ཉིན་ཤས་རིང་རྒྱ་ནག་ནང་གི་གནས་ཚུལ་ལ་བལྟས་ན། ཆེས་འཁྲུག་ཆ་དོད་ལ་རྣོ་ངར་རང་བཞིན་གྱི་གནས་ཚུལ་གཅིག་མིན་གཉིས་མིན་ངང་ཐོན་བཞིན་ཡོད་པ་དང་། འཆར་ལ་ཉེ་བའི་སྤྱི་ལོ་ ༢༠༢༢ ལོའི་དམར་ཤོག་ཚོགས་པའི་རྒྱལ་ཡོངས་ཚོགས་ཆེན་ཉི་ཤུའི་ཐོག་མི་རབས་དྲུག་པའི་རྒྱུན་འཛིན་པ་སུ་ཞིག་སླེབས་སྲིད་པ་དང། སུ་ཞིག་ཕམ་ཉེས་སུ་འགྲོ་སྲིད་པ་བཅས་ལ་བལྟ་ཞིབ་བྱེད་རིན་ཡོད་པའི་དུས་སྐབས་གཅིག་ཆག་ཡོད། དེ་ཡང་ཞི་ཅིང་ཕིང་གིས་རྒྱ་ནག་གི་ཏང་སྲིད་དམག་གསུམ་གྱི་དབང་ཆ་བཟུང་ནས་ལོ་བཅུ་ལ་ཉེ་བ་འདས་ཟིན། ལམ་སྲོལ་ལྟར་ན་ཕྱི་ལོ་ ༢༠༢༢ ལོར་སྐོང་འཚོགས་བྱ་རྒྱུའི་རྒྱལ་ཡོངས་ཚོགས་ཆེན་ཉི་ཤུའི་ཐོག་རྒན་ཡོན་ཞུ་གི་ཡོད། ཡིན་ནའང། འདས་ཟིན་པའི་མི་ལོ་དགུའི་གནས་ཚུལ་ལ་བལྟས་ན་མི་མང་པོ་ཞིག་གིས་ཞི་ཅིང་ཕིང་གིས་མུ་མཐུད་ནས་དབང་ཆ་བཟུང་རྒྱུ་ཡིན་པའི་ཚོད་དཔག་བྱེད་ཀྱི་ཡོད། དེ་ཡང་ཐོག་མར་རྒྱལ་ཁབ་ཀྱི་སྲིད་འཛིན་་ལས་རྒྱུན་གཉིས་མ་གཏོགས་བྱེད་མི་ཆོག་པའི་རྩ་ཁྲིམས་ལ་འགྱུར་བ་བཏང་ནས་ཚད་བཀག་མེད་པར་བཟོས་པར་བརྟེན། དེ་བས་ཀྱང་མི་མང་པོ་ཞིག་གིས་ཞི་ཅིང་ཕིང་གིས་མའོ་ཙེ་ཏུང་གཉིས་པ་ཞིག་བྱེད་སྲིད་པའི་དོགས་སློང་བྱེད་ཀྱི་ཡོད། ཕྱོགས་གཞན་ཞིག་ནས་ཏེང་ཞའོ་ཧྤེང་གི་དུས་སྐབས་ནས་བཟུང་གི་རྒྱ་ནག་གི་འགོ་འཁྲིད་ལམ་ལུགས་ལ་འགྱུར་བ་བཏང་ནས་ལོ་ནའི་ཚད་བཀག་དང་། བསླབ་པ་རྒན་གཞོན་གྱི་བང་རིམ་ལ་བརྟེན་ནས་འགོ་འཁྲིད་གསར་རྙིང་གི་ཚན་ཁག་བརྗེ་རེས་བྱེད་པའི་ལམ་སྲོལ་གསར་གཏོད་བྱས་པ་དང། ཅང་ཙེ་མིན་དང་། ཧུའུ་ཅིན་ཐའོ། ཞི་ཅིང་ཕིང་བཅས་ལམ་སྲོལ་དེ་ལ་བརྟེན་ནས་འགོ་འཁྲིད་ལས་གནས་ཐོག་སླེབས་ཡོད། ཡིན་ནའང། ཞི་ཅིང་ཕིང་གི་དུས་སྐབས་སུ་དམར་ཤོག་ཚོགས་པའི་ནང་ཁུལ་གྱི་འགལ་བ་དང་འཐབ་རྩོད་ལ་བརྟེན་ནས་དེ་སྔའི་ལམ་སྲོལ་གྱི་སྒྲོམ་གཞི་མང་པོ་ཞིག་སྦོ་ལུགས་ཡོད།
དེ་ཡང་རྒྱ་ནག་ནག་དམར་ཤོག་གི་རྒྱལ་ཡོངས་ཚོགས་ཆེན་བཅོ་བརྒྱད་པའི་ཐོག་ཞི་ཅིང་ཕིང་དེ་སྔའི་གཏན་འབེབས་ལྟར་མིི་རབས་ལྔ་པའི་སྲོག་ཤིང་གི་མི་སྣར་ཐག་གཅོད་བྱས་ཡོད་པ་དང་། དེ་རྗེས་ཞི་ཅིང་ཕིང་དང་སྲིད་བློན་ལི་ཁཱ་ཆང་གི་རྒྱུན་འཛིན་པ་དེ་ད་ལྟའི་སྲིད་བློན་གཞོན་པ་ཧུའུ་ཁྲུན་ཧྭ་དང་། ཁྲུང་ཆིང་དམར་ཤོག་ཚོགས་པའི་དྲུང་ཆེ་ཟུར་པ་དང་དབུས་ཆབ་སྲིད་ཅུས་ཀྱི་ཨུ་ཡོན་སུན་ཀྲང་ཚའེ་གཉིས་བང་བསྒྲིགས་ནས་ ༢༠༢༢ ལོའི་རྒྱལ་ཡོངས་ཚོགས་ཆེན་ཉི་ཤུའི་ཐོག་ཞི་ཅིང་ཕིང་དང་སྲིད་བློན་ལི་ཁཱ་ཆང་གཉིས་ལས་འཁྱུར་རྒན་ཡོན་དུ་འགྲོ་རྒྱུ་དང་། ཧུའུ་ཁྲུན་ཧྭ་དང་སུན་ཀྲང་ཚའེ་ཡིས་འཁྲིད་བྱས་པའི་མི་རབས་དྲུག་པའི་འགོ་འཁྲིད་ཚན་ཁག་ཞིག་འཆར་འགོད་བྱས་ཡོད། ཡིན་ནའང། དམར་ཤོག་ཚོགས་པའི་ནང་ཁུལ་གྱི་འགལ་དང་འཐབ་རྩོད་ཀྱི་ཁྲོད། སྤྱི་ལོ་ ༢༠༡༧ ལོར་དབུས་ཆབ་སྲིད་ཅུས་ཀྱི་ཨུ་ཡོན་དང་ཁྲུང་ཆིང་དམར་ཤོག་ཚོགས་པའི་དྲུང་ཆེ་སུན་ཀྲང་ཚའེ་ ཚབས་ཆེའི་སྒྲིག་འགལ་ཁྲིམས་འགལ་གྱི་མིང་ཐོག་ནས་རྒྱ་ནག་དབུས་སྒྲིག་བཤེར་ལྷན་ཁང་གིས་ལས་གནས་འཚམས་འཇོག་གི་ཐོག་ནས་སུན་ཀྲང་ཚའེ་ལ་ཞིབ་བཤེར་བྱས་པའི་ཁྱབ་བསྒྲགས་བྱས་པ་རེད། གནས་ཚུལ་དེས་རྐྱེན་པས་རྒྱ་ནག་དམར་ཤོག་ཚོགས་པའི་རྒྱལ་ཡོངས་ཚོགས་ཆེན་བཅོ་རྒྱད་པའི་ཐོག་བང་རིམ་བསྒྲིགས་པའི་འཆར་གཞི་ཡོད་ཚད་སྦོ་ལུག་པ་རེད།འཆར་གཞི་དེ་སྦོ་ལུག་པའི་དབང་གིས་ལོ་གཉིས་ཀྱི་རྗེས་ཀྱི་སྤྱི་ལོ་ ༢༠༡༧ལོར་སྐོང་འཚོགས་བྱས་པའི་རྒྱལ་ཡོངས་ཚོགས་ཆེན་བཅུ་དགུའི་ཐོག་ཞི་ཅིང་ཕིང་དང་སྲིད་བློན་ལི་ཁཱ་ཆང་གི་རྒྱུན་འཛིན་པ་དེ་སུ་ཞིག་ཡིན་མིན་སུས་ཀྱང་ཚོད་དཔག་མི་ཐུབ་པའི་གནས་སུ་ལྷུངས་ཡོད། དེའི་རྐྱེན་གྱིས་ཞི་ཅིང་ཕིང་གིས་མུ་མཐུད་ནས་དབང་ཆ་བཟུང་གི་རེད་ཅེས་བརྗོད་ཀྱི་ཡོད།
ཡིན་ནའང། ཉིན་ཤས་རིང་རྒྱ་ནག་ནང་ཐོན་པའི་གནས་ཚུལ་ལ་བལྟས་ན་མི་རྣམས་ཀྱིས་དོ་སྣང་བྱེད་དགོས་པའི་གནད་དོན་གཅིག་མིན་གཉིས་ཀྱང་ཐོན་བཞིན་ཡོད་པ་སྟེ། ལོ་གཅིག་དུས་གཅིག་གི་པའེ་ཏའེ་ཧྭ་ཚོགས་འདུ་མཇུག་བསྒྲིལ་བ་དང་། འདི་ལོའི་པའེ་ཏའེ་ཧྭ་ཡི་ཚོགས་འདུ་དེ་གལ་གནད་ཤིན་ཏུ་ཆེ་བའི་ཚོགས་འདུ་ཞིག་ཆགས་ཡོད་པ་སྟེ། དེ་ཡང་སང་ལོ་རྒྱ་ནག་དམར་ཤོག་ཚོགས་པའི་རྒྱལ་ཡོངས་ཚོགས་ཆེན་ཐེངས་ཉི་ཤུ་པ་སྐོང་འཚོགས་བྱས་ཏེ་སྐབས་གསར་པའི་དབུས་ཆབ་སྲིད་ཅུས་ཀྱི་རྒྱུན་ལས་གསར་འདེམས་བྱེད་དགོས་ཀྱི་ཡོད་པ་དང་། ཕྱོགས་གཞན་ཞིག་ནི་ཞི་ཅིང་ཕིང་མུ་མཐུད་ནས་སྲིད་དབང་བཟུང་མིན་གྱི་ཐད་གླེང་སློང་སྣ་ཚོགས་བྱེད་བཞིན་པའི་སྒང་རེད། དེའི་རྐྱེན་གྱིས་ད་རེས་ཀྱི་ཚོགས་འདུའི་ཐོག་གནད་དོན་འདི་དག་གི་ཐད་ནང་མོལ་དང་གྲོས་བསྡུར་བྱེད་ཀྱི་ཡོད་། ནང་མོལ་གྲོས་བསྡུར་བྱས་ཏེ་ཐག་གཅོད་ཇི་བྱུང་ཕྱིར་བསྒྲགས་བྱེད་སྲོལ་གཏན་ནས་མེད་པ་མ་ཟད། ནང་མོལ་ཇི་བྱུང་ཡང་ཡོད་ཚད་གསང་བ་རེད། ཡིན་ནའང། རྒྱ་ནག་ཐོག་ཉམས་ཞིབ་བྱེད་མཁན་ཚོས་ཚོགས་འདུ་དེའི་ཐོག་གླེང་སློང་དང་ཐག་གཅོད་ཇི་ལྟར་བྱུང་མིན་ལ་བལྟ་ཞིབ་བྱེད་པའི་ཁ་ཕྱོགས་གལ་ཆེ་ཤོས་ནི་ཚོགས་འདུ་གྲོལ་རྗེས་རྒྱ་ནག་གི་འགོ་འཁྲིད་ཚོའི་ལས་དོན་བྱེད་ཕྱོགས་དང་ཚོགས་འདུའི་འགྲོ་སྟངས་ལ་བལྟས་ནས་དཔྱད་ཞིབ་བྱེད་ཀྱི་ཡོད། གནད་དོན་དེའི་ཐོག་ནས་བལྟས་ན་། འདི་ལོའི་པའེ་ཏའེ་ཧྭ་ཡི་ཚོགས་འདུ་གྲོལ་རྗེས་འཁྲུག་ཆ་དོད་ཤོས་དང་མངོན་གསལ་དོད་ཤོས་ནི་ད་ལྟའི་དབུས་ཆབ་སྲིད་ཅུས་ཀྱི་རྒྱུན་ལས་དང་རྒྱལ་ཡོངས་སྲིད་གྲོས་ཀྱི་ཀྲུའུ་གཞི་ཡིན་པ་དབང་ཡང་གི་འགུལ་བསྐྱོད་བྱེད་པའི་རྣམས་པ་དེ་མངོན་གསལ་དོད་ཤོས་ཆགས་ཡོད།
དེ་ཡང་རྟགས་ཚན་ཆེ་ཤོས་ཀྱི་གནད་དོན་གཅིག་ནི་ཟླ་ ༨ཚེས་ ༡༧ ཉིན་རྒྱ་ནག་དབུས་ནོར་སྲིད་ཨུ་ཡོན་ལྷན་ཁང་གི་ཚོགས་འདུ་ཐེངས་བཅུ་པ་དེ་སྐོང་འཚོགས་བྱས་ཡོད་ཅིང། ལྷན་ཁང་དེར་འགོ་འཁྲིད་ཀྱི་ཚོགས་ཆུང་ཞིག་གསར་བཙུགས་བྱས་ཡོད་པ་དང་། ཚོགས་ཆུང་གི་ཚོགས་གཙོ་ཞི་ཅིང་ཕིང་དང་ཚོགས་གཙོ་གཞོན་པ་སྲིད་བློན་ལི་ཁཱ་ཆང། ཚོགས་མི་དབུས་ཆབ་སྲིད་ཅུས་ཀྱི་རྒྱུན་ལས་ཝང་ཧུའུ་ནིང་དང་སྲིད་བློན་གཞོན་པ་ཧན་ཀྲང་བཅས་རེད། ཡིན་ནའང། ད་ཐེངས་ཀྱི་ཚོགས་འདུ་ཐེངས་བཅུ་པའི་ཐོག་དབང་ཡང་ཚོགས་བཞུགས་བྱེད་དུ་བཅུག་ཡོད། དབང་ཡང་ནི་ལྷན་ཁང་དེའི་འགོ་འཁྲིད་མིན་ལ་ཁོངས་མི་ཡང་མ་ཡིན་། ཐ་ན་ལས་ཀའི་ཁྱབ་ཁོངས་ཀྱི་ཐོག་ནས་ཀྱང་འབྲེལ་བ་གཏན་ནས་མེད། དེ་ལྟར་ནའང་འབྲེལ་བ་གཏན་ནས་མེད་པའི་དབང་ཡང་ད་ཐེངས་ཀྱི་ཚོགས་འདུར་ཚོགས་བཞུགས་བྱེད་དུ་འཇུག་པའི་རྒྱུ་མཚན་ཅིག་ཞིག་ཡིན་ནམ། དབང་ཡང་ཚོགས་བཞུགས་བྱས་པ་ཙམ་མ་ཟད། སྲིད་བློན་ལི་ཁཱ་ཆང་གི་རྗེས་ཀྱི་ཨང་རིམ་གསུམ་པའི་གདན་ཐོབ་ཐོག་བཞག་ཡོད་པས་དེ་ནི་རྒྱ་ནག་གི་ཆབ་སྲིད་འགྲོ་ལུགས་ཐོག་ནས་བལྟས་ན་ཆབ་སྲིད་ཀྱི་བརྡ་རྟགས་ཆེན་པོ་ཞིག་རེད། དེར་བརྟེན་འདི་ལོའི་པའེ་ཏའེ་ཧྭ་ཡི་ནང་མོལ་ཚོགས་འདུའི་ཐོག་སང་ལོའི་དམར་ཤོག་ཚོགས་པའི་རྒྱལ་ཡོངས་ཚོགས་ཆེན་ཉི་ཤུའི་ཐོག་ཞི་ཅིང་ཕིང་ལས་འཁྱུར་བྱས་ཏེ་དབང་ཡང་ཞི་ཅིང་ཕིང་གི་རྒྱུན་འཛིན་པར་གཏན་འབེབས་བྱུང་བར་ངོས་འཛིན་བྱེད་ཀྱི་ཡོད་པ་རེད།
རྒྱུ་མཚན་གཞན་ཞིག་ནི་ནོར་སྲིད་དཔལ་འབྱོར་ཨུ་ཡོན་ལྷན་ཁང་གི་ཚོགས་འདུ་གྲོལ་མ་ཐག་དབང་ཡང་སླར་ཡང་བོད་ཞི་བས་བཅིངས་འགྲོལ་བཏང་ནས་ལོ་ངོ་བདུན་བཅུའི་མཛད་སྒོར་རྒྱ་ནག་དབུས་གཞུང་གི་སྐུ་ཚབ་ཀྱི་ཚོགས་གཙོར་བསྐོ་བཞག་བྱས་པ་དེ་རེད། མ་ཞིག་བོད་ཀྱི་ལས་དོན་དེ་དབང་ཡང་གི་ལས་ཀའི་ཁྱབ་ཁོངས་དང་འབྲེལ་བ་དམ་པོ་ཡོད་པས་དེ་ཙམ་གྱི་ཡ་མཚན་བྱེད་དགོས་དོན་མེད་ཀྱང་། ང་ཚོས་ལོ་བཅུའི་གོང་གི་ལོ་རྒྱུས་ལ་ཕྱིར་མིག་ཅིག་བལྟས་ན། སྤྱི་ལོ་ ༢༠༡༡ ལོའི་ལོ་ངོ་དྲུག་བཅུ་ཟེར་བའི་མཛད་སྒོར་ཞི་ཅིང་ཕིང་རྒྱ་ནག་དབུས་གཞུང་གི་སྐུ་ཚབ་ཚོགས་གཙོར་བསྐོ་བཞག་བྱས་ཏེ་ཆེད་གཏོང་བྱས་ཡོད། ལོ་གཅིག་སོང་རྗེས་ཀྱི་སྤྱི་ལོ་ ༢༠༡༢ ལོའི་རྒྱ་ནག་དམར་ཤོག་ཚོགས་པའི་རྒྱལ་ཡོངས་ཚོགས་ཆེན་བཅུ་བརྒྱད་པའི་ཐོག་ཞི་ཅིང་ཕིང་ཏང་སྲིད་དམག་གསུམ་གྱི་འགོ་གཙོར་གདམས་ཐོན་བྱས་ཡོད། ཡང་བསྐྱར་ལོ་བཅུ་ཕྱིར་གཤིགས་བརྒྱབ་ནས་སྤྱི་ལོ་ ༢༠༠༡ ལོར་བོད་ཞི་བས་བཅིངས་འགྲོལ་བཏང་ནས་ལོ་ངོ་ལྔ་བཅུ་འཁོར་བའི་དྲན་གྱི་མཛད་སྒོར་ཧུའུ་ཅིན་ཐའོ་རྒྱ་ནག་དབུས་གཞུང་གི་སྐུ་ཚབ་ཀྱི་ཚོགས་གཙོར་བསྐོ་བཞག་བྱས་ཡོད་པ་དང་། དེ་རྗེས་ལོ་གཅིག་གི་རྗེས་སྤྱི་ལོ་ ༢༠༠༢ ལོར་རྒྱ་ནག་དམར་ཤོག་ཚོགས་པའི་རྒྱལ་ཡོངས་ཚོགས་ཆེན་བཅུ་དྲུག་པའི་ཐོག་ཧུའུ་ཅིན་ཐའོ་ཏང་གི་སྤྱི་ཁྱབ་དྲུང་ཆེའི་གནས་བབ་ཐོག་བསྐྱལ་ཡོད། དེར་བརྟེན། ད་ཐེངས་ལོ་ངོ་བདུན་བཅུའི་དུས་དྲན་གྱི་མཛད་སྒོར་དབང་ཡང་བསྐོ་བཞག་བྱས་པ་དེ་ནི་རྟ་རྟགས་ཆེན་པོ་ཞིག་ཆགས་ཡོད། དེ་དང་འབྲེལ་བ་ཡོད་པའི་རྒྱུ་རྐྱེན་གཞན་ཞིག་ནི་དབང་ཡང་སང་ལོ་ལོ་ན་ ༦༧ ལ་མ་གཏོགས་སླེབས་ཀྱི་མེད་པ་དེས་ལོ་ནའི་ཚད་བཀག་དང་མཐུན་གྱི་ཡོད་པ་མ་ཟད། སྐབས་གཅིག་གི་རྒྱུན་ལས་མ་གཏོགས་བྱས་པ་མེད་དེས་ལས་རྒྱུན་གཉིས་བྱེད་ཆོག་པའི་ལམ་སྲོལ་དང་མཐུན་གྱི་ཡོད།
