ཉེ་ལམ་རྒྱ་ནག་གཞུང་གིས་རྒྱལ་སྤྱིའི་ཐོག་སླར་ཡང་ཡ་མཚན་ཆེ་བའི་ཁྲང་གཞི་ཞིག་འཁྲབ་སྟོན་བྱས་པ་སྟེ། ལོ་གསུམ་ཙམ་གྱི་གོང་དུ་རྨང་ཝན་ཀྲའུ་ཞེས་པའི་རྒྱ་ནག་གི་བེུད་གཅིག་ཁ་ན་ཀྲའི་ཉེན་རྟོག་པའི་འཛིན་བཟུང་གི་བཀའ་རྒྱའི་འོག་ཚུད་ནས་ད་བར་བཀག་ཉར་བྱས་པ་དང་། ཉེ་ལམ་ཁོ་མོ་གནས་སྐབས་རྒྱ་ནག་ཏུ་ཕྱིར་ལོག་བཏང་ཡོད། ཁོ་མོ་ནི་རྒྱ་ནག་གི་རྒྱལ་ཁབ་རིམ་པའི་འགོ་ཁྲིད་མིན་ལ། ཐ་ན་ས་གནས་ཀྱི་དཔོན་ཆུང་ཞིག་ཀྱང་མ་ཡིན། དེ་ལྟར་ནའང་། ཁོ་མོོར་ཆེད་གཏོང་གནམ་གྲུ་བཏང་ནས་བསུ་བ་ཞུས་པ་མ་ཟད། གནམ་ཐང་དུ་ས་གདན་དམར་པོ་བཏིང་བ་དང་། ལག་ཏུ་འཕྲེད་དར་དང་རྒྱ་མིའི་རྒྱལ་དར་འཁྱེར་བའི་སློབ་ཕྲུག་དང་། གཞུང་ཞབས། མི་མང་འབོར་ཆེན་ཞིག་བསྡུ་སྐོང་གིས་བསུ་བ་ཞུ་རུ་བཅུག་ཡོད། རྒྱ་ནག་ནི་སྒྲིག་སྲོལ་ཧ་ཅང་དམ་པོ་ཡོད་པའི་རྒྱལ་ཁབ་གཅིག་ཡིན་སྟབས། ཆེད་གཏོང་གནམ་གྲུ་དང་ས་གདན་དམར་པོ་བཏིང་ནས་བསུ་བ་ཞུ་བའི་མཛད་སྒོ་ནི་རྒྱལ་ཁབ་གཞན་དག་གི་སྲིད་འཛིན་དང་སྲིད་བློན་སོགས་རྒྱ་ནག་ཏུ་རྒྱལ་དོན་འཚམས་འདྲི་བྱེད་སྐབས་མ་གཏོགས་དེ་འདྲ་བྱེད་སྲོལ་མེད། ཡང་མིན་ན་ཞི་ཅིང་ཕིང་ལྟ་བུ་རྒྱ་ནག་གི་ཞིང་ཆེན་དང་ས་གནས་ཁག་ཏུ་གལ་ཆེའི་དུས་དྲན་ལྟ་བུར་ཆེད་བསྐྱོད་སྐབས་མ་གཏོགས་བཤམས་སྲོལ་མེད། དཔེར་ན། ཉེ་ལམ་བོད་ཞི་བས་བཅིངས་འགྲོལ་བཏང་ནས་ལོ་ངོ་བདུན་འཁོར་བའི་དུས་ཆེན་ཟེར་བའི་སྔ་ནུབ་ཏུ་ཞི་ཅིང་ཕིང་བོད་རང་སྐྱོང་ལྗོངས་སུ་ཆེད་བསྐྱོད་བྱས་པ་དང་། ཞི་ཅིང་ཕིང་ཆེད་བསྐྱོད་བྱ་སའི་ཐོག་མའི་ས་ཚིག་དང་པོ་ཀོང་པོ་ཉིན་ཁྲི་ཁུལ་དུ་ཡིན་སྟབས། དེ་ཉིན་ཉིང་ཁྲིའི་གནམ་ཐང་དུ་ཞི་ཅིང་ཕིང་ལ་ས་གདན་དམར་པོ་བཏིང་བ་དང་། སློབ་ཕྲུག་དང་། ལས་བྱེད། མི་མང་། གྲྭ་བཙུན་སོགས་ཀྱིས་བོད་ལུགས་ཀྱི་ཁྱད་ཚོས་ལྡན་པའི་ཁ་གཏགས་སོགས་འཁྱེར་ནས་ཞི་ཅིང་ཕིང་ལ་བསུ་བ་ཞུ་དགོས་པའི་ཐག་གཅོད་བྱས་ཡོད། ཡིན་ནའང། རྨང་ཝན་ཀྲའུ་ནི་རྒྱ་ནག་གི་རྒྱལ་ཁབ་རིམ་པའི་འགོ་འཁྲིད་མིན་ལ། ས་གནས་ཀྱི་དཔོན་རིགས་ཀྱང་མ་ཡིན་། དེ་ལྟར་ནའང་ཁོ་མོ་རྒྱ་ནག་ཏུ་ཕྱིར་ལོག་བྱས་པར་དེ་ལྟ་བུའི་མཛད་སྒོ་བཤམས་ནས་བསུ་ཞུ་དགོས་དོན་ཅི་ཡིན་ནམ། དེ་ལ་དེང་སྐབས་རྒྱ་ནག་ཐོག་ཉམས་ཞིབ་དང་དཔྱད་བརྗོད་བྱེད་མཁན་མང་པོ་ཞིག་གིས་དེང་སྐབས་རྒྱ་ནག་དེ་ལམ་གསུམ་མདོ་འགག་ལྟ་བུ་ཞིག་ལ་སླེབས་ཡོད་པ་སྟེ། ཕྱོགས་གཅིག་ནས་བལྟས་ན་རྒྱ་ནག་གི་དཔལ་འབྱོར་ལ་ཡར་རྒྱས་ཆེན་པོ་བྱུང་ནས་འཛམ་གླིང་དཔལ་འབྱོར་ཨ་རིམ་གཉིས་པར་སླེབས་ཡོད་པ་མ་ཟད། ཐ་ན་རིང་མིན་ཨ་རི་ལས་ཀྱང་རྣམ་པར་རྒྱལ་ནས་ཨང་དང་པོར་སླེབས་ཐུབ་པའི་རྩོད་ལེན་བྱེད་ཀྱི་ཡོད། ཕྱོགས་གཞན་ཞིག་ནས་རྒྱ་ནག་ནང་དེང་སྐབས་སྔར་མེད་ཀྱི་དཀའ་དང་འཐབ་རྩོད་རང་བཞིན་གྱི་རྩོད་རྙོགས་ཆེན་པོ་ཞིག་ཀྱང་འཕྲད་བཞིན་ཡོད་པ་སྟེ། ཐོག་མར་འདས་པའི་མི་ལོ་བཅུ་ལ་ཉེ་བའི་རིང་ཞི་ཅིང་ཕིང་གིས་ལྐོག་ཟ་རུལ་སུངས་ཀྱི་མིང་ཐོག་ནས་འདས་པའི་ལོ་ངོ་བཞི་བཅུའི་ནང་བྱུང་མྱོང་མེད་པའི་དཔོན་རིགས་མང་པོ་བཙོན་ཁང་དུ་བརྫངས་པ་མ་ཟད། ཁོ་ཚོའི་ཁྱིམ་རྒྱུད་ཀྱི་རྒྱུ་ནོར་ཡོངས་རྫོགས་གཞུང་བཞེས་བཏང་ཡོད་པས། ཞི་ཅིང་ཕིང་ལ་ཐོག་མར་དམར་ཤོག་ཚོགས་པའི་ནང་དུ་དགྲ་ཁ་གཏད་ཀྱི་སྟོབས་ཤུགས་ཆེན་པོ་ཞིག་ཆགས་ཡོད་པ་དང་། ཐ་ན་ཉེ་བའི་ལོ་ཤས་ནང་ཞི་ཅིང་ཕིང་ལྐོག་གསོད་གཏོང་རྒྱུའི་དོན་རྐྱེན་ཡང་ཐེངས་མང་ལྷག་ཡོད། དེ་དང་ཆབས་ཅིག་ཨ་རྒྱའི་ཚོང་དམག་གིས་རྐྱེན་པས་རྒྱ་ནག་གི་དཔལ་འབྱོར་ལ་ཉམས་ཉེས་ཆེན་པོ་བྱུང་བ་དང་། དེའི་ཐོག་ཏོག་དབྱིབས་རིམས་ནད་ཀྱིས་རྐྱེན་པས་རྒྱལ་སྤྱིའི་སྤྱི་ཚོགས་ནས་རྒྱ་ནག་ལ་དེ་བས་ཀྱང་བལྟ་སྟངས་སྡུག་ཏུ་འགྲོ་བཞིན་པ་སོགས་དཀའ་ངལ་དང་འགལ་རྐྱེན་མང་པོ་དུས་གཅིག་ལ་ཐོན་བཞིན་ཡོད། འདི་ལྟ་བུའི་ཕྱི་ནང་གི་རྒྱུ་རྐྱེན་མང་པོར་བརྟེན་ནས་རྒྱལ་ནང་མི་མང་གིས་ངོ་རྒོལ་ཞིག་བྱས་ཚེ་རྒྱ་ནག་དམར་ཤོག་ཚོགས་པའི་སྲིད་དབང་ལ་ཉེན་ཁ་ཆེན་པོ་ཞིག་འཕྲད་བཞིན་ཡོད། གནས་སྟངས་འདི་འདྲའི་སྐབས་རྒྱ་ནག་གཞུང་གིས་ཆེན་པོ་ཆུང་ཆུང་བཟོ་དང་། ཆུང་ཆུང་ཆེན་པོ་བཟོ་བའི་ཐབས་བྱུས་ལ་བརྟེན་ནས་མི་མང་གི་བསམ་བློ་རྨོངས་སུ་བཅུག་ནས་མི་རིགས་རིང་ལུགས་ཀྱི་བསམ་བློ་རོ་ལངས་རྒྱག་ཏུ་འཇུག་གི་ཡོད། ཆེན་པོ་ཆུང་ཆུང་ཞེས་པ་ནི་རྒྱ་ནག་གཞུང་གི་སྐྱོན་ཆ་དང་ནོར་འཁྲུལ་ཆེན་པོ་དེ་ཚོ་ཆུང་ཆུང་བཟོ་བ་དང་། ཐ་ན་རྩ་བ་མེད་པ་བཟོས་ཏེ་སུས་ཀྱང་ཤེས་རྟོགས་མི་ཐུབ་པ་བཟོ་དང་། གྲུབ་འབྲས་ཆུང་ཆུང་ཞིག་ཡོད་ཚེ་དེ་ཆེན་པོ་བཟོས་ནས་ས་བསྒྲགས་གནམ་བསྒྲགས་བྱས་ཏེ་རྒྱ་ནག་གཞུང་དེ་ཧ་ཅང་རླབས་ཆེན་ཡིན་པ་དང་། ད་ལྟའི་སྐབས་རྒྱ་ནག་དེ་ཧ་ལམ་འཛམ་གླིང་ཡོངས་ལ་བཀོད་པ་གཏོང་མཁན་ཆགས་ཡོད་པ་ལྟ་བུའི་སྣང་སྙན་ཞིག་སྐྲུན་ནས་མི་མང་གིས་བསམ་བློ་དེ་གཞུང་གི་ཕྱོགས་སུ་འཁོར་ཐུབ་པ་བཟོ་གི་ཡོད། དེའི་རྐྱེན་གྱིས་ཉེ་ལམ་རྨང་ཝན་ཀྲའུ་ཞེས་པའི་བེུད་ཚོང་པ་ཞིག་རྒྱ་ནག་ཏུ་ཕྱིར་ལོག་བཏང་བའི་གནས་ཚུལ་ཐོན་མ་ཐག་རྒྱ་ནག་གཞུང་འབྲེལ་གྱི་བརྙན་འཕྲིན་དང། རླུང་འཕྲིན་། ཚགས་པར། དུས་དེབ། དྲ་རྒྱ་སོགས་དྲིལ་བསྒྲགས་ཀྱི་འཕྲུལ་ཆས་ཡོད་ཚད་དུས་གཅིག་ཏུ་སྒོ་ཕྱེ་ནས་རྒྱ་ནག་རྒྱལ་ཡོངས་ཙམ་མ་ཟད་རྒྱལ་སྤྱིའི་ཐོག་ཏུའང་ཁྱབ་བསྒྲགས་བྱས་པ་དང་། རྒྱ་ནག་དམར་ཤོག་ཚོགས་པའི་ཆེས་མཐོའི་གསར་འགྱུར་དྲ་གནས་མི་མང་ཉིན་རེའི་ཚོགས་པར་ཐོག་ཏུ་དཔྱད་བརྗོད་སོགས་ཀྱང་སྤེལ་ནས་རྨང་ཝན་ཀྲའུ་རྒྱལ་ནང་དུ་ཕྱིར་ལོག་ཐུབ་པ་དེ་ནི་རླབས་ཆེན་གྱི་རྒྱལ་ཁ་ཡིན་པ་དང་། དེ་ནི་རྒྱ་ནག་གཞུང་གིས་འཐབ་རྩོད་བྱས་པའི་རྒྱལ་ཁའི་འབྲས་བུ་ཞིག་ཡིན་པ། རྒྱ་ནག་གཞུང་ལ་སུས་ཀྱང་བཀག་འགོད་བྱེད་ཐུབ་ཀྱི་མེད་ལུགས་ཁྱབ་བསྒྲགས་བྱས་ཡོད། ད་དུང་དྲ་རྒྱའི་ཐོག་མི་མང་གིས་སོ་སོའི་བསམ་ཚུལ་དང་བལྟ་ཚུལ་སྤེལ་དུ་བཅུག་ནས་རྒྱ་ནག་གི་མི་རིགས་རིང་ལུགས་དང་རྒྱལ་ཞེན་རིང་ལུགས་ཀྱི་བསམ་བློ་རྒྱས་འཕེལ་རྒྱས་གཏོང་གི་ཡོད། ཡང་དེ་དང་ཕྱོགས་མཚུངས་རྒྱ་ནག་གི་ནང་དུ་ཡོད་པའི་མི་མི་ཉུང་བ་ཞིག་གིས་རྨང་ཝན་ཀྲའུ་ཕྱིར་ལོག་བྱས་པའི་གནས་ཚུལ་ལ་གཞུང་ཕྱོགས་ཀྱི་བལྟ་ཚུལ་དང་མི་འདྲ་བའི་དཔྱད་བརྗོད་སྤེལ་མཁན་ཡོད་པ་སྟེ། ཧྭ་ཝའེ་བཟོ་ཚོང་ཁང་གི་བདག་པོའི་བོུ་ཕྱིར་ལོག་བྱས་པར་ང་ཚོ་ཅིའི་ཕྱིར་དགའ་དགོས་སམ། ཁོ་མོ་ཕྱིར་ལོག་བྱས་པ་དང་ང་ཚོ་མི་དམངས་དཀྱུས་མའི་བར་ལ་འབྲེལ་བ་ཅི་ཞིག་ཡོད་དམ་ཟེར་བ་དང་། ཡང་དཔྱད་བརྗོད་འགའ་རེས་དེང་སྐབས་ཞིང་ཆེན་དང་གྲོང་ཁྱེར་མང་པོར་གློག་ཆད་ནས་དཀའ་ངལ་འཕྲད་བཞིན་འདུག་པས། རྨང་ཝན་ཀྲའུ་ལ་རྟེན་འབྲེལ་བྱ་རྒྱུ་ལས་ང་ཚོའི་གློག་ཆད་པའི་དཀའ་ངལ་དེ་གལ་ཆེ་བ་འདུག་ཅེས་དཔྱད་བརྗོད་དང་བསམ་ཚུལ་སྤེལ་མཁན་ཡང་ཡོད། དེའི་ཐོག་ནས་རྒྱ་ནག་མི་མང་ཚང་མང་དམར་ཤོག་ཚོགས་པའི་དར་ཆའི་འོག་ཤར་བསྐྱོད་བྱེད་ཀྱི་མེད་པ་གསལ་པོ་མཚོན་ཡོད། ཡང་དཔྱད་བརྗོད་པ་འགའ་རེས་ད་ལྟའི་སྐབས་རྒྱ་ནག་གཞུང་གིས་ལྐོག་ཟ་རུལ་སུངས་དང་སྒྲིག་འགའ་ཁྲིམས་འགལ་གྱི་མིང་ཐོག་ནས་རྒྱ་ནག་གི་བཟོ་ཚོང་གི་བདག་པོ་དང་ཕྱུག་བདག་མང་པོ་ཞིག་ལ་རྣམས་པ་འདྲ་མིན་གྱི་ཐོག་ནས་རྡུག་རྡེག་གཏོང་བཞིན་པའི་སྒང་ཡིན་ཀྱང་། རྨང་ཝན་ཀྲའུ་དང་ཁོ་མོས་ལས་གཉེར་བྱེད་སའི་ཧྭ་ཝའེ་བཟོ་ཚོང་ཁང་ལ་ག་དུས་ཡིན་ཀྱང་གཡས་གཞོགས་གཡོན་འདེགས་བྱེད་དགོས་པའི་རྒྱུ་རྐྱེན་ཅི་ཞིག་ཡིན་ ནམ་ཞེས་དོགས་སློང་བྱེད་ཀྱི་ཡོད། དེ་ཡང་མི་མང་པོ་ཞིག་གིས་ཧྭ་ཝའེ་བཟོ་ཚོང་ཁང་དེ་སྒེར་གྱི་མིང་ཐོག་ནས་གསར་འཛུགས་བྱས་ཡོད་ཀྱང་དོན་དངོས་ཐོག་དེ་ནི་རྒྱ་ནག་གི་དམག་དཔུང་གི་བཟོ་ཚོང་ཁང་ཞིག་ཡིན་པའི་ངོས་འཛིན་བྱེད་ཀྱི་ཡོད་པ་མ་ཟད། བཟོ་ཚོང་ཁང་དེའི་བདག་པོ་དེ་ཡང་དེ་སྔ་དམག་མི་ཟུར་པ་ཞིག་ཆགས་ཡོད། བཟོ་ཚོང་ཁང་དེ་ནས་གློག་ཀླད་དང་ཁ་པར་སོགས་ཀྱི་གཉེན་ཆས་དང་ལག་རྩལ་སོགས་ཁྲིམས་འགལ་གྱིས་ཚོང་གཉེར་བྱས་པའི་ཉེས་འཛུགས་སམ་དོགས་པ་བྱེད་ཀྱི་ཡོད་པ་དང་། དེའི་རྐྱེན་གྱིས་རྒྱ་ནག་གཞུང་གིས་ཧྭ་ཝའེ་བཟོ་ཚོང་ཁང་ལ་སྲུང་སྐྱོབ་བྱེད་དགོས་པའི་གནད་འགག་དེ་རེད་ཅེས་བརྗོད་མཁན་ཡོད་ལ། རྨང་ཝན་ཀྲའུ་ཁ་ན་ཀྲའི་གནམ་ཐང་ནས་འཇུ་བཟུང་བཀག་ཉར་བྱེད་པའི་རྒྱུ་རྐྱེན་ཡང་གནད་དོན་དེ་རིགས་དང་འབྲེལ་བ་ཡོད། མ་ཟད་ད་ཐེངས་རྨང་ཝན་ཀྲའུ་ཕྱིར་ལོག་བཏང་བ་དེ་ནི་གནས་སྐབས་ཙམ་ཞིག་ཡིན་པ་ལས་དུས་གཏན་དུ་ཕྱིར་ལོག་བཏང་བ་ཞིག་དང་། ཁོ་མོར་ཉེས་པ་མེད་པ་ར་འཕྲོད་ནས་ཕྱིར་ལོག་བཏང་བ་ཞིག་མིན་པ་གསལ་སྟོན་བྱས་ཡོད། ད་དུང་གལ་ཆེ་བ་ཞིག་ལ་ཁོ་མོ་ལོ་གསུམ་ཙམ་བཀག་ཉར་བྱེད་པའི་རྒྱུ་རྐྱེན་གང་ཡིན་མིན་གྱི་ཐད་རྒྱ་ནག་གཞུང་གིས་ཁ་གསལ་གྱིས་གང་ཡང་བྱེད་ཀྱི་མེད་ཀྱང་། ཁོ་མོས་འགྲེལ་བརྗོད་བྱས་ཡོད་པ་སྟེ། ཁོ་མོས་ཉེས་གསོག་གི་ལས་ཀ་བྱས་པར་དོགས་གཞིའི་འོག་བཀག་ཉར་བྱས་པ་རེད་ཅེས་འགྲེལ་བརྗོད་བྱས་ཡོད།
