ངང་པ་ནག་པོ་ནི་ཞི་ཅིང་ཕིང་གིས་ཞེད་སྣང་བྱེད་སའི་སེམས་ཅན་ཞིག་ཡིན་པ་དང་། ཐ་ན་ཁོ་པས་གལ་ཆེའི་ཆབ་སྲིད་ཀྱི་ཚོགས་འདུའི་ཐོག་ཏུའང་ངང་པ་ནག་པོར་དོགས་ཟོན་བྱེད་དགོས་པའི་ནན་བརྗོད་ཐེངས་མང་བྱེད་མྱོང་། དེ་ཡང་ཞི་ཅིང་ཕིང་གིས་འདས་པའི་མི་ལོ་བཅུ་ལ་ཉེ་བའི་རིང་ངང་པ་ནག་པོའི་དོན་རྐྱེན་ལ་ཚད་མཐོའི་དོགས་ཟོན་བྱེད་དགོས་ལ། སེ་རུ་སྐྱ་བོའི་དོན་རྐྱེན་ལའང་དོགས་ཟོན་བྱེད་དགོས་ཅེས་ཡང་ནས་ཡང་དུ་ནན་བརྗོད་བྱེད་ཀྱི་ཡོད་ཅིང། དེའི་ནང་ནས་ཀྱང་ངང་པ་ནག་པོ་ནི་ཞི་ཅིང་ཕིང་གིས་འཇིགས་སྣང་ཆེ་ཤོས་བྱེད་ས་དེ་ཆགས་ཡོད། ཡ་མཚན་ཆེ་བ་ཞིག་ལ་ཞི་ཅིང་ཕིང་གིས་འཇིགས་སྣང་ཆེ་ཤོས་བྱ་སའི་ངང་པ་ནག་པོ་དེ་སྤྱི་ལོ་ ༢༠༢༡ ཟླ་ ༩ ཚེས་ ༥ ཉིན་དངོས་སུ་པེ་ཅིང་གནམ་བདེ་སྒོ་མོའི་ཐང་ཆེན་ཐོག་འཕུར་བ་ཡོང་བ་མ་ཟད། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྒྱལ་དར་བསྒྲེངས་འཛུགས་བྱ་ཡུལ་གྱི་ཐང་དེར་ཐོག་བབ་པ་རེད། འདི་ཟླའི་ཚེས་ ༥ ཉིན་གྱི་ཞོགས་པ་རྒྱ་དམག་གི་རྒྱལ་དར་བསྒྲེངས་འཛུགས་བྱེད་མཁན་གྱི་དམག་མིས་རྒྱལ་དར་བསྒྲེངས་འཛུགས་བྱས་པ་མ་ཐག་གློ་བུར་དུ་གང་་ནས་ཡོང་མིན་མི་ཤེས་པའི་ངང་པ་ནག་པོ་དེ་རྒྱལ་དར་བསྒྲེངས་སའི་སྟེགས་བུའི་མདུན་དུ་བབ་པ་རེད། རྒྱལ་དར་སྲུང་སྐྱེལ་རུ་མི་ཚོས་ཀྱང་ག་བྱེད་འདི་བྱེད་མ་ཤེས་པར་ལམ་སེང་གོང་རིམ་ལ་སྙན་གསེང་ཞུ་དགོས་བྱུང་ཡོད། གང་ཡིན་ཞེ་ན་སེམས་ཅན་དེ་ནི་ཞི་ཅིང་ཕིང་གིས་དོག་ཟོན་ཆེན་པོ་བྱ་སའི་སེམས་ཅན་ཞིག་ཡིན་པ་ཁོ་ཚོས་ཤེས་ཀྱི་ཡོད་ལ། ཐ་ན་གལ་ཆེའི་ཚོགས་འདུའི་ཐོག་ཏུའང་ངང་པ་ནག་པོའི་དོན་རྐྱེན་ལ་དོག་ཟོན་བྱེད་དགོས་པའི་ནན་བརྗོད་ཐེངས་མང་བྱེད་མྱོང་བས་སོ། དེར་བརྟེན། མི་རྣམས་ཀྱིས་དེ་ལ་ངང་པ་ནག་པོའི་དོན་རྐྱེན་ཞེས་བཏགས་ཡོད་ལ། དོན་རྐྱེན་དེའི་ཐད་ཚ་ཚ་འུར་འུར་གྱི་ཐོག་ནས་བགྲོ་གླེང་ཡང་བྱེད་བཞིན་མུས་རེད། དེ་ནི་ངོ་ཡ་མཚན་ཆེ་བའི་སྔ་ལྟས་ངན་པ་ཞིག་ཡིན་པར་ངོས་འཛིན་བྱེད་ཀྱི་ཡོད། མ་ཞི་རང་བྱུང་ཁམས་ཀྱི་སྣང་ཚུལ་རྣམ་དོག་བྱེད་དགོས་དོན་མེད་ནའང། འཇིག་རྟེན་ཐོག་བྱུང་བཞིན་དོན་དངོས་མང་པོ་ཞིག་ལ་ཚན་རིག་པས་ཀྱང་བརྡར་ཤ་གཅོད་ཐབས་བྲལ་བའི་གནས་སུ་གྱར་ཡོད། ཞི་ཅིང་ཕིང་གིས་ཡང་སྙིང་ངང་པ་ནག་པོར་དེ་ལྟ་བུའི་འཇིགས་སྣང་བྱེད་དགོས་དོན་ཅི་ཞིག་ཡིན་ནམ།ཐ་ན་ཉེ་ལམ་བོད་རང་སྐྱོང་ལྗོངས་དམར་ཤོག་ཚོགས་པའི་དྲུང་ཆེ་ཝུའུ་དབྱིང་ཇིས་ཀྱང་བོད་རང་སྐྱོང་ལྗོངས་དམར་ཤོག་ཚོགས་པའི་ཚོགས་འདུའི་ཐོག་ངང་པ་ནག་པོའི་དོན་རྐྱེན་དོགས་ཟོན་དང་སྔོན་འགོག་བྱེད་དགོས་པའི་ནན་བརྗོད་བྱས་ཡོད་པ་དང། ཉེ་ཆར་རྒྱ་ནག་གི་ཆབ་སྲིད་ཚོགས་འདུའི་ཐོག་ཞི་ཅིང་ཕིང་གིས་ནན་བརྗོད་བྱས་དོན། འགྱུར་ལྡོག་མང་ལ་ཚོད་དཔག་དཀའ་བའི་རྒྱལ་སྤྱིའི་དུས་བབ་དང་། རྙོག་འཛིང་ཆེ་བ་འཚོར་སྣང་སྐྱེན་པའི་ཉེ་འཁོར་གྱི་ཁོར་ཡུག དཀའ་ཚེག་ཆེ་ལ་རྙོག་འཛིང་ཆེ་བའི་རྒྱལ་ནང་གི་གནས་ཚུལ་གྱི་མདུན་དུ་ང་ཚོས་སྔ་ཕྱི་བར་གསུམ་དུ་དོག་ཟོན་བྱ་རྒྱུ་མཐའ་འཁྱོངས་བྱེད་དགོས་པ་སྟེ།ངང་པ་ནག་པོའི་དོན་རྐྱེན་ལ་ཚད་མཐོའི་དོག་ཟོན་བྱེད་དགོས་ལ།བསེ་རུ་སྐྱ་བོའི་དོན་རྐྱེན་ལའང་ཚད་མཐོའི་དོག་ཟོན་བྱེད་དགོས་ཅེས་བརྗོད་ཡོད། དེ་དང་ཆབས་ཅིག་ཟླ་ ༩ ཚེས་ ༤ ཉིན་རྒྱ་ནག་དམར་ཤོག་ཚོགས་པའི་གསར་བརྗེའི་རྟེན་གཞི་གསར་འཛུགས་བྱེད་སའི་ཡ་ཨན་གསར་བརྗེའི་རྟེན་གཞིའི་ཁུལ་གྱི་ས་སྦུག་རྡིབ་པ་དེ་ནི་གུང་ཁྲན་ཏང་མགོ་རྟིང་ལོ་རྒྱུའི་སྔ་ལྟས་རེད་ཅེས་བརྗོད་ཀྱི་ཡོད། ཡན་ཨན་ནི་རྒྱ་དམར་ཤོག་ཚོགས་པ་འགྱེལ་ས་ནས་ལངས་སའི་གནས་གཞི་གལ་ཆེན་ཞིག་ཆགས་ཡོད་ལ། མའོ་ཙེ་ཏུང་གིས་གྲོང་གསེབ་ནས་གྲོང་ཁྱེར་ལ་མཐའ་བསྐོར་བའི་གསར་བརྗེའི་ཐ་བྱུས་ལག་ལེན་བྱས་ཏེ་གུང་ཁྲན་ཏང་ལ་མཐར་རྒྱལ་ཡོངས་རང་བཞིན་ལྡན་པའི་རྒྱལ་ཁ་རྩོད་ལེན་བྱེད་པའི་གནས་གཞི་ཆག་ཡོད། དེ་ལྟར་ནའང་དེ་གའི་ས་སྦུག་རྡིག་པ་དང་། པེ་ཅིང་གནམ་བདེའི་སྒོ་མོའི་ཐང་ཆེན་ཐོག་གློ་བུར་ངང་པ་ནག་པོ་ཐོན་པ་དེ་ནི་སྔ་ལྟས་ངན་པ་རེད་ཅེས་དཔྱད་བརྗོད་བྱེད་བཞིན་འདུག
