བོད་གཞུང་དགའ་ལྡན་ཕོ་བྲང་གི་གཞུང་ཞབས་ཟུར་པ་རྩིས་དཔོན་རྣམ་སྲས་གླིང་གི་ལྷ་ལྕམ་ཆོས་སྐྱིད་ལགས་དང་། ཁོང་གི་བུ་ཕྲུག་ཚོས་རྒྱ་དམར་གྱི་བཙོན་ཁང་ནང་སྡུག་སྦྱོང་ཚད་མེད་མྱངས་པའི་མི་ཚེའི་ལོ་རྒྱུས་བོད་ཡིག་དང་དབྱིན་ཇི་སོགས་ཀྱི་ཐོག་འབྲི་རྩོམ་གནང་ནས་རྒྱལ་སྤྱིའི་ཐོག་བོད་དོན་བདེན་དཔང་ཆེད་ཁྱབ་བསྒྲགས་ཧ་ཅང་ཆེན་པོ་གནང་བ་མ་ཟད། མི་ཚེའི་ལོ་རྒྱུས་དེབ་ཕྲེང་དག་སྤུས་ཚོང་གནང་བའི་ཕྱག་དངུལ་ཁོངས་ནས་སྔ་རྗེས་སུ་ཧིན་སྒོར་འབུམ་གཅིག (༡༠༠༠༠༠།)འདི་ག་བོད་ཀྱི་དགུ་བཅུ་གསུམ་ལས་འགུལ་ཚོགས་པར་བདེན་དོན་འཐབ་རྩོད་ཀྱི་མཇུག་སྐྱོང་ཞུ་ཆེད་ཞལ་འདེབས་གནང་འབྱོར་བྱུང་བ་ལགས་ན། ངེད་སྐབས་བརྒྱད་པའི་རྒྱུན་ལས་རྣམས་དང་། འདི་ག་ཚོགས་པའི་ཚོགས་མི་སེར་སྐྱ་བགྲེས་གཞོན་བར་མ་ཡོངས་ཀྱི་ཚབ་ཞུས་ནས་ཐུགས་རྗེ་ཆེ་ཞུ་བ་དང་ཆབས་ཅིག ཁོང་རྣམ་པའི་མི་རབས་ཕྲེང་རྒྱུད་ཀྱི་རྒྱལ་གཅེས་ལྷག་བསམ་དང་མི་རིགས་ཀྱི་ལར་ཞེན་མཐའ་དག་ང་ཚོ་བོད་ཀྱི་མི་རབས་གསར་པ་ཚོས་སློབ་སྦྱོང་དང་མིག་དཔེ་བཟང་ཤོས་སུ་བལྟ་ཐུབ་པ་བྱ་རྒྱུ་ནི་ཤིན་ཏུ་གལ་ཆེར་འཛིན་དགོས་པ་བཅས་ཀྱི་འབོད་སྐུལ་ཡང་ནན་འདྲོངས་ཞུ་རྒྱུ་ཡིན།
འཚོ་བས་འཕོངས་ཤིང་རྟག་ཏུ་མི་ཡིས་བརྙས།།
འཚབས་ཆེན་ནད་དང་གདོན་གྱིས་བཏབ་ཀྱང་སླར།།
འགྲོ་ཀུན་སྡིག་སྡུག་བདག་ལ་ལེན་བྱེད་ཅིང་།།
ཞུམ་པ་མེད་པ་རྒྱལ་སྲས་ལག་ལེན་ཡིན།།