འདི་ཟླའི་ཚེས་ ༡ ཉིན་རྒྱ་ནག་དམར་ཤོག་ཚོགས་པ་གསར་འཛུགས་བྱས་ཏེ་ལོ་བརྒྱ་འཁོར་བའི་མཛད་སྒོ་འཚོགས་ཡོད། གཤམ་གྱི་པར་རིས་འདི་གཉིས་ནི་འདི་ཟླའི་ཚེས་ ༡ ཉིན་རྒྱ་ནག་དམར་ཤོག་ཚོགས་པ་གསར་འཛུགས་བྱས་ཏེ་ལོ་བརྒྱ་འཁོར་བའི་མཛད་སྒོའི་སྐབས་རེད། སྐབས་དེའི་མཛད་སྒོར་ཉམས་ཞིབ་བྱེད་མཁན་ཞིག་ཡིན་ཚེ་མཛད་སྒོ་དེ་གཅིག་པུའི་ཐོག་ནས་རྒྱ་ནག་གི་གནས་སྟངས་མང་པོར་རྒྱུད་ལོན་ཐུབ་པ་མ་ཟད། ལྷག་པར་དུ་དམར་ཤོག་ཚོགས་པ་ནང་ཁུལ་གྱི་གནས་ཚུལ་མང་པོར་ཡང་རྒྱུད་ལོན་བྱེད་ཐུབ་ངེས་རེད། གཤམ་གསལ་པར་རིས་དེ་གཉིས་ནི་ད་ཐེངས་ཀྱི་མཛད་སྒོའི་སྐབས་ཀྱི་ཟུར་ཞིག་རེད། པར་རིས་དེ་གཉིས་ལས་ད་ལྟའི་རྒྱ་ནག་གི་གནས་སྟངས་སྤྱི་དང་ལྷག་པར་དུ་དམར་ཤོག་ཚོགས་པའི་ནང་ཁུལ་གྱི་འགལ་བ་དང་འཐབ་རྩོད་ཀྱི་རྣམ་པར་བསམ་བློ་བསྐྱར་གཏོང་བྱེད་པའི་ཁ་ཕྱོགས་གསལ་སྟོན་ཐུབ་ངེས་རེད། ཚང་མས་རྒྱུད་མངའ་ཡོད་པའི་རྒྱ་ནག་གི་སྲིད་བློན་ཟུར་པ་ཝན་ཅཱ་པའོ་ཡི་རྒྱབ་ཏུ་ཡ་མཚན་ཆེ་བའི་མི་ཞིག་སླེབས་ཡོད། ཝན་ཅཱ་པའོ་ཡིས་དེའི་མདུན་དུ་ངོ་གདོང་སྐྱུར་མོ་ཞིག་བསྟན་ནས་བསྡད་ཡོད། མི་དེ་གནས་དེར་ཇི་ལྟར་བྱས་ཏེ་སླེབས་པ་རེད་དམ། རྒྱུ་མཚན་གང་གི་ཆ་ནས་མི་དེ་ཡ་མཚན་ཅན་ཞིག་རེད་དམ། ཞེ་ན། ཁོ་པ་ནི་གནས་ཡོད་མི་སྣ་དང་དབང་ཆ་ཡོད་པ་དེ་འདྲ་གཏན་ནས་མ་རེད་ལ། ལོ་ངོ་འགའ་ཤས་གོང་ཁོ་པའི་གཅེན་པོས་ཞི་ཅིང་ཕིང་གི་སྲིད་དབང་གཡོ་འཕྲོགས་བྱ་རྒྱུའི་བྱ་སྤྱོད་ཡང་སྤེལ་ཡོད། གསལ་པོར་བཤད་ན་མི་དེ་ནི་རྒྱ་ནག་དབུས་ཆབ་སྲིད་ཅུས་ཀྱི་ཨུ་ཡོན་དང་ཁྲུང་ཆིང་དམར་ཤོག་ཚོགས་པའི་དྲུང་ཆེ་ཟུར་པ་སྦོའོ་ཤི་ལའེ་ཡི་གཅུང་པོ་པོའོ་ཤི་ཁྲང་ཟེར་བ་དེ་རེད། སྦོའོ་ཤི་ཁྲང་གི་གཅེན་པོ་སྦོའོ་ཤི་ལའེ་ཡིས་ཚབས་ཆེའི་སྒྲིག་འགལ་ཁྲིམས་འགལ་བྱས་པའི་ཉེར་ལེན་ལས་ཏང་ནང་གི་དབང་ཆ་དང་སྐྱིད་སྡུག་ཡོད་ཚད་ནས་ཕྱིར་འབུད་བྱས་པ་དང་སྒེར་གྱི་རྒྱུ་ནོར་གཞུང་བཞེས་བཏང་ནས་ཚེ་བཙོན་གྱི་ཁྲིམས་ཐག་བཅད་ཡོད། དེ་ནི་ཞི་ཅིང་ཕིང་གིས་རྒྱ་ནག་གི་ཏང་སྲིད་དམག་གསུམ་གྱི་དབང་ཆ་བཟུང་ནས་ལོ་གཅིག་ཙམ་གྱི་རྗེས་སུ་རེད། སྦོའོ་ཤི་ལའེ་ནི་ཞི་ཅིང་ཕིང་དང་འདྲ་བར་དམར་པོའི་ཁྱིམ་རྒྱུད་ཀྱི་བུ་ཕྲུག་ཡིན་པ་མ་ཟད། རྒྱུུན་གཏན་གྱི་འགྲོ་ལུགས་ལྟར་ན་མི་རབས་ལྔ་པའི་དབང་འཛིན་པའི་རེ་བ་ཆེན་པོ་ཡོད་པའི་གལ་ཆེའི་མི་སྣ་ཞིག་རེད། དེ་ལྟར་ནའང་ཁོ་པར་ཚེ་བཙོན་གྱི་ཁྲིམས་ཆད་དེ་འདྲ་ཞིག་ཕོག་དགོས་དོན་ཅི་ཡིན་ནམ། དོན་རྐྱེན་དེའི་སྔ་ཕྱིའི་རྒྱུད་རིམ་ཡོད་ཚད་བཤད་དགོས་ཚེ་ཉིན་བཞག་མང་པོ་འགོར་བའི་ཆབ་སྲིད་ཀྱི་དོན་རྐྱེན་ཆེན་པོ་ཞིག་རེད། མཐར་གཏུགས་ནས་བཤད་ན་སྦོའོ་ཤི་ལའེ་དང་སྐབས་དེའི་དབུས་ཆབ་སྲིད་ཅུས་ཀྱི་རྒྱུན་ལས་དང་སྲིད་ཁྲིམས་ལྷན་ཁང་གི་དྲུང་ཆེ་ཡིན་པའི་ཀྲའུ་ཡུང་ཁོང་སོགས་མཉམ་འབྲེལ་བྱས་ཏེ། ཞི་ཅིང་ཕིང་ལྐོག་གསོད་གཏོང་རྒྱུ་དང་ལི་ཁཱ་ཆང་གནས་དབྱུག་བཏང་ནས་དྲག་ཆས་སྲིད་བསྒྱུར་བྱ་རྒྱུའི་འཆར་གཞི་བཀོད་ཡོད་པས་རྒྱ་ནག་དམར་ཤོག་ཚོགས་པའི་ངོས་ནས་བཤད་ན་དེ་ནི་ཁྱོད་ཤི་ང་གསོན་གྱི་འཐབ་རྩོད་ཆེན་པོ་ཞིག་ལོས་ཡིན།
གནས་ཚུལ་དེ་འདྲའི་འོག་སྦོའོ་ཤི་ལའེ་ཡི་ཁྱིམ་རྒྱུད་དེ་དམར་ཤོག་ཚོགས་པར་ཉེན་ཁ་ཆེ་བའི་ཁྱིམ་རྒྱུད་ཅིག་ཆགས་པ་དང་། སྐབས་དེར་ལས་འཁྱུར་རྒན་ཡོལ་གྱི་དུས་ལ་སླེབས་གྲབས་ཡོད་པའི་སྲིད་བློན་ཝན་ཅཱ་པའོ་ཡིས་ལོ་དེའི་རྒྱ་ནག་གི་རྒྱལ་ཡོངས་མི་དམངས་འཐུས་མི་ཚོགས་ཆེན་གྱི་ཐོག་ཧ་ཅང་ནན་པོའི་ཐོག་ནས་འགྲེལ་བརྗོད་འདི་འདྲ་ཞིག་བྱས་ཡོད་པ་སྟེ། ཁྲུང་ཆིང་དམར་ཤོག་ཚོགས་པ་དང་གྲོང་ཁྱེར་སྲིད་གཞུང་གིས་ངེས་པར་དུ་ད་ཐེངས་ཀྱི་དོན་རྐྱེན་བསླབ་བྱར་བླངས་ཏེ་ལོ་རྒྱུས་ཐོག་གི་སྐྱོ་གར་བསྐྱར་ལོག་བྱ་རྒྱུར་དོག་གཟོན་བྱེད་དགོས་ཞེས་ཉེན་བརྡ་བཏང་བ་དང། ཝན་ཅཱ་པོའི་ཡི་སྐད་ཆ་དེ་བཤད་ནས་ཉིན་ཤས་སོང་རྗེས་སྦོའོ་ཤི་ལའེ་གཞུང་ཕྱོགས་ནས་བཀག་ཉར་དྲི་གཅོད་བྱེད་པའི་འགོ་ཚུགས་པ་རེད། སྐབས་དེའི་དོན་རྐྱེན་དེའི་ནང་ཝན་ཅཱ་པའོ་ཡིས་ནུས་པ་ཧ་ཅང་ཆེན་པོ་བཏོན་ཡོད་པར་ངོས་འཛིན་བྱེད་ཀྱི་ཡོད། ད་ཐེངས་ལོ་བརྒྱའི་དུས་ཆེན་གྱི་མཛད་སྒོའི་སྡེང་ཆའི་ཐོག་མི་སྣ་རིགས་གཉིས་ཡོད་པ་སྟེ། གཅིག་ནི་ཏང་དང་རྒྱལ་ཁབ་ཀྱི་གནས་ཡོད་མི་སྣ་དང། རིགས་གཞན་ཞིག་ནི་ལས་འཁྱུར་རྒན་ཡོལ་ཞུས་ཟིན་པའི་གནས་ཡོད་མི་སྣ་བཅས་རེད། ཡིན་ནའང། སྦོའོ་ཤི་ཁྲང་ནི་ད་ལྟའི་སྐབས་ཏང་དང་རྒྱལ་ཁབ་ཀྱི་གནས་ཡོད་མི་སྣ་མ་རེད་ལ། ལས་ཟུར་གྱི་ཁྱབ་ཁོངས་དེ་བས་ཀྱང་མ་རེད། དེ་ལས་ཀྱང་ཁ་གསལ་ཙམ་ཞིག་བཤད་ན་ཞི་ཅིང་ཕིང་གི་སྲིད་དབང་བཟུང་བའི་དུས་སྐབས་དེའི་རིང་ཁོ་ཚོའི་ཁྱིམ་རྒྱུད་ནི་དམར་ཤོག་ཚོགས་པའི་ཁ་གཏད་དུ་ལངས་མཁན་ཞིག་ལ་ངོས་འཛིན་བྱས་ཡོད་པས། དེ་ལྟ་བུའི་ཁྱིམ་རྒྱུད་ཀྱི་མི་སྣ་ཞིག་དེ་རིང་གལ་གནད་ཆེ་བའི་མཛད་སྒོའི་ཐོག་གདན་ཞུ་དང་། དེའི་ནང་ནས་ཀྱང་གནས་ཡོད་མི་སྣའི་བཞུགས་གྲལ་གཉིས་པར་བཞག་ཡོད་པ་མ་ཟད། དེ་ཡང་སྲིད་བློན་ཝཱན་ཅ་པའོ་ཡི་རྒྱབ་ངོས་སུ་འཇོག་དགོས་དོན་ཅི་ཞིག་ཡིན་ནམ། སྦོའོ་ཤི་ལའེ་ཡི་དོན་རྐྱེན་ཐག་གཅོད་ཀྱི་རྒྱུད་རིམ་ནང་ཝན་ཅཱ་པའོ་ནི་གདོང་མཆོངས་ཀྱི་མི་སྣ་རེད་ཅེས་བརྗོད་ཀྱི་ཡོད་པ་དང། མ་ཟད་ཟླ་ཤས་གོང་ཝན་ཅཱ་པའོ་ཡིས་རང་གི་ཨ་མར་རྗེས་དྲན་བྱེད་པའི་རྩོམ་ཡིག་དེ་རྒྱ་ནག་གི་དྲ་གནས་ཐོག་ཡོངས་སུ་བཀག་བསྡོམས་བྱས་ཡོད་པ་མ་ཟད། ཝན་ཅཱ་པའོ་ཡི་རྩོམ་ཡིག་ནང་ད་ལྟའི་རྒྱ་ནག་གི་ཆབ་སྲིད་ཀྱི་གནས་སྟངས་ཐད་སྐད་ཆའི་ནང་གི་སྐད་ཆ་ཟེར་བ་ལྟ་གོ་རྒྱུ་ཅན་གྱི་ཚིག་མཚོན་མང་པོ་བཏབ་ཡོད་པས། འཕེལ་ཕྱོགས་འདི་དག་ལ་བལྟས་ན་ཝན་ཅཱ་པའོ་དང་ཞི་ཅིང་ཕིང་གི་དབར་ལའང་འགལ་བ་ཡོད་པ་གསལ་པོ་མཐོང་ཐུབ། འབྲེལ་བ་ཡོད་པའི་རྒྱུ་རྐྱེན་གཞན་ཞིག་ནི་སྲིད་འཛིན་ཟུར་པ་ཅང་ཙེ་མིན་སླེབས་མེད་པ་དེ་རེད། ཉེ་བའི་འཆར་ཅང་ཙེ་མིན་གྱི་གཟུགས་གཞི་བདེ་ཐང་མེད་པའི་གནས་ཚུལ་མང་པོ་ཐོན་ཡོད་ཀྱང་ཁ་གསལ་ཞིག་ད་བར་ཤེས་རྟོགས་བྱུང་མེད། ཅང་ཙེ་མིན་ད་ལྟ་ལོ་ན་ ༩༥ ཡིན་པས་ལོ་ནའི་དབང་གིས་སླེབས་མ་ཐུབ་པར་ངོས་འཛིན་བྱས་ཚེ་། ཁོ་པ་ལས་ལོ་ན་མཐོ་བའི་རྒྱུན་ཟུར་སུང་ཕིང་མཛད་སྒོར་སླེབས་ཡོད་ཅིང།སུང་ཕིང་ད་ལྟ་ལོ་ན་ ༡༠༤ ལ་སླེབས་ཡོད། གཤམ་གསལ་པར་རིས་གཉིས་པའི་ནང་མིག་ཤེལ་ནག་པོ་རྒྱབ་པ་དེ་སུང་ཕིང་རེད། ཡང་སྙིང་ཅང་ཙེ་མིན་མཛད་སྒོར་སླེབས་མེད་པ་དེ་གཟུགས་གཞིའི་གནས་སྟངས་དབང་གིས་རེད་དམ། ཡང་ན་དེར་དཔོག་དཀའ་བའི་རྒྱུ་རྐྱེན་གཞན་དག་ཡོད་དམ།
