སྔ་འགྱེལ་རྗེས་མཐུད་ཀྱི་གསུམ་བཅུའི་སྙིང་སྟོབས་ནམ་ཡང་ལོ་རྒྱུས་ཀྱི་དེབ་ཐེར་ནང་འཁོད་ངེས་རེད། འཛམ་གླིང་ས་གནས་གང་སར་རྣམ་པ་མིན་གྱི་ཐོག་ནས་བོད་མིའི་རང་དབང་སྒེར་ལངས་ཐེངས་ ༦༢ པ་སྲུང་བརྩི་ཞུ་བཞིན་པ་ལྟར། འདི་ག་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ངོས་ནས་ཀྱང་བཞུགས་སྒར་རྡ་རམ་ས་ལར་བོད་ཀྱི་གཞུང་འབྲེལ་མ་ཡིན་པའི་ཚོགས་པ་ཁག་དང་མཉམ་འབྲེལ་གྱི་ཐོག་ནས་སྲུང་བརྩི་ཟབ་རྒྱས་ཞུས་པ་དང།
སྔ་དྲོའི་མཛད་སྒོའི་ཐོག་དམིགས་བསལ་སྐུ་མགྲོན་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་པདྨ་འབྱུང་གནས་མཆོག་དང་། རྒྱ་གར་ས་གནས་ཀྱི་སྐུ་མགྲོན། དེ་བཞིན་གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ་ཚོས་གསུམ་དུས་དང་འབྲེལ་བའི་གཏམ་བཤད་དང་བསྒྲགས་གཏམ་སོགས་སྒྲོག་སྦྱང་གནང་བ་དང་། འདི་ག་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་གཙོ་ངག་ཁྲི་རལ་མཆོག་ནས་ད་ཐེངས་ཀྱི་མཛད་སྒོ་གཙོ་སྐྱོང་གནང་བ་དང་། དེ་རྗེས་རྡ་ཤོད་ཀ་ཅ་རི་བར་མི་མང་གི་སྐད་འབོད་དབུ་འཛུགས་གནང་བ་དང་། སྐད་འབོད་མཇུག་བསྒྲིལ་གྱི་མཛད་སྒོའི་ཐོག་འདི་ག་ཚོགས་པའི་ཚོགས་གཙོ་ངག་དབང་ཁྲི་རལ་མཆོག་ནས་མཇུག་བསྡོམས་གཏམ་བཤད་གནང་ཡོད། དེ་ཉིན་སྔ་དྲོའི་མཛད་སྒོ་དབུ་འཛུགས་མ་ཞུས་གོང་གཞུང་འབྲེལ་མ་ཡིན་པའི་ཚོགས་པ་ལྔ་ཡི་ཚོགས་གཙོ་རྣམས་དབུས་བོད་མིའི་སྒྲིག་འཛུགས་ཀྱི་གཞུང་འབྲེལ་མཛད་སྒོར་མཉམ་བཞུགས་ཞུས་ཡོད། དེ་དང་ཆབས་ཅིག་དེ་ཉིན་ཨའོ་སོ་ཁྲུ་ལི་ཡར་གནས་བཞུགས་འདི་ག་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་རྒྱུན་ལས་དང་ཚོགས་མི་ཚོས་ཀྱང་ས་གནས་བོད་རིགས་མཐུན་ཚོགས་ཀྱིས་གོ་བསྒྲིགས་གནང་བའི་དུས་དྲན་གྱི་མཛད་སྒོར་མཉམ་བཞུགས་གནང་བ་མ་ཟད།
རྒྱུན་ལས་དོན་གྲུབ་མཆོག་ནས་འདི་ག་ཚོགས་པའི་སྐུ་ཚབ་ཞུས་ནས་མཛད་སྒོའི་ཐོག་དབྱིན་ཡིག་ཐོག་ནས་བསྒྲགས་གཏམ་སྒྲོག་སྦྱང་གནང་ཡོད།
