གསར་འགྱུར་རྒྱུད་ལམ་འགའ་ཞིག་ཏུ་གནས་ཚུལ་ཐོན་པར་གཞིགས་ན། ཆབ་སྲིད་བཙོན་ཟུར་ཨ་ཀྱཱ་ཀྱཱ་ལགས་གློད་བཀྲོལ་བཏང་བའི་གནས་ཚུལ་ཐོན་འདུག ཨ་ཀྱཱ་ཀྱཱ་ལགས་ནི་མདོ་སྨད་རྔ་པ་རྨེ་རུ་མའི་རུ་ཆེན་དང་པོ་ནས་ཡིན་པ་དང། རྒྱ་ནག་གཞུང་གིས་ཁོང་ལ་དེ་ལྟ་བུའི་བཙོན་འཇུག་ཁྲིམས་ཐག་གཅོད་དགོས་དོན་ནི་ཁོང་གིས་༸གོང་ས་མཆོག་གི་སྐུ་ཡི་གྱ་དོན་སྲུང་བརྩི་དང་འབྲེལ་བའི་གནས་ཚུལ་མི་གཞན་ལ་བརྒྱུད་སྐུལ་བྱས་པའི་ཉེས་མིང་འོོག་ནས་བཙོན་འཇུག་བྱས་པ་ཞིག་རེད། མ་ཟད་སྐབས་དེར་ཁོང་དང་མཉམ་དུ་རྔ་པ་ཁུལ་གྱི་བོད་མི་ ༩ ཙམ་ཞིག་ལ་བཙོན་འཇུག་ཁྲིམས་ཐག་བཅད་ཡོད་ཅིང། ཁོང་རྣམས་ད་དུང་ཡང་རྒྱ་ནག་གཞུང་གི་བཙོན་ཁང་ནང་སྡུག་སྦྱོང་མྱང་མུས་རེད།
སྤྱི་ལོ་ ༢༠༡༦ ལོའི་ཟླ་ ༡༢ ཚེས་ ༦ ཉིན་རྔ་པ་ཁུལ་གྱི་འབྲིང་རིམ་མི་དམངས་ཁྲིམས་ཁང་ཟེར་བས་ཁོང་ལ་མི་ལོ་ ༥ ཡི་བཙོན་འཇུག་ཁྲིམས་ཐག་བཅད་ཡོད། རྒྱ་ནག་གཞུང་གིས་མི་གང་རུང་ཞིག་འཇུ་བཟུང་བྱས་རྗེས་མི་དེའི་ནག་ཉེས་གཏན་འཁེལ་མ་བྱས་པའི་བར་དུས་ཡུན་ཧ་ཅང་རིང་པོ་བཙོན་ཁང་ནང་བཙོན་འཇུག་བྱེད་ཀྱི་ཡོད་པ་དང། དེ་རྗེས་ནག་ཉེས་ཡོད་མེད་ལ་མ་ལྟོས་པར་བཙོན་འཇུག་གི་ཁྲིམས་ཐག་དངོས་སུ་གཅོད་སྐབས་བཀག་ཉར་རིང་གི་དུས་ཡུན་དེ་དག་རྩིས་མེད་གཏོང་གི་ཡོད་སྟབས་ཨ་ཀྱཱ་ཀྱཱ་ལགས་ཀྱང་དེ་དང་གཅིག་མཚུངས་ཆག་ཡོད། ཁོང་ལ་དངོས་སུ་ཁྲིམས་ཐག་མ་བཅད་གོང་ནས་དུས་ཡུན་ཟླ་བ་ལྔ་ལྷག་ཙམ་བཀག་ཉར་བྱས་ཡོད་པར་བརྟེན་། དོན་དངོས་ཐོག་ཁོང་གིས་བཙོན་ཁང་ནང་མི་ལོ་དྲུག་ཙམ་བཙོན་འཇུག་དང་སྡུག་སྦྱོང་མྱངས་ཡོད།