རྒྱལ་སྤྱིའི་རྒྱུད་ལམ་ཁག་ནས་གནས་ཚུལ་ཐོན་པར་གཞིགས་ན། ཉེ་ལམ་རྒྱ་ནག་གཞུང་གིས་ཧོང་ཀོང་དུ་རྟེན་གཞི་བྱས་པའི་ཀུ་ཤུ་ཚགས་པར་གྱི་འགན་འཛིན་དང་རྩོམ་འབྲི་པ་སོགས་འབྲེལ་ཡོད་མི་སྣ་ལྔ་ཙམ་འཇུ་བཟུང་བྱས་ཡོད་ཅིང། ཀུ་ཤུ་ཚགས་པར་ནི་ཧོང་ཀོང་ནང་སྐད་གྲགས་ཆེ་བའི་གསར་ཁང་ཞིག་དང་ཧོང་ཀོང་མི་མང་གིས་དགའ་མོས་དང་རྒྱབ་སྐྱོར་ཆེན་པོ་བྱེད་པའི་གསར་ཁང་ཞིག་རེད། དེ་གའི་རྩོམ་འབྲི་པ་དང་འགན་འཛིན་སོགས་ས་གནས་རྒྱ་ནག་གཞུང་གིས་འཇུ་བཟུང་བྱས་པའི་གནས་ཚུལ་ཐོན་མ་ཐག་ཧོང་ཀོང་མི་མང་གིས་གསར་ཁང་དེའི་ཚགས་པར་མངག་ཉོ་བྱེད་པའི་ཚད་གཞི་དེ་རྒྱུན་གཏན་ལས་ལྡབ་ལྔ་ཙམ་གྱིས་མང་བ་བྱུང་ཡོད། དེ་ནི་དམངས་གཙོ་དང་རང་དབང་ལ་དགའ་བའི་ཧོང་ཀོང་མི་མང་གིས་ཀུ་ཤུ་གསར་ཁང་ལ་རྒྱབ་སྐྱོར་མཚོན་པའི་རྣམ་འགྱུར་གསལ་སྟོན་མཛད་པ་ཞིག་རེད་ལ། ཧོང་ཀོང་མི་མང་གིས་དམངས་གཙོ་དང་རང་དབང་ལ་བཅངས་པའི་འགྱུར་མེད་ཀྱི་དམ་བཅའ་ཡང་མཚོན་པར་བྱས་ཡོད། དེ་ཡང་ཧོང་ཀོང་ས་གནས་ཉེན་རྟོག་པས་ཀུ་ཤུ་གསར་ཁང་གི་ལས་ཁུངས་ནང་གླུ་བུར་དུ་འཛུལ་ནས་འགན་འཛིན་སོགས་འབྲེལ་ཡོད་མི་སྣ་ལྔ་ཙམ་འཇུ་བཟུང་བྱས་པ་མ་ཟད། གསར་ཁང་དེའི་མ་རྩ་་ཨ་སྒོར་ས་ཡ་གཉིས་དང་འབུམ་གསུམ་ལྷག་ཙམ་བཀག་བསྡོམས་བྱས་ཡོད་པ་མ་ཟད། ད་དུང་གསར་འགྱུར་རྒྱུ་ཆའི་གསོག་སྣོད་འབོར་ཆེན་ཞིག་ཀྱང་བཙན་འཕྲོགས་བྱས་ཡོད་འདུག གནས་ཚུལ་དེའི་ཐོག་ནས་རྒྱ་ནག་གཞུང་གིས་ཉེ་ལམ་ཧོང་ཀོང་ཐོག་དམ་བསྒྲགས་བྱེད་ཆེད་རྒྱལ་ཁབ་བདེ་འཇགས་ཀྱི་ཁྲིམས་ལུགས་ཟེར་བ་དེ་ཕྱོགས་ཡོངས་ནས་ལག་ལེན་བྱེད་བཞིན་པའི་མཚོན་རྟགས་ཡིན་པའི་ངོས་འཛིན་བྱེད་ཀྱི་ཡོད་པ་རེད།
ཧོང་ཀོང་ནང་གི་དམངས་གཙོའི་ལས་འགུལ་རིམ་བཞིན་ཞི་འཇམ་དུ་སོང་བ་དང་ཆབས་ཅིག་དམངས་གཙོ་དོན་གཉེར་བ་དང་ལས་འགུལ་བ་མང་པོ་ཞིག་རྒྱ་ནག་གཞུང་གིས་འཇུ་བཟུང་བྱེད་བཞིན་པ་དང་། འགའ་ཞིག་ནི་ ཕྱི་རྒྱལ་དུ་བྲོས་བྱོལ་དུ་སོང་བ་རེད། ཧོང་ཀོང་གི་གྲོང་མི་ཞིག་ནས་བརྗོད་དོན་ཧོང་ཀོང་ནང་དྲང་བདེན་མ་ཡིན་པའི་གནས་ཚུལ་མང་པོ་ཞིག་བྱུང་བ་དང་། འདི་ལྟ་བུའི་གནས་ཚུལ་མུ་མཐུད་ནས་ལྷག་ཏུ་བཅུག་ན་གཏན་ནས་འགྲིགས་ཐབས་མེད། ཚགས་པར་མངགས་ཉོ་བྱ་རྒྱུ་དེ་ནི་ང་ཚོས་བྱེད་ཐུབ་པའི་བྱ་བ་གཅིག་པུ་དེ་རེད། ཁྲིམས་ལུགས་ཀྱིས་ང་ཚོ་སྲུང་སྐྱོབ་མ་བྱས་ཚེ་ང་ཚོས་རང་གིས་རང་ཉིད་སྲུང་སྐྱོབ་བྱེད་དགོས་ཀྱི་རེད་ཅེས་བརྗོད་ཡོད། ཀུ་ཤུ་གསར་ཁང་ནི་སྤྱི་ལོ་༡༩༩༥ ལོར་ཧོང་ཀོང་གི་ཕྱུག་བདག་ཇི་མའེ་ལའེ་ཡིས་གསར་འཛུགས་བྱས་པ་ཞིག་རེད། སྐབས་དེ་དུས་ལོ་གཉིས་ཀྱི་རྗེས་ཧོང་ཀོང་དེ་རྒྱ་ནག་གིས་དངོས་སུ་རྩིས་ལེན་བྱེད་ཀྱི་ཡོད་པར་བརྟེན། མི་མང་པོ་ཞིག་གི་བསམ་བློའི་ནང་ཧོང་ཀོང་རྒྱ་ནག་གིས་རྩིས་ལེན་བྱས་རྗེས་ཧོང་ཀོང་ནང་ཡོད་པའི་དམངས་གཙོའི་ཐོབ་ཐང་དང་རང་དབང་རྣམས་རིམ་བཞིན་མེད་པར་འགྱུར་སྲིད་པའི་སེམས་ཁྲལ་བྱུང་ནས་གསར་འཛུགས་བྱས་པ་ཞིག་རེད། ཕྱུག་བདག་ཁོང་ནི་ཧོང་ཀོང་དམངས་གཙོའི་སྣེ་འཁྲིད་མཁན་དང་། རྒྱལ་སྤྱིའི་སྟེང་ཤུགས་རྐྱེན་ཆེན་པོ་ཡོད་པའི་མི་སྣ་ཞིག་ཀྱང་རེད། ཡིན་ནའང། སྔ་ལོའི་ཟླ་བ་ ༨ པའི་ནང་རྒྱ་ནག་གཞུང་གིས་ཁོང་གིས་ཕྱི་རྒྱལ་ཁབ་དང་ངན་འབྲེལ་བྱས་པ་དང་། ཁྲིམས་འགལ་གྱི་འདུ་འཛོམས་ནང་མཉམ་བཞུགས་བྱས་པའི་ཉེས་མིང་འོག་ནས་འཛིན་བཟུང་བྱས་པ་རེད།