ཧུའུ་ཅིན་ཐའོ་ཡིས་ཞི་ཅིང་ཕིང་ལ་སྲིད་དབང་རྩིས་སྤྲོད་བྱས་རྗེས་ཀྱི་འདས་པའི་ལོ་ངོ་དགུ་ཙམ་གྱི་རིང་རྒྱ་ནག་དེ་ཚོགས་པ་གཅིག་གིས་སྲིད་དབང་སྒེར་འཛིན་བྱེད་པའི་ལམ་ལུགས་དེར་འགྱུར་ལྡོག་གང་ཡང་སོང་མེད་ཀྱང། ཞི་ཅིང་ཕིང་གི་འཛིན་སྐྱོང་བྱེད་ཕྱོགས་དང་འབྲེལ་བའི་གནད་དོན་ཁ་ཤས་ཀྱི་ཐད་འགྱུར་བྱུང་ཡོད་པ་སྟེ། བོད་ཀྱི་ལས་དོན་འབྲེལ་བའི་ཐོད་ནས་བཤད་ན། ཧུའུ་ཅིན་ཐའོ་སྲིད་འཛིན་བྱེད་རིང་གྱི་ལོ་བཅུ་ལྷག་ཙམ་གྱི་རིང་ལོ་ལྟར་འཚོགས་བཞིན་པའི་རྒྱ་ནག་རྒྱལ་ཡོངས་ཀྱི་ཚོགས་འདུ་གཉིས་ཀྱི་སྐབས། བོད་ཀྱི་འཐུས་མི་ཚོགས་པའི་ཚོགས་ཆུང་ཁག་བགོས་ཀྱི་གྲོས་བསྡུར་ནང་ལོ་ལྟར་མཉམ་བཞུགས་བྱས་ཡོད་ཅིང། ཧུའུ་ཅིན་ཐའོ་ཡི་ཁྱོན་བསྡོམས་བོད་ལྗོངས་འཐུས་མིའི་ཚོགས་ཆུང་ཁག་བགོས་ཀྱི་གྲོས་བསྡུར་ནང་ཐེངས་ ༢༠ ཙམ་མཉམ་བཞུགས་བྱས་ཡོད། དེ་ནི་རྒྱ་ནག་ལོ་རྒྱུས་ཀྱི་ཐོག་རྒྱལ་ཁབ་ཀྱི་སྲིད་འཛིན་ཞིག་གིས་ས་གནས་སམ་མངའ་སྡེ་གཅིག་གི་ལས་དོན་ཚོགས་འདུའི་ཐོག་མཉམ་བཞུགས་བྱེད་ཚད་མང་ཤོས་དང་གཏམ་བཤད་མང་ཤོས་ཀྱི་གྲས་ཤིག་ཆགས་ཡོད། ཞིང་ཅིང་ཕིང་རྒྱ་ནག་གིས་སྲིད་འཛིན་ཆགས་ནས་འདས་པའི་མི་ལོ་དགུ་ག་ཙམ་གྱི་རིང་བོད་ལྗོངས་འཐུས་མིའི་ཚོགས་ཆུང་ཁག་བགོས་ཀྱི་གྲོས་བསྡུར་ནང་ཐེངས་གཅིག་ལས་མཉམ་བཞུགས་བྱས་མེད། ཡིན་ནའང། ཞི་ཅིང་ཞི་ཅིང་གིས་འདས་པའི་ལོ་ངོ་དེ་དག་གི་རིང་མི་དམངས་བཅིངས་འགྲོལ་དམག་གི་ཚོགས་ཆུང་ཁག་བགོས་ཀྱི་གྲོས་བསྡུར་ནང་ཐེངས་བརྒྱད་མཉམ་བཞུགས་བྱས་ཡོད། གསལ་པོར་བཤད་ན་ལོ་ལྟར་འཚོགས་བཞིན་པའི་རྒྱལ་ཡོངས་ཚོགས་འདུ་གཉིས་ཀྱི་སྐབས་བཅིངས་འགྲོལ་དམག་གི་གྲོས་བསྡུར་ནང་རྟག་པར་མཉམ་བཞུགས་བྱེད་ཀྱི་ཡོད། དེའི་ཐོག་ནས་ཞི་ཅིང་ཕིང་གིས་རྒྱ་ནག་གི་དམག་ཤུགས་ཡར་རྒྱས་ལ་དོ་སྣང་དང་ཧ་ཅང་མཐོང་ཆེན་བྱེད་ཀྱི་ཡོད་པ་གསལ་པོར་མཚོན་ཡོད། སྤྱི་ལོ་ ༢༠༠༢ ལོར་ཧུའུ་ཅིན་ཐའོ་རྒྱ་ནག་གི་སྲིད་འཛིན་བྱས་ཏེ་སྤྱི་ལོ་ ༢༠༡༢ ལོར་གྱི་ལོ་བཅུའི་རིང་གི་བོད་རྒྱའི་འབྲེལ་བའི་འཕེལ་རིམ་ལ་བལྟས་ན། དེའི་རིང་བོད་རྒྱ་འབྲེལ་མོལ་གྱི་རིམ་པ་མང་ཤོས་ཀྱི་གྲས་ཤིག་དང་། གཞིས་བྱེས་འབྲེལ་བའི་ཐད་ནས་བཤད་ན་བོད་ནས་བཙན་བྱོལ་དུ་ཡོང་མཁན་གྲངས་ཚད་མཐོ་ཤོས་ཀྱི་དུས་སྐབས་ཅིག་ཆགས་ཡོད་། ཡིན་ནའང། ཞི་ཅིང་ཕིང་རྒྱ་ནག་གི་སྲིད་འཛིན་ཆགས་ནས་ད་བར་འབྲེལ་མོལ་གྱི་རིམ་པ་གཅིག་ཀྱང་བྱུང་མེད་ལ། གཞིས་བྱེས་གཉིས་ཀྱི་འགྲོ་འོངས་རིམ་པ་ཡང་དུས་དེ་ནས་བཟུང་འཚམས་ཆད་ཡོད།
ཧུའུ་ཅིན་ཐའོ་སྲིད་འཛིན་བྱེད་རིང་དབུས་ཆབ་སྲིད་ཅུས་ཀྱི་རྒྱུན་ལས་མི་དགུ་ཡོད་པ་དང། དེའི་ནང་ནས་མང་ཆེ་བ་ནི་ཅང་ཙེ་མིན་གྱི་ཕྱོགས་གཏོགས་འབའ་ཞིག་ཡིན་པ་དང། ཁོ་ཚོ་ཕྱོགས་གཅིག་ལ་བསྒྲིལ་དུས་ཧུའུ་ཅིན་ཐའོ་ཡིས་དབང་ཤུགས་ཇི་ཙམ་སྤྱད་ཀྱང་ནུས་པ་ཐོན་རྒྱུ་ཅི་ཡང་མེད། དེ་དང་བསྡུར་ན་ད་ལྟ་ཞི་ཅིང་ཕིང་ནི་མའོ་ཙེ་ཏུང་ལྟ་བུའི་གོང་མའི་ནང་གི་གོང་མ་ལྟ་བུ་ཆགས་ཡོད་པས་དེ་ལ་ཁ་གཏད་བྱེད་མཁན་གྱི་སྟོབས་ཤུགས་ཧ་ལམ་མེད། ཡིན་ནའང། ཧུའུ་ཅིན་ཐའོ་ཡིས་ལོ་བཅུ་ཚན་གཅིག་གི་སྲིད་འཛིན་བྱེད་རིང་བོད་ཐོག་འཛིན་པའི་སྲིད་ཇུས་དང། ཞིང་ཅིང་ཕིང་གིས་འདས་པའི་ལོ་ངོ་བདུན་གྱི་རིང་བོད་ལ་འཛིན་པའི་སྲིད་ཇུས་ཀྱི་ཐད་ལ་བལྟས་ན། གནས་ཚུལ་འགའ་ཤས་ཐད་ང་ཚོས་བསམ་བློ་གཏོང་དགོས་པ་མང་པོ་ཡོད་པ་སྟེ། ཧུའུ་ཅིན་ཐའོ་ཡིས་གཙོ་སྐྱོང་བྱས་པའི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པའི་ཐོག་ཧུའུ་ཡིས་བོད་ལྗོངས་ལས་དོན་གྱི་ཐབ་བྱུས་ཀྱི་དམིགས་ས་ནི། ཀྲུང་གོའི་ཁྱད་ཆོས་ལྡན་པ་དང་བོད་ཀྱི་དམིགས་བསལ་གྱི་ཁྱད་ཆོས་ལྡན་པའི་ཡར་རྒྱས་ཀྱི་ལམ་བུ་གཏོད་དགོས་ཞེས་ནན་བཤད་བྱས་ཡོད། རིག་ལམ་དེ་ནི་སྐབས་དེའི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པའི་ཐོག་གི་སྲིད་ཇུས་དང་ཐབ་བྱུས་གསར་པ་ཞིག་ཆགས་ཡོད། བོད་ཀྱི་དམིགས་བསལ་གྱི་ཁྱད་ཆོས་ཞེས་པ་དེར་གཞུང་ཕྱོགས་ནས་ཕྱིར་བསྒྲགས་བྱས་པའི་ཧུའུ་ཅིན་ཐའོ་ཡི་གཏམ་བཤད་ནང་གསལ་པོ་འཁོད་མེད་ཀྱང། དེ་མིན་གཞུང་འབྲེལ་གྱི་རིག་གཅིག་མཁས་པ་དང་འབྲེལ་ཡོད་མཁོ་འཁྲིད་ལས་བྱེད་པའི་གཏམ་བཤད་དང་རྩོམ་ཡིག་མང་པོའི་ནང་ཐེངས་དེའི་སྲིད་ཇུས་དང་ཐབས་བྱུས་ཀྱི་ཚིག་དུམ་འགྲེལ་བརྗོད་བྱས་པ་ཡང་ཡང་མཐོང་རྒྱུ་ཡོད།
ཡིན་ནའང། ཞིང་ཅིང་ཕིང་སྲིད་འཛིན་ཆགས་རྗེས་བོད་ཀྱི་དམིགས་བསལ་གྱི་ཁྱད་ཆོས་ལྡན་པའི་ཡར་རྒྱས་ཀྱི་ལམ་བུ་ཞེས་པའི་སྲིད་ཇུས་དེ་རིམ་བཞིན་ཁུ་སིམ་དུ་གྱུར་བ་དང། སྤྱི་ལོ་ ༢༠༡༣ ལོའི་རྒྱལ་ཡོངས་མི་དམངས་འཐུས་མི་ཚོགས་ཆེན་གྱི་བོད་ལྗོངས་འཐུས་མི་ཚོགས་པའི་གྲོས་བསྡུར་ནང་ཞི་ཅིང་ཕིང་ཐེངས་དང་པོར་མཉམ་བཞུགས་བྱས་པ་དང། སྐབས་དེར་ཞི་ཅིང་ཕིང་གིས་སྐད་ཆ་གསར་པ་ཞིག་བཤད་ཡོད་པ་སྟེ། རྒྱལ་ཁབ་སྐྱོང་བར་སྔོན་ལ་མཐའ་འཚམས་སྐྱོང་དགོས་པ་དང། མཐའ་མཚམས་སྐྱོང་བར་སྔོན་ལ་བོད་ལྗོངས་བརྟན་ལྷིང་ཡོང་བ་བྱེད་དགོས་ཞེས་ནན་བརྗོད་བྱས་ཡོད། ཞི་ཅིང་ཕིང་གི་ཐབ་བྱུས་དང་སྲིད་ཇུས་དེ་སྤྱི་ལོ་ ༢༠༡༥ ལོར་སྐོང་འཚོགས་བྱས་པའི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་དྲུག་པའི་གཙོ་གནད་དུ་གྱུར་བ་དང་ཆབས་ཅིག་བོད་ཀྱི་དམིགས་བསལ་གྱི་ཁྱད་ཆོས་ལྡན་པ་ཞེས་པའི་ཧུའུ་ཅིན་ཐའོ་ཡི་སྲིད་ཇུས་དེ་དག་ཧ་ལམ་འཚམས་འཇོག་བྱས་ཡོད་ལ།དུས་དེ་ནས་བཟུང་བོད་ཀྱི་དམིགས་བསལ་གྱི་ཁྱད་ཆོས་ཞེས་པའི་ཐ་སྙད་དེ་གཞུང་འབྲེལ་གྱི་གསར་འགྱུར་ཁག་གི་ནང་དུའང་དེ་ཙམ་གོ་རྒྱུ་མེད། ཧུའུ་ཡིས་གཙོ་སྐྱོང་བྱས་པའི་བཞུགས་མོལ་ཚོགས་འདུ་ཐེངས་ལྔ་པའི་ཐོག་བོད་ཀྱི་སྐད་ཡིག་དང་བོད་ཡིག་པར་སྐྲུན་ལས་དོན་ཤུགས་སྣོན་རྒྱག་སྐོར་ཀྱང་བཤད་ཡོད་ཀྱང་།ཞི་ཅིང་ཕིང་གིས་གཙོ་སྐྱོང་བྱས་པའི་ཚོགས་འདུ་ཐེངས་དྲུག་པའི་ཐོག་བོད་ཀྱི་སྲོལ་རྒྱུན་གྱི་རིག་གནས་དང་བོད་ཡིག་གི་དཔེ་དེབ་པར་སྐྲུན་བྱེད་དགོས་ཞེས་པའི་ཡིག་འབྲུ་ཚིག་གཅིག་ཀྱང་མཐོང་རྒྱུ་མེད༌།བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པ་དེ་ཉིན་གྲངས་གསུམ་ཉིང་སྐོང་འཚོགས་བྱས་པ་དང།ཐེངས་དྲུག་པ་གཉིས་གྲངས་གཉིས་མ་གཏོགས་སྐོང་འཚོགས་བྱས་མེད།
སྤྱི་ལོ་ ༢༠༡༧ ལོ་དང་སྤྱི་ལོ་ ༢༠༡༩ ལོའི་རྒྱལ་ཡོངས་སྲིད་ཀྱི་ཀྲུའུ་གཞིའི་ཁག་སོ་སོའི་ལས་དོན་སྙན་སྒྲོན་ལ་བལྟས་ན། སྤྱི་ལོ་ ༢༠༡༧ ལོའི་སྲིད་ཀྱི་ཀྲའུ་གཞི་ཡུས་ཀྲང་གི་སྲིད་གྲོས་ལས་དོན་སྙན་སྒྲོན་ནང་གྲངས་ཉུང་མི་རིགས་ཟེར་བའི་ཚིག་དེ་ཐེངས་ ༡༠ བེད་སྤྱོད་བྱས་ཡོད་པ་དང། སྤྱི་ལོ་ ༢༠༡༩ ལོའི་སྲིད་གྲོས་ཀྱི་ཀྲའུ་གཞི་དབང་ཡང་གི་སྲིད་གྲོས་ལས་དོན་སྙན་སྒྲོན་ནང་གྲངས་ཉུང་མི་རིགས་ཟེར་བའི་ཚིག་དེ་ཐེངས་ ༡ མ་གཏོགས་་བེད་སྤྱོད་བྱས་མེད། གནད་དོན་དེའི་ཐོག་ནས་སྲིད་གྲོས་ཀྱི་ལས་ཁའི་ཁྱབ་ཁོངས་ནང་གྲངས་ཉུང་མི་རིགས་ཀྱི་ལས་དོན་དེ་གནས་བབ་དམའ་རུ་ཕྱིནཡོད། རྒྱ་ནག་སྤྱི་ཡོངས་ཀྱི་ཐོག་ནས་བལྟས་ན། སྤྱི་ལོ་ ༢༠༠༨ ལོའི་རྒྱལ་ཡོངས་མི་དམངས་འཐུས་མི་ཚོགས་ཆེན་ཐོག་སྲིད་བློན་ཝན་ཅཱ་པའོ་ཡི་སྲིད་གཞུང་ལས་དོན་སྙན་སྒྲོན་ནང་དམངས་གཙོ་ཞེས་པའི་ཚིག་དེ་ཐེངས་ ༢༢ བཤད་ཡོད་པ་དང། དེའི་ནང་དམངས་གཙོའི་སྒོ་ནས་འོས་བསྡུ་བྱེད་པ་དང་། དམངས་གཙོའི་སྒོ་ནས་ཁྲིམས་སྐྱོང་དགོས་ལུགས་ནན་བཤད་བྱས་ཡོད། ཡིན་ནའང། སྤྱི་ལོ་ ༢༠༡༩ ལོའི་རྒྱལ་ཡོངས་མི་དམངས་འཐུས་མི་ཚོགས་ཆེན་ཐོག་སྲིད་བློན་ལི་ཁཱ་ཆང་གི་སྲིད་གཞུང་ལས་དོན་སྙན་སྒྲོན་ནང་དམངས་གཙོ་ཞེས་པའི་ཐ་སྙད་དེ་ཐེངས་ ༥ མ་གཏོགས་བཤད་མེད་ལ། དམངས་གཙོའི་འོས་བསྡུ་དང་དམངས་གཙོའི་ཁྲིམས་སྐྱོང་ཞེས་པ་དེ་ཡང་བཤད་མེད། ཝན་ཅཱ་པའོ་ཡི་སྲིད་གཞུང་ལས་དོན་སྙན་སྒྲོན་ནང་ཧུའུ་ཅིན་ཐའོ་ཡི་མིང་ཐེངས་ ༣ མ་གཏོགས་དྲངས་མེད་པ་དང།འདི་ལོ་ལི་ཁཱ་ཆང་གི་སྲིད་གཞུང་ལས་དོན་སྙན་སྒྲོན་ནང་ཞི་ཅིང་ཕིང་གི་མིང་ཐེངས་ ༡༣ དྲངས་ནས་བསྟོད་བསྔགས་བཏང་ཡོད། སྤྱི་ལོ་ ༢༠༡༢ ལོའི་ཏང་གི་རྒྱལ་ཡོངས་ཚོགས་ཆེན་ཐེངས་བཅོ་རྒྱད་པའི་ཐོག་ཧུའུ་ཅིན་ཐའོ་ཡི་ལས་དོན་སྙན་སྒྲོན་ནང་དམངས་གཙོ་ཞེས་པའི་ཚིག་དེ་ཐེངས་ ༧༠ ཙམ་བཤད་ཡོད་པ་དང། སྤྱི་ལོ་ ༢༠༡༧ ལོར་ཏང་གི་རྒྱལ་ཡོངས་ཚོགས་ཆེན་བཅུ་དགུའི་ཐོག་ཞི་ཅིང་ཕིང་གི་ལས་དོན་སྙན་སྒྲོན་ནང་དམངས་གཙོ་ཞེས་པ་དེ་ཚིག་ ༥༤ བར་ཉུང་དུ་ཕྱིན་ཡོད།
