རྒྱ་ནག་ནི་འཛམ་གླིང་ཐོག་དཔལ་འབྱོར་སྟོབས་ཤུགས་ཨང་གཉིས་པ་ཡིན་ཀྱང་། ད་ལྟའི་སྐབས་རྒྱ་ནག་གི་ཞིང་ཆེན་དང་གྲོང་ཁྱེར་མང་པོའི་ནང་གློག་གི་ནུས་པ་འདང་ངེས་མེད་པ་མ་ཟད། ཉིན་ཤས་ནས་བཟུང་གྲོང་ཁྱེར་དང་ས་གནས་མང་པོར་གློག་ཤར་གཏོང་བྱེད་འཚམས་ཆད་ཡོད། དེ་ཡང་རྒྱལ་སྤྱིའི་རྒྱུད་ལམ་ཁག་གི་ནང་གནས་ཚུལ་ཐོན་པར་གཞིགས་ན་། ཟླ་བ་འདིའི་ནང་རྒྱ་ནག་གི་ཅང་སུའུ་ཞིང་ཆེན་དང་། ཀྲེ་ཅང་ཞིང་ཆེན། ཀོང་ཏུང་ཞིང་ཚེན། ཨན་ཧུའི་ཞིང་ཆེན། ཧྲང་ཧའེ་གྲོང་ཁྱེར་སོགས་ས་གནས་དང་གྲོང་ཁྱེར་མང་པོར་གློག་གི་ནུས་པ་འདང་ངེས་མེད་པའི་གནས་སྟངས་འོག་ཚོག་བཟོ་ཚོང་ཁང་དང་། ཁེ་ལས་རྒྱ་སྟོང་མང་པོ་སྒོ་རྒྱག་དགོས་པའི་གནས་ཚུལ་སྤེལ་འདུག དེ་ཡང་མི་རྣམས་ལ་བསྡོམས་ཚིག་ཞིག་ཐོབ་ཡོད་པ་སྟེ། དེང་རབས་ཀྱི་སྤྱི་ཚོགས་ནང་གློག་མེད་ན་ཅི་ཡང་མེད་ཅེས་བརྗོད་སྲོལ་ཡོད་པ་ལྟར། དེང་རབས་ཀྱི་སྤྱི་ཚོགས་ནང་གློག་གི་ནུས་པ་དང་དགོས་མཁོ་ནི་རྒྱལ་ཁབ་དར་རྒུད་ཇི་ཡོང་དང་ཐད་ཀར་འབྲེལ་བ་ཡོད་པ་ཞིག་ཆགས་ཡོད། རྒྱ་ནག་ནང་གློག་གི་ནུས་པ་མི་འདང་བའི་དཀའ་ངལ་དེ་ད་ལྟའི་སྐབས་དེ་བས་ཀྱང་མངོན་གསལ་དོད་དུ་འགྲོ་བཞིན་ཡོད་པ་དང་། ཁེ་ལས་དང་བཟོ་ཚོང་ཁང་འགའ་ཤས་འུ་ཐུག་ཐབས་ཟད་ཀྱིས་རྐྱེན་པས་ཐ་ན་ཡང་ལཱ་སྤར་ནས་ལས་ཀ་བྱེད་པའི་གནས་ལ་གྱར་ཡོད། འཛམ་གླིང་དཔལ་འབྱོར་ཨང་རིམ་གཉིས་པ་ཡིན་པའི་རྒྱ་ནག་གི་ངོས་ནས་སྤྱི་ལོ་ ༢༠༡༩ ལོར་ཐོག་རྒྱ་ནག་ཧུའུ་ཧན་གྲོང་ཁྱེར་ནས་ཏོག་དབྱིབས་རིམས་ནད་ཆེད་དེ་ཡུལ་དེའི་དཔལ་འབྱོར་ལ་ཉམས་ཆགས་ཆེན་པོ་བྱུང་བ་མ་ཟད། དེའི་ཐོག་ཨ་རྒྱའི་ ཚོག་དམག་གིས་རྐྱེན་པས་མུ་གེའི་སྒང་ལ་ཟླ་ལྷག་ཞེས་པའི་དཔེ་ལྟར་གྱུར་ནས་དཔལ་འབྱོར་རྒྱུན་གཏན་རང་བཞིན་གྱི་ཡར་རྒྱས་འགྲོ་རྒྱུར་འགོག་རྐྱེན་དང་བར་ཆད་མང་པོ་འཕྲད་བཞིན་པའི་སྐབས་དེར། ད་ལྟའི་སྐབས་སླར་ཡང་གློག་གི་ནུས་པ་འདང་ངེས་མེད་པའི་དཀའ་ངལ་གྱི་གནོན་ཤུགས་ཆེན་པོ་གསུམ་པ་ཞིག་འཕར་སྣོན་བྱུང་བ་དེས་མ་འོངས་པའི་རྒྱ་ནག་གི་དཔལ་འབྱོར་གནས་སྟངས་དེ་ཇི་འདྲ་ཞིག་ཆག་མིན་ཐད་གཞུང་དམངས་གཉིས་ཀས་སེམས་ཁྲལ་བྱེད་དགོས་པ་ཞིག་ཆགས་ཡོད། དེ་ཡང་རྒྱལ་སྤྱིའི་རྒྱུད་ལམ་ཁག་ནང་གནས་ཚུལ་ཐོན་པར་གཞིགས་ན། ད་ལྟ་རྒྱ་ནག་གི་མ་རྐང་ཁྲོམ་རྭའི་གནས་སྟངས་ལའང་དཀའ་ངལ་གསར་དང་འགལ་བ་གསར་པ་མང་དག་ཞིག་འཕྲད་བཞིན་ཡོད་པར་བརྟེན། མ་འཇོག་བྱེད་མཁན་གྱི་བཟོ་ཚོང་ཁང་དང་ཁེ་ལས་མང་པོས་ཀྱང་རྒྱ་ནག་གི་མ་རྐང་ཁྲོམ་རྭར་ཡིད་ཆེས་བྱེད་པའི་ཚད་གཞི་དེ་ཧ་ཅང་སྐྱོ་པོ་ཆགས་ཡོད་པའི་གནས་ཚུལ་ཐོན་བཞིན་འདུག ད་ལྟ་རྒྱ་ནག་གི་འཕྲུལ་ཆས་དང་འཛུགས་སྐྲུན་གྱི་ཁྱབ་ཁོངས་ཁག་གི་ནང་དཔལ་འབྱོར་གྱི་གནས་སྟངས་ཉམས་ཆགས་འགྲོ་བཞིན་པ་དང་། ལྷག་པར་དུ་གློག་གི་ནུས་པ་འདང་ངེས་མེད་པའི་གནས་སྟངས་འདིས་རྒྱ་ནག་གི་དཔལ་འབྱོར་ཡར་རྒྱས་ཆེ་ཤོས་ཡིན་པའི་ཤར་ལྷོའི་ཁུལ་གྱི་བཟོ་ལས་གྲོང་ཁྱེར་ཆེ་ཁག་གི་བཟོ་ལས་ཐོན་སྐྱེད་བྱེད་པའི་ཚད་གཞི་དམའ་རུ་སོང་ནས་བདུན་ཕྲག་མང་པོ་ཕྱིན་ཟིན་པ་དང་། ཤར་ལྷོའི་མཚོ་རྒྱུད་ས་ཁུལ་གྱི་བཟོ་ལས་གྲོང་ཁྱེར་ཁག་ནི་ལོ་རབས་བརྒྱད་བཅུ་པ་ནས་བཟུང་ཕྱི་པྱོགས་སུ་སྒོ་མོ་ཕྱེ་བ་དང་མ་དངུལ་དང་འགྲོ་སོང་འབོར་ཆེན་བཏང་ནས་རྒྱས་སྐྲུན་བྱས་པ་ཞིག་ཡིན་སྟབས། གྲོང་ཁྱེར་དེ་དག་གི་བཟོ་གྲྭ་དང་བཟོ་ཚོང་ཁང་ཁག་རྒྱུན་གཏན་བཞིན་ཐོན་སྐྱེད་བྱེད་མ་ཐུབ་ཚེ་ས་ཁུལ་དང་གྲོང་ཁྱེར་དེ་དག་ཙམ་མ་ཟད། རྒྱ་ནག་རྒྱལ་ཡོངས་ཀྱི་དཔལ་འབྱོར་ལ་ཤུགས་རྐྱེན་ཧ་ཅང་ངན་པ་ཐེབས་རྒྱུ་ཡིན་པ་སྨོས་མེད། དེ་ཡང་ཏེང་ཞའོ་ཧྤེང་གིས་ཐོག་མར་མི་འགའ་ཤས་དང་ས་ཁུལ་ཁ་ཤས་སྔོན་ལ་ཕྱུག་པོ་ཆགས་པ་བྱེད་དགོས་པའི་སྲིད་ཇུས་གཞིར་བཟུང་ཤར་ལྷོའི་བཟོ་ལས་གྲོང་ཁྱེར་ཁག་ཡར་རྒྱས་དང་འཛུགས་སྐྲུན་བྱས་པ་རེད། དེ་ཡང་ད་ལྟ་རྒྱ་ནག་གིི་ཧ་ཡང་དང་ཨར་འདམ་བཟོ་གྲྭ་མང་པོ་ཞིག་གློག་མི་འདང་བའི་དཀའ་ངལ་གྱིས་རྐྱེན་པས་སྒོ་རྒྱག་དགོས་བྱུང་ཡོད་པ་དང་། ༏ཧ་ཡང་ཐོན་ཚད་རྒྱ་ཆ་༧ ཉུང་དུ་སོང་བ་དང་ཨར་འདམ་ཐོན་ཚད་རྒྱ་ཆ་ ༢༠ ལྷག་ཙམ་ཉུང་དུ་སོང་ཡོད། རིང་པོར་མ་ཐོག་པར་ཤིང་གི་བཟོ་གྲྭ་དང་ཤོག་བུའི་བཟོ་གྲྭ་ཁག་ལའང་དེ་དང་འདྲ་བའི་དཀའ་ངལ་འཕྲད་རྒྱུ་ཡིན་པ། མཛེས་སྤྱོད་དང་། ཁྱིམ་ཆས། སྲན་མའི་རིགས་ཀྱི་བཟོ་གྲྭ་ཁག་ལ་ཆ་མཚོན་ན་ད་ལྟ་ནས་དཀའ་ངལ་འཕྲད་འགོ་ཚུགས་ཟིན་པའི་གནས་ཚུལ་ཐོན་བཞིན་འདུག ཡང་ཉམས་ཞིབ་པ་འགའ་ཤས་ཀྱིས་བརྗོད་སྲོལ་ལ།ད་ཐེངས་རྒྱ་ནག་གི་གྲོང་ཁྱེར་དང་ས་གནས་མང་པོར་གློག་འདང་ངེས་པའི་རྒྱུ་གཞན་ཞིག་ནི་ཏོག་དབྱིབས་རིམས་ནད་འཛམ་གླིང་ཡོངས་ལ་ཁྱབས་རྗེས་རྒྱ་ནག་གི་གློག་གི་ནུས་པ་འབོར་ཆེན་ཞིག་རྒྱལ་ཁབ་གཞན་དག་ལ་བཏང་བར་བརྟེན། རྒྱལ་ནང་གི་མི་མང་རྣམས་ནག་ཁུང་ནང་བསྡད་དགོས་བྱུང་བ་རེད་ཅེས་བརྗོད་ཀྱི་ཡོད། དེ་ནི་བོད་པའི་ཁ་རྒྱུན་ལ་ནང་པ་རྩམ་པ་མེད་ཀྱང་སྒོའུ་ཁུང་རྩམ་རལ་ཡོག་ཡོག་ཞེས་པའི་དཔེ་དང་གཉིས་སུ་མེད་པ་ཞིག་རེད།
