏུ་གཏོང་བ་བཅས་བྱས་ཏེ་བྱ་སྤྱོད་ངོ་མའི་ཐོག་ནས་རྦད་དེ་བློས་འགེལ་ཆོག་པ་མངོན་པར་བྱེད་དགོས། “ཚད་གཞི་བཞིར་བརྩི་སྲུང་གིས་སྔོན་ཐོན་གྲྭ་བཙུན་ཧུར་ཐག་བྱེད་པའི”སློབ་གསོ་ལག་ལེན་བྱེད་སྒོ་རྒྱུན་མཐུད་གཏིང་ཟབ་སྤེལ་ནས་དམིགས་སའི་རང་བཞིན་ལྡན་པའི་ངང་སློབ་གསོ་ཁྲིད་སྟོན་ལ་ཤུགས་སྣོན་བརྒྱབ་སྟེ་དགོན་སྡེའི་ནང་ཁུལ་དོ་དམ་ལ་ཤུགས་སྣོན་རྒྱག་དགོས། ལངས་ཕྱོགས་བརྟན་པོ་ཡོང་བར་བྱས་ནས་རྒྱལ་གཅེས་རིང་ལུགས་ཀྱི་དར་ཆ་མཐོན་པོར་སྒྲེང་བ་དང་། རྒྱལ་གཅེས་ཆོས་གཅེས་དང་རྒྱལ་སྐྱོང་འགྲོ་ཕན་གྱི་གཟི་བརྗིད་སྲོལ་རྒྱུན་རྒྱུན་འཛིན་དང་དར་སྤེལ་གཏོང་བ། ཁ་ཕྲལ་དང་གཏོར་བཤིག་གི་བྱེད་སྤྱོད་མཐའ་དག་དང་མདུང་རྩེ་ཁ་སྤྲོད་ཀྱིས་འཐབ་རྩོད་བྱེད་པ། ཏཱ་ལ་སྐྱེ་ཕྲེང་བཅུ་བཞི་པ་དང་ཏཱ་ལའི་རུ་ཚོགས་ཀྱི་ཆབ་སྲིད་ཐད་ཀྱི་ལོག་སྤྱོད་རང་བཞིན་དང་། ཆོས་ལུགས་ཐད་ཀྱི་གཡོ་རྫུས་རང་བཞིན། བྱ་ཐབས་ཐད་ཀྱི་མགོ་སྐོར་རང་བཞིན་བཅས་ལ་ཐེར་འདོན་དགག་རྒྱག་གཏིང་ཟབ་བྱེད་པ། དད་ལྡན་མང་ཚོགས་ཚོར་དེང་གི་བདེ་སྐྱིད་ལྡན་པའི་འཚོ་བ་ཡག་པོ་སྐྱེལ་རྒྱུར་སློབ་གསོ་ཁྲིད་སྟོན་བཅས་བྱས་ནས་རང་ལྗོངས་འཕེལ་རྒྱས་མྱུར་པོ་དང་ཡུན་རིང་བདེ་འཁོད་ཡོང་ཕྱིར་ལེགས་སྐྱེས་གསར་པ་དེ་བས་ཆེ་བ་འབུལ་དགོས་ཞེས་ནན་བརྗོད་བྱས་ཡོད།ད་ཐེངས་ཚོགས་འདུའི་ཐོག་གི་གཏམ་བཤད་ལས་རྒྱ་ནག་གཞུང་གིས་༸གོང་ས་མཆོག་ལ་འཛིན་པའི་སྲིད་ཇུས་ལ་བཟང་ཕྱོགས་ཀྱི་འགྱུར་བ་གང་ཡང་བྱུང་མེད་ལ།བོད་ཀྱི་ཆོས་དང་རིག་གཞུང་གི་ཐད་དམ་དྲག་དང་བཙན་གནོན་རང་བཞིན་གྱི་སྲིད་ཇུས་ལའང་འགྱུར་བ་ཅི་ཡང་བྱུང་མེད་པ་གསལ་པོར་མཚོན་ཡོད་པ་མ་ཟད།ཁོ་ཚོའི་རྣོ་ངར་རང་བཞིན་དང་བཙན་གནོན་རང་བཞིན་གྱི་སྲིད་ཇུས་དང་བྱ་ཐབས་དེ་དག་མུ་མཐུད་ནས་ལག་ལེན་བྱེད་ངེས་ཡོད་པ་ར་སྤྲོད་ཐུབ།
