ཉེ་ལམ་རྒྱ་ནག་གཞུང་འབྲེལ་གྱི་གསར་འགྱུར་ཁག་ལ་དཔྱད་ཞིབ་བྱེད་སྐབས། བོད་རང་སྐྱོང་ལྗོངས་ཀྱི་ཁྱབ་ཁོངས་སུ་བོད་ཡིག་དང་རྒྱ་ཡིག་གི་གདན་ཐོབ་རྗེ་པོ་བརྒྱབ་ཏེ་བོད་ཡིག་གི་བེད་སྤྱོད་རང་བཞིན་དང་ཆེ་མཐོང་རང་བཞིན་ཆུང་དུ་བཏང་བ་གསལ་པོ་འདུག དེ་ཡང་དེ་སྔ་ལོ་རབས་བརྒྱ་ཅུའི་ནང་བོད་རང་སྐྱོང་ལྗོངས་སུ་བོད་ཀྱི་སྐད་ཡིག་སློབ་སྦྱོང་དང་། བེད་སྤྱོད། འཕེལ་རྒྱས་གཏོང་ཕྱོགས་སྐོར་གྱི་སྲོལ་ཡིག་ཅིག་བཟོས་ཡོད་པ་མ་ཟད། སྲོལ་ཡིག་དེ་བོད་རང་སྐྱོང་ལྗོངས་ཀྱི་ཁྱབ་ཁོངས་སུ་ཡོད་པའི་སློབ་གྲྭ་དང་ལས་ཁུངས་ཁག དེ་བཞིན་ས་གནས། གྲོང་ཁྱེར་། ཚན་པ་ཁག་ཚང་མས་ལག་ལེན་ཚུལ་བཞིན་དགོས་པ་དང་། འགལ་འཛོལ་བྱུང་རིག་ལ་ཐག་གཅོད་ནན་པོ་དགོས་པའི་གཏན་འབེབས་བྱས་ཡོད་ཀྱང། ལོ་རབས་དགུ་བཅུ་པ་ནས་བཟུང་སྲིད་ཇུས་དེ་རིམ་བཞིན་ནུས་མེད་བཟོས་ཏེ་སློབ་གྲྭ་ཁག་གི་ནང་དེང་སྐབས་ཀྱི་རྩིས་རིག་དང་། དངོས་ཁམས། རྫས་གྱུར་སོགས་བོད་ཡིག་ཐོག་ནས་སློབ་འཁྲིད་བྱེད་པའི་འཛིན་གྲྭ་རྣམས་རིམ་བཞིན་སྒོ་བརྒྱབ་ནས་མེད་པ་བཟོས་ཡོོད་ལ། ལས་ཁུངས་ཁག་གི་གཞུང་འབྲེལ་གྱི་ཡིག་ཆ་བོད་རྒྱ་ཡིག་རིགས་གཉིས་ཐོག་ནས་བཟོ་བའི་ལམ་ལུགས་དེ་ཡང་རིམ་བཞིན་མེད་པ་བཟོས་ཡོད། སྲོལ་ཡིག་ནང་ད་དུང་ཚོགས་འདུ་འཚོགས་པ་དང་། བགྲོ་གླེང་བྱེད་པ། གླུ་གར་གྱི་མཚན་ཚོགས་སོགས་མི་དམངས་འདུ་འཛོམས་ཀྱི་བྱེད་སྒོའི་ཐོག་འཕྲེེད་དར་དང་། སྦྱར་ཡིག སྒོ་བྱང་སོགས་ཀྱི་ཐོག་ངེས་པར་དུ་བོད་ཡིག་འབྲི་དགོས་པ་མ་ཟད། བོད་ཡིག་དེ་སྟེང་ལ་འབྲི་དགོས་པ་དང་རྒྱ་ཡིག་འོག་ལ་འབྲི་དགོས་པ། གལ་ཏེ་གཡས་གཡོན་བྱས་ཏེ་འབྲི་དགོས་ཚེ་བོད་ཡིག་གཡས་དང་རྒྱ་ཡིག་དེ་གཡོན་ལ་འབྲི་དགོས་པའི་ཐག་གཅོད་གསལ་པོ་ཡོད་ལ། ད་བར་གཏན་འབེབས་དེ་གཞི་རྩར་བཟུང་ནས་ལག་ལེན་བྱེད་མུས་རེད། ཡིན་ནའང། ན་ནིང་ལོ་མཇུག་ནས་བཟུང་གནས་ཚུལ་ཁག་ལ་དཔྱད་ཞིབ་བྱེད་སྐབས། བོད་ཡིག་གི་གདན་ཐོབ་དེ་ཡང་མེད་པ་བཟོས་པ་གསལ་པོ་རེད་འདུག དེ་ཡང་བོད་རང་སྐྱོང་ལྗོངས་ཀྱི་ནང་མི་དམངས་འཐུས་མི་ཚོགས་ཆེན་དང་། ཆབ་སྲིད་གྲོས་ཚོགས། དེ་བཞིན་ས་ཁུལ་དང་གྲོང་ཁྱེར། རྫོང་ཁག་བཅས་ཀྱི་ནང་གཅིག་གྱུར་གྱི་ཐོག་ནས་བོད་ཡིག་སྟེང་ལ་འབྲི་བའི་སྲིད་ཇུས་ལ་འགྱུར་བ་བཏང་ནས་རྒྱ་ཡིག་སྟེང་ལ་འབྲི་དགོས་པ་དང་། བོད་ཡིག་འོག་ལ་འབྲི་དགོས་པ་མ་ཟད། དེ་ཡང་ཆུང་ཆུང་ཞིག་འབྲི་དགོས་པའི་གནས་ཚུལ་ཁ་གསལ་ཆག་ཡོད་པ་མ་ཟད། དེ་བཞིན་འདི་ལོའི་བོད་ཀྱི་ལོ་གསར་སྐབས་ཀྱི་བོད་རང་སྐྱོང་ལྗོངས་ཀྱི་ལོ་གསར་གྱི་མཚན་ཚོགས་དང་། དེ་བཞིན་ལྷ་ས་དང། གཞིས་རྩེ། ལྷོ་ཁ ཀོང་པོ། ནག་ཆུ། མངའ་རིས་སོགས་དང་། ཐ་ན་གཞི་རིམ་རྫོང་ཁག་གི་ལོ་གསར་མཚན་ཚོགས་ཐོག་ཏུའང་སྦྱར་ཡིག་དང་ཕྲེད་དར་སོགས་ཡོད་ཚད་གཅིག་གྱུར་གྱི་ཐོག་ནས་རྒྱ་ཡིག་སྟེང་ལ་བྲིས་ཡོད་པ་དང་བོད་ཡིག་འོག་ལ་བྲིས་ཡོད་པ། གཡས་གཡོན་བྱས་ཏེ་འབྲི་དགོས་ཚེ་རྒྱ་ཡིག་གཡས་དང་བོད་ཡིག་གཡོན་དུ་བཞག་ཡོད་པ་གསལ་པོ་ཆགས་ཡོད། ཐ་ན་གཞི་རིམ་རྫོང་ཁག་གི་མི་དམངས་འཐུས་མི་ཚོགས་ཆེན་དང་ཆབ་སྲིད་གྲོས་ཚོགས་ཀྱི་སྡིངས་ཆའི་སྟེང་གི་ཕྲེད་དར་དང་སྦྱར་ཡིག་ཀྱང་གཅིག་གྱུར་ཐོག་འགྱུར་བ་བཏང་ནས་བོད་ཡིག་དང་རྒྱ་ཡིག་གི་གནས་བབ་དེ་བརྗེ་པོ་བརྒྱབ་པ་གསལ་པོ་འདུག གཅིག་བྱས་ན་གནས་ཚུལ་འདི་ནི་སྔ་ལོ་རྒྱ་ནག་གཞུང་གིས་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་བདུན་པ་ཟེར་བ་སྐོང་འཚོགས་བྱས་པའི་ནང་གི་ཐག་གཅོད་ཅིག་ཡིན་སྲིད། མ་ཟད་འདི་ལོའི་རྒྱ་ནག་རྒྱལ་ཡོངས་ཀྱི་ཚོགས་འདུ་གཉིས་ལ་ཆ་མཚོན་ན། སྲིིད་བློན་བླི་ཁཱ་ཆང་གི་སྲིད་གཞུང་གི་ལས་དོན་སྙན་སྒྲོན་ལ་བལྟས་ན་རྒྱ་ནག་ནང་ཁུལ་གྱི་འཐབ་རྩོད་དང་སྤྱི་ཚོགས་ཁྱོན་ཡོངས་ཀྱི་དམ་དྲག་གི་ཚད་གཞི་ཇི་ཙམ་ཡོད་མེད་གསལ་པོ་མཐོང་ཐུབ་སྟེ། སྤྱི་ལོ་ ༢༠༠༧ ལོའི་སྲིད་བློན་ཝན་ཅཱ་པའོ་ཡི་རྒྱལ་ཡོངས་མི་དམངས་འཐུས་མི་ཚོགས་ཆེན་ཐོག་སྲིད་གཞུང་གི་ལས་དོན་སྙན་སྒྲོན་སྐབས་དམངས་གཙོ་ཞེས་པའི་ཚིག་དེ་ཐེངས་ ༡༦ ནན་བཤད་བྱས་ཡོད་ཀྱང་། འདི་ལོ་སྲིད་བློན་ལི་ཁཱ་ཆང་གི་སྲིད་གཞུང་གི་ལས་དོན་སྙན་སྒྲོན་ནང་དམངས་གཙོ་ཞེས་པ་དེ་ཚིག་ ༣ ལས་གསལ་འདོན་བྱས་མེད། དེ་ལས་ལྡོག་ཏེ་བརྟན་ལྷིང་ཞེས་པའི་ཚིག་དེ་ཐེངས་ ༤༣ ནན་བརྗོད་བྱས་ཡོད། དེ་དང་ཆབས་གཅིག་འདི་ལོའི་ཟླ་ ༣ ཚེས་ ༡ ཉིན་ཀྲུང་དབྱང་ཏང་གི་ལས་བྱེད་གསོ་སྐྱོང་འཛིན་གྲྭའི་སློབ་འགོ་ཚུགས་པའི་ཚོགས་འདུའི་ཐོག་ཞི་ཅིང་ཕིང་གི་གཏམ་བཤད་ཀྱི་ནང་དོན་འཐུང་ངུ་ཞིག་གཞུང་འབྲེལ་གསར་འགྱུར་ཐོག་འགོད་སྤེལ་བྱས་ཡོད་པ་དང་། ཤོག་ངོས་གཅིག་ཙམ་ཡང་མེད་པའི་གསར་འགྱུར་འཐུང་ངུ་དེའི་ནང་འཐབ་རྩོད་ཞེས་པའི་ཚིག་དེ་ཐེངས་ ༡༤ ནན་བརྗོད་བྱས་ཡོད་པ་དང་། གུང་ཁྲན་ཏང་ཞེས་པའི་མིང་ཚིག་དེ་ཐེངས་ ༥༩ བེད་སྤྱོད་བྱས་ཡོད།
