རྒྱ་ནག་གཞུང་འབྲེལ་གྱི་རྒྱུད་ལམ་ཁང་གི་ནང་གནས་ཚུལ་སྤེལ་བར་གཞིགས་ན། སྤྱི་ལོ་ ༢༠༢༡ ཟླ་ ༦ ཚེས་ ༢༧ ཉིན་། ཞི་ཅིང་ཕིང་གི་ཁྲིམས་སྐྱོང་གི་བསམ་བློའི་ཞིབ་འཇུག་ལྟེ་གནས་ཁང་ཟེར་བ་དངོས་སུ་དབུ་བརྙེས་པའི་ཚོགས་ཆེན་སྐོང་འཚོགས་བྱས་ཡོད། གནས་ཚུལ་དེའི་ཐོག་ནས་ཞི་ཅིང་ཕིང་གི་ཆབ་སྲིད་ཀྱི་དབང་ཆ་དེ་ལོ་རྒྱུས་ཐོག་གི་ཚད་གཞི་མཐོ་ཤོས་སུ་སླེབས་ཡོད་པ་མཚོན་ཡོད་ཅིང། ཧུའུ་ཅིན་ཐའོ་དང་ཅང་ཙེ་མིན་གྱི་དུས་སྐབས་སུ་དབང་ཚད་དེ་འདྲ་ཞིག་གཏན་ནས་ཐོབ་མྱོང་མེད་ལ། ཐ་ན་རྒྱ་ནག་གི་བསྒྱུར་བཅོས་སྒོ་དབྱེའི་སྤྱི་ཁྱབ་ཇུས་བཀོད་ཆེན་པོར་གྲགས་པའི་ཏེང་ཞའོ་ཧྤེང་ལའང་དབང་ཆ་དེ་འདྲ་ཞིག་གཏན་ནས་ཐོབ་མྱོག་མེད། དེར་བརྟེན། ཞི་ཅིང་ཕིང་གི་དབང་ཚད་དེ་མི་སྣ་དེ་ལས་རྒལ་ནས་ལོ་རྒྱུས་ཀྱི་རྩེ་མོར་གསོན་ཐུབ་པར་ངོས་འཛིན་བྱེད་ཀྱི་ཡོད་པ་རེད། ཞི་ཅིང་ཕིང་གི་ཁྲིམས་སྐྱོང་གི་བསམ་བློ་ཞེས་པའི་ཚིག་གྲོས་འདི་རྒྱ་ནག་གི་ཆབ་སྲིད་ཀྱི་འགྲོ་སྟངས་དང་རིན་ཐང་གི་བལྟ་བའི་ཐོག་ནས་བཤད་ན། ཧ་ཅང་གལ་གནདཅན་ཞིག་ཆགས་ཡོད་པ་སྟེ། རྒྱ་ནག་གི་རྒྱལ་ཁབ་ཀྱི་རྩ་ཁྲིམས་དང་། བཅའ་ཁྲིམས། དེ་བཞིན་ཁྲིམས་སྲོལ་དང་སྒྲིག་སྲོལ་སྣ་ཚོགས་པ་ཚང་མས་ཞི་ཅིང་ཕིང་གི་སློབ་སྟོན་བསམ་བློ་དེ་རྩ་བར་བཟུང་དགོས་པའི་དོན་ཡིན་པས་དེ་ནི་དབང་ཚད་ཧ་ཅང་ཆེན་པོ་ཞིག་རེད།
ད་ཐེངས་ཀྱི་ཚོགས་ཚོགས་ཆེན་ཐོག་རྒྱ་ནག་དབུས་ཆབ་སྲིད་ཅུས་ཀྱི་ཨུ་ཡོན་དང་རྒྱལ་ཡོངས་མི་དམངས་འཐུས་མི་ཚོགས་ཆེན་གྱི་ཨུ་ཡོན་ཀྲང་གཞོན་པ་ཝང་ཀྲན་ཆེད་བཅར་གྱིས་གཏམ་བཤད་སྤེལ་ཡོད་ཅིང། དེ་ཡང་ཝང་ཀྲན་གྱིས་ནན་བརྗོད་བྱས་དོན། ཞི་ཅིང་ཕིང་གི་ཁྲིམས་སྐྱོང་གི་བསམ་བློ་ནི་མར་ཁེ་རིང་ལུགས་ཀྱི་ཁྲིམས་སྐྱོང་རིག་པའི་གཞུང་ལུགས་ཀྲུང་གོ་ཅན་དུ་འགྱུར་བའི་གྲུབ་འབྲས་གསར་ཤོས་ཡིན་པ་དང་། ཀྲུང་གོ་གུང་ཁྲན་ཏང་དབུ་བརྙེས་ནས་ལོ་ངོ་བརྒྱ་འཁོར་གྲགས་ཡོད་པའི་སྐབས་སུ་ཞི་ཅིང་ཕིང་གི་ཁྲིམས་སྐྱོང་གི་བསམ་བློའི་ཞིབ་འཇུག་ལྟེ་གནས་འཛུགས་བྱས་པར་དོན་སྙིང་ཧ་ཅང་ཆེན་པོ་ཡོད་པས། ཁྲིམས་ལུགས་རིག་པ་དང་བཅའ་ཁྲིམས་ལས་དོན་པ་ཚང་མས་ཞི་ཅིང་ཕིང་གི་ཁྲིམས་སྐྱོང་གི་དགོངས་པར་སློབ་སྦྱོང་ཞིབ་འཇུག་དང་དྲིལ་བསྒྲགས་ལག་ལེན་བྱེད་དགོས་པའི་ནན་བརྗོད་བྱས་ཡོད་པ་རེད། ཝང་གིས་མུ་མཐུད་ནས་ནན་བཤད་བྱས་དོན། ཆབ་སྲིད་ཀྱི་ས་ཚིག་དང་ལྟེ་གནས་ཀྱི་ལས་འགན་ལ་དམིགས་ནས་ཞི་ཅིང་ཕིང་གི་ཁྲིམས་སྐྱོང་གི་བསམ་བློར་སློབ་སྦྱོང་དང་། ཞིབ་འཇུག དྲིལ་བསྒྲགས་བཅས་བྱེད་པའི་སྟེགས་བུ་གལ་ཆེན་དང་རྟེན་གཞི་གལ་ཆེན་ཞིག་བསྐྲུན་དགོས། ཞི་ཅིང་ཕིང་གི་ཁྲིམས་སྐྱོང་གི་བསམ་བློ་དང་རིག་པའི་གཞུང་ལུགས་ཀྱི་མ་ལག་དང་། རིག་གཞུང་ཚན་ཁག་གི་མ་ལག སློབ་དེབ་ཀྱི་མ་ལག་བཅས་ལ་ཞིབ་འཇུག་གཏིང་ཟབ་བྱས་ཏེ་སྤུས་ཚད་མཐོ་བའི་ཞིབ་འཇུག་གི་གྲུབ་འབྲས་གཏོད་དགོས་ལུགས་ནན་བརྗོད་བྱས་ཡོད། ད་ཐེངས་ཀྱི་ཚོགས་འདུའི་ཐོག་རྒྱ་ནག་གི་དབུས་སྲིད་ཁྲིམས་ལྷན་ཁང་དང་།ཁྲིམས་ཁང་།ཁྲིམས་ཞིབ་ལས་དོན་པའི་འབྲེལ་ཡོད་ཀྱི་འགོ་འཁྲིད་སོགས་མི་སྣ་འབོར་ཆེན་ཞིག་ཆེད་བཅར་བྱས་ཏེ་གཏམ་བཤད་སྤེལ་ཡོད།
སྤྱི་ལོ་ ༢༠༡༧ ལོར་སྐོང་འཚོགས་བྱས་པའི་རྒྱ་ནག་དམར་ཤོག་གི་རྒྱལ་ཚོགས་ཆེན་བཅུ་དགུའི་ཐོག་དུས་རབས་གསར་པའི་ཞི་ཅིང་ཕིང་གི་བསམ་བློ་ཞེས་པ་དེ་དམར་ཤོག་ཚོགས་པའི་སྒྲིག་ཡིག་ནང་དངོས་སུ་བཀོད་ནས་ཡུན་རིང་མཐའ་འཁྱོངས་བྱེད་དགོས་པའི་རིག་པའི་གཞུང་ལུགས་སུ་གཏན་འཁེལ་བྱས་ཏེ་།རྒྱལ་ཡོངས་གང་སར་སློབ་སྦྱོང་དང་དྲིལ་བསྒྲགས་བྱེད་བཞིན་པ་མ་ཟད།སློབ་གྲྭ་ཆེ་འབྲིང་ཆུང་གསུམ་གྱི་སློབ་གཞིའི་ནང་དུའང་ཚད་གཞི་འདྲ་མིན་གྱི་ཐོག་ནས་སློབ་ཚན་དུ་བཀོད་སྒྲིག་བྱས་ཡོད།
