ཉེ་ལམ་ཞི་ཅིང་ཕིང་གིས་ཐུན་མོང་ཕྱུག་འགྱུར་དང་རྒྱུ་ནོར་མཉམ་སྤྱོད་ཟེར་བའི་སྲིད་ཇུས་གསར་པ་ཞིག་འགོ་འཛུགས་བྱ་རྒྱུའི་གྲ་སྒྲིག་བྱེད་བཞིན་ཡོད་པ་དང་། སྲིད་ཇུས་དེ་ནི་དེ་སྔ་ཏེང་ཞའོ་ཧྤེང་གིས་སྔོན་ལ་མི་ཁག་གཅིག་དང་ས་ཁུལ་ཁུལ་ཁག་གཅིག་ཕྱུག་པོ་ཆག་པ་བྱེད་དགོས་པ་དང་། དེ་རྗེས་ཕྱུག་པོ་ཆགས་ཟིན་པའི་ས་ཁུལ་དང་མི་དེ་དག་གིས་དབུལ་ཕོངས་ཀྱི་ས་ཁུལ་དང་མི་མང་རྒྱབ་སྐྱོར་བྱས་ཏེ་ཐུན་མོང་ཐོག་ཕྱུག་པོ་ཆགས་པ་བྱེད་དགོས་པའི་རིག་ལམ་ཞིག་བཏོན་ཡོད། ཞི་ཅིང་ཕིང་གི་སྲིད་ཇུས་དེ་གཅིག་བྱས་ན་ཏེང་ཞའོ་ཕེང་གི་རིག་ལམ་དེ་གཞི་རྩར་བཟུང་བ་ཞིག་ཀྱང་ཡིན་སྲིད། ད་ལྟ་རྒྱ་ནག་གི་དཔལ་འབྱོར་དང་སྲིད་ཇུས་ཐད་ཉམས་ཞིབ་བྱེད་མཁན་དང་། ལྷག་པར་དུ་ཁེ་ལས་ཆེ་འབྲིང་མང་པོ་ཞིག་གིས་ཉེ་ལམ་ཞི་ཅིང་ཕིང་གིས་བཏོན་པའི་ཐུན་མོང་ཕྱུག་འགྱུར་ཞེས་པའི་སྲིད་ཇུས་གསར་པ་ཞིག་དེར་འཇིགས་སྣང་ཧ་ཅང་ཆེན་པོ་བྱེད་ཀྱི་ཡོད་པ་མ་ཟད། ཐ་ན་བཟོ་ཚོང་ཁང་དང་ཁེ་ལས་ཆེན་པོ་འགའ་ཞིག་གིས་སྲིད་ཇུས་དེ་དག་དངོས་སུ་ལག་ལེན་མ་བྱས་གོང་ནས་དེར་རྒྱབ་སྐྱོར་དང་བརྩི་བཀུར་བྱེད་ཀྱི་ཡོད་པའི་རྣམ་པ་མ་བསྟན་ཀ་མེད་ཆགས་ཀྱི་ཡོད་པའི་གནས་ཚུལ་ལ་བལྟས་ན། ཐུན་མོང་ཕྱུག་འགྱུར་ཞེས་པའི་སྲིད་ཇུས་དེ་ནི་མའོ་ཙེ་ཏུང་གི་དུས་སྐབས་སུ་ས་ཞིང་བཅོས་བསྒྱུར་དང་མི་དམངས་སྤྱི་ཁང་ཞེས་པའི་ཆབ་སྲིད་ཀྱི་ལས་འགུལ་ལྟ་བུ་ཆགས་སྲིད་པའི་ཚོད་དཔག་བྱེད་མཁན་ཡོད། མ་ཞིང་ལོ་རབས་ལྔ་བཅུ་པའི་ནང་རྒྱ་ནག་ནང་ས་ཞིང་བཅོས་བསྒྱུར་བྱས་ཏེ་ཞིང་པ་དུང་ཕྱུག་མར་པོར་སྔར་མེད་ས་ཞིང་གི་གོ་སྐལ་ཐོབ་ཡོད་ཀྱང་། བཅོས་བསྒྱུར་དེའི་བྱ་རིམ་གྱི་ནང་ལུགས་མཐུན་དང་ཁྲིམས་མཐུན་ཞིག་གཏན་ནས་བྱུང་མེད་པ་དང་། ས་ཞིང་བཅོས་བསྒྱུར་བྱེད་པའི་ཞོར་ལ་ས་ཞིང་དང་དཔལ་འབྱོར་གྱི་ཆ་རྐྱེན་ལེགས་པོ་ཡོད་པའི་མི་དྲག་དང་ཁྱིམ་རྒྱུད་རྣམས་འཐབ་རྩོད་བྱ་ཡུལ་ཆགས་ནས་འཛིན་བཟུང་དང་། བཙོན་འཇུག་དང་། ཐ་ན་མི་མང་པོ་ཞིག་གི་ཚེ་སྲོག་ཤོར་བའི་གནས་ཚུལ་ཡང་བྱུང་ཡོད། གནས་ཚུལ་དེ་འདྲའི་འོག་ད་ཐེངས་ཞི་ཅིང་ཕིང་གི་སྲིད་ཇུས་གསར་པ་དེས་ད་ལྟའི་སྐབས་རྒྱ་ནག་ནང་གི་ཁེ་ལས་དང་བཟོ་ཚོང་ཁང་ཆེ་ཁག་མང་པོ་ཞིག་ལ་གནོན་ཤུགས་ཆེན་པོ་སླེབས་བཞིན་ཡོད་པ་དང་། རང་འགུལ་གྱི་ཐོག་ནས་སྲིད་ཇུས་དེར་དང་ལེན་མི་བྱེད་ཀ་མེད་ལྟ་བུའི་གནས་ཚུལ་ཐོན་མུས་རེད། དཔེར་ན། དྲ་ཐོག་ཚོང་དོན་ཁེ་ལས་ཆེ་གྲས་ཨ་ལི་པཱ་པཱ་ཡིས་ད་ཐེངས་ཞི་ཅིང་ཕིང་གི་སྲིད་ཇུས་དེར་མོས་མཐུན་དང་རྒྱབ་སྐྱོར་ཡོད་པའི་རྣམ་འགྱུར་གྱི་ཐོག་ནས་རྒྱ་སྒོར་ཐེར་འབུམ་བརྒྱ་ཞལ་འདེབས་རྒྱག་རྒྱུའི་ཁས་ལེན་བྱས་ཡོད་དང་། དེའི་ཐད་རྒྱ་ནག་གཞུང་གིས་ཆེད་དུ་མ་དངུལ་བརྗེ་ཚོང་ཁང་ཞིག་གསར་འཛུགས་བྱས་ཏེ་ཁེ་ལས་ཆུང་འབྲིང་ཁག་ལ་རྒྱབ་སྐྱོར་དང་ཁེ་ཕན་ཐོབ་ཐབས་བྱ་རྒྱུའི་དོན་དུ་ཡིན་ལུགས་འགྲེལ་བརྗོད་བྱེད་ཀྱི་ཡོད་པ་རེད། ཡིན་ནའང། རྒྱ་ནག་གི་དཔལ་འབྱོར་དང་སྲིད་ཇུས་ལ་ཉམས་ཞིབ་བྱེད་མཁན་ཚོས་ཞི་ཅིང་ཕིང་གིས་ད་ཐེངས་ཀྱི་སྲིད་ཇུས་གསར་པ་དེས་འདས་པའི་མི་ལོ་བཞི་བཅུ་ལྷག་ཙམ་གྱི་རིང་རྒྱ་ནག་ནང་དཔལ་འབྱོར་ཡར་རྒྱས་ཆེན་པོ་བྱུང་ཡོད་ཀྱང། དབུལ་ཕྱུག་གི་ཧེ་བག་སྔར་བས་ཇེ་ཆེར་སོང་ཡོད་པ་དང་། བཟོ་ཚོང་ཁང་དང་ཁེ་ལས་ཆེ་གྲས་འགའ་ཞིག་ཧ་ཅང་ཕྱུག་པོར་ཆགས་ནས་མ་རྩ་འི་བདག་པོར་འགྱུར་ཡོད་ནའང། ཁེ་ལས་དང་བཟོ་ཚོང་ཁང་ཆུང་འབྲིང་མང་པོ་ཞིག་འཕེལ་མེད་རང་སོར་ལུས་པ་དང་། ཐ་ན་འགའ་ཤས་མ་རྩ་སྡིབ་པ་དང་སྒོ་རྒྱག་དགོས་པའི་གནས་ལ་ཐུགས་ནས་བཟོ་པ་ས་ཡང་མང་པོ་ལས་ཀ་ཤོར་ཡོད་སྟབས། གནད་དོན་དེ་རྒྱ་ནག་གཞུང་འབྲེལ་གྱིས་ལས་སླ་པོའི་ཐོག་ནས་ཐག་གཅོད་དང་གདོང་ལེན་བྱེད་ཐུབ་ཀྱི་མེད་པ་དང་། ཉིན་འགྱངས་བཞག་འགྱངས་སོང་ཚེ་དེ་དག་གིས་རྒྱ་ནག་གཞུང་ལ་ངོ་རྒོལ་དང་གྱེན་ལོག་བྱས་ཏེ་དམར་ཤོག་ཚོགས་པའི་སྲིད་དབང་ལ་ཉེན་ཁ་ཧ་ཅང་ཆེན་པོ་ཆགས་ཀྱི་ཡོད། སྤྱི་ལོ་ ༡༩༨༩ ལོའི་དྲུག་བཞིའི་དམངས་གཙོའི་ལས་འགུལ་གྱི་སྐབས་རྒྱ་ནག་གཞུང་གིས་བཟོ་པ་ཚོར་མ་འོངས་པར་མདུན་ལམ་ཆེན་པོ་ཡོད་ ལུགས་ཁྱབ་བསྒྲགས་ཤུགས་ཆེན་བྱས་པའི་རྐྱེན་གྱིས་སྐབས་དེའི་སློབ་མའི་དམངས་གཙོའི་ལས་འགུལ་ལ་བཟོ་པའི་ཕྱོགས་གཏོགས་ནས་དེ་ཙམ་རྒྱབ་སྐྱོར་མ་བྱས་སྟབས། རྒྱ་ནག་གཞུང་གིས་དེར་དྲག་གནོན་བྱེད་པའི་གདེང་ཚོད་སླེབས་པ་རེད་ཅེས་ངོས་འཛིན་བྱེད་མཁན་ཡོད། ཕྱོགས་གཞན་ཞིག་ནས་ཉེ་ལམ་ལོ་ཤས་ནང་རྒྱ་ནག་དང་ཨ་རིའི་དབར་ལ་ཚོང་འབྲེལ་དམག་འཐབ་ཀྱིས་རྐྱེན་པས་རྒྱ་ནག་རྒྱ་ནག་གི་དཔལ་འབྱོར་ལ་ཉམས་རྒུད་ཆེན་པོ་བྱུང་ཡོད་སྟབས། དཔལ་འབྱོར་སླར་གསོ་བྱ་རྒྱུ་དེ་སྲིད་གཞུང་གཅིག་པོས་གདོང་ལེན་བྱེད་ཐུབ་ཀྱི་མེད་སྟབས། མཐར་ཐུན་མོང་པྱུག་འགྱུར་དང་། བགོ་འགྲེམས་གསུམ་པ། རྒྱུ་ནོར་མཉམ་སྤྱོད་ཅེས་པའི་ཐབས་བྱུས་ལ་བརྟེན་ནས་མདའ་གཅིག་གིས་གླ་བ་གཉིས་གསོད་པའི་དཔེ་དང་གཅིག་མཚུངས་རེད་ཅེས་བརྗོད་ཀྱི་ཡོད། དེར་བརྟེན་ཞི་ཅིང་ཕིང་གི་ད་ཐེངས་ཀྱི་སྲིད་ཇུས་དེའི་མདུན་ངོས་ནས་བལྟས་ཚེ་དབུལ་ཕྱུག་སྙོམས་པའི་སྲིད་ཇུས་ཤིག་ཡིན་ཀྱང། དེའི་རྒྱབ་ངོས་སུ་ནན་ཏན་གྱིས་ཞིབ་འཇུག་བྱས་ཚེ་ཐོག་མར་རྒྱ་ནག་མི་མང་ད་དུང་ཡང་ཕྱུག་པོ་ཆགས་མེད་པ་མ་ཟད། དབུལ་ཕྱུག་གི་ཧེ་བག་སྔར་བས་ཇེ་ཞན་ཇེ་སྡུག་ཏུ་འགྲོ་བཞིན་པ་དང་། བཟོ་ཚོང་ཆེ་ཁག་འགའ་ཤས་རྒྱུ་ནོར་གྱི་བདག་པོ་ཆགས་ཡོད་པ་དང་། ཁེ་ལས་དང་བཟོ་ཚོང་ཁང་ཆུང་འབྲིང་རྣམས་ནི་བུ་ལོན་གྱི་འདམ་རྫབ་ནང་ཐིམ་ནས་ལུས་ཡོད་པ་གསལ་པོ་ཤེས་ཐུབ།། མ་ཟད་སྔ་ལོ་རྒྱ་ནག་གི་ལོ་གཅིག་དུས་གཅིག་གི་རྒྱལ་ཡོངས་ཚོགས་འདུ་གཉིས་ཀྱི་ཐོག་སྲིད་བློན་ལི་ཁཱ་ཆང་གིས་རྒྱ་ནག་མི་མང་དུང་པྱུར་དྲུག་ལྷག་ཙམ་གྱི་ཟླ་རེའི་ཆ་སྙོམས་ཡོང་འབབ་ནི་རྒྱ་སྒོར་ ༡༠༠༠ ཙམ་ལས་ཟིན་གྱི་མེད་པས། ཡར་རྒྱས་འབྲིང་ཙམ་ཡིན་པའི་གྲོང་ཁྱེར་ཞིག་ལ་ཆ་མཚོན་ན་ཡོང་འབབ་དེ་ལྟ་བུས་ཟླ་རེའི་ཁང་གླ་ཡང་འདང་གི་མ་རེད་ཅེས་ནན་བརྗོད་བྱས་ཡོད། དུས་སྐབས་དེར་ལི་ཁཱ་ཆང་ཧྲན་ཏུང་སོགས་སུ་ཕྱོགས་བསྐྱོད་བྱེད་སྐབས་སྲང་ལམ་དང་ཐང་ཁྲོམ་འདོན་མཁན་ཚོར་དངོས་སུ་ཐུག་འཕྲད་བྱས་པ་མ་ཟད། ཐང་ཁྲོམ་དཔལ་འབྱོར་ལ་བརྩི་འཇོག་དགོས་ལུགས་ནན་བརྗོད་བྱས་པར། དེ་མ་ཐག་པེ་ཅིང་གྲོང་ཁྱེར་ཉིན་རེའི་ཚགས་པར་ཐོག་ཐང་ཁྲོམ་དཔལ་འབྱོར་ནི་མི་གཙང་བ་དང་རྣམ་པ་མི་མཛེས་པ་ཞིག་ཡིན་ལུགས་ནན་བརྗོད་བྱས་ཏེ་ལི་ཁཱ་ཆང་ལ་དངོས་སུ་དགག་པ་བརྒྱབ་ཡོད། མི་རིང་བར་པེ་ཅིང་གྲོང་ཁུལ་གྱི་སྲང་ལམ་ནང་ཅ་དངོས་ཙག་ཙིག་ཚོང་མཁན་རྣམས་དངོས་སུ་བཀག་བསྡོམས་བྱེད་པའི་འགོ་འཛུགས་བྱས་ཏེ་སྲིད་བློན་ལི་ཁཱ་ཆང་གི་ཁ་གཏད་དུ་ལངས་ཡོད། སྲིད་བློན་ལི་ཁཱ་ཆང་གི་ཁ་གཏད་དུ་ལངས་ནས་ཐག་གཅོད་དེ་འདྲ་བྱེད་ནུས་པའི་གནས་བབ་ཡོད་མཁན་མི་གཅིག་ལས་མེད་པ་དེ་ནི་ཞི་ཅིང་ཕིང་རེད། གནས་ཚུལ་འདི་རིགས་བལྟས་ཚེ་རྒྱ་ནག་ནང་གཞུང་དང་མི་མང་གི་དབར་ལ་འགལ་བ་ཡོད་པ་མ་ཟད། དམར་ཚོགས་པ་དང་སྲིད་གཞུང་དབར་ལའང་འགལ་ཆེན་པོ་ཡོད་པ་དང། ཐ་ན་སྲིད་འཛིན་དང་སྲིད་བློན་དབར་ལའང་འགལ་བ་ཡོད་པ་ར་སྤྲོད་བྱེད་ཐུབ།
