ཉེ་ལམ་རྒྱལ་སྤྱིའི་རྒྱུད་ལམ་ཁག་གི་ནང་གནས་ཚུལ་ཐོན་པར་གཞིགས་ན། རྒྱ་ནག་གིས་ཐའེ་ཝན་ལ་འཇིགས་སྐུལ་བྱེད་པའི་ཉེན་བརྡ་དེ་ལོ་རེ་ལས་མ་བསྡད་པར་ཇེ་ཆེར་འགྲོ་བཞིན་པ་དང་། ཉེ་ལམ་ཐའེ་རྒྱལ་སྲུང་བློན་ཆེན་གྱིས་འགྲེལ་བརྗོད་བྱེད་སྐབས། ད་ལྟའི་སྐབས་རྒྱ་ནག་གིས་ཐའེ་ཝན་གྱི་མཁའ་དབྱིངས་སུ་དམག་རྒྱག་གནམ་གྲུ་འཕུར་བསྐྱོད་བྱེད་པའི་ཚད་གཞི་དེ་འདས་པའི་ལོ་ངོ་བཞི་བཅུའི་ནང་བྱུང་མྱོང་མེད་པ་ཞིག་ཡིན་པ་དང་། དམག་རྒྱག་གནམ་གྲུ་དེ་དག་གི་ནང་ཐ་ན་རྡུལ་ཕྲན་མཚོན་འཁྱེར་བའི་གནམ་གྲུ་ཡང་ཡོད་སྐོར་འགྲེལ་བརྗོད་བྱས་ཡོད། འདས་པའི་བདུན་ཕྲག་གཅིག་ལྷག་ཙམ་གྱི་ནང་ཐའེ་ཝན་མཁའ་དབྱིངས་སུ་རྒྱ་ནག་གིི་ཕྱོགས་ནས་གནམ་གྲུ་ཐེངས་གྲངས་ ༡༥༠ ཙམ་འཕུར་བསྐྱོད་བྱས་ཏེ་དམག་འཁྲུག་གི་ཉེན་བརྡ་བཏང་ཡོད། ཐའེ་ཝན་གྱི་སྲིད་བློན་སུའུ་ཛེ་ཀྲན་གྱིས་རྒྱུད་ལམ་ཁག་གི་ནང་ད་ལྟའི་ཐའེ་ཝན་ལ་རྒྱ་ནག་གི་ཕྱོགས་ནས་ཉེན་བརྡ་དང་འཁྲུག་རྩོད་ཡོང་གཞིའི་འཇིགས་སྐུལ་ཇི་འདྲ་ཡོད་མིན་ཐད་འགྲེལ་བརྗོད་གནང་དོན། རྒྱ་ནག་གི་ཕྱོགས་ནས་ཉེན་ཁའི་རང་བཞིན་ཉིན་བཞིན་ཆེ་རུ་འགྲོ་བའི་སྐབས་འདིར་ཐའེ་ཝན་གྱི་ངོས་ནས་རང་གི་བདེ་འཇགས་ཀྱི་ཆེད་དུ་དོགས་གཟོན་བྱེད་དགོས་པ་དང་། རྒྱལ་སྤྱིའི་སྤྱི་ཚོགས་ནས་མཁྱེན་གསལ་ལྟར་རྒྱ་ནག་གིས་རྒྱལ་སྤྱིའི་ཁྲིམས་ལུགས་རྩ་འགལ་བྱས་ཏེ་མངའ་ཁུལ་གྱི་བདེ་འཇགས་ལ་གཏོར་བཤིགས་དང་ཐའེ་ཝན་ལ་གནོན་ཤུགས་ཀྱི་སྡིག་སྐུལ་ཡང་ནས་ཡང་དུ་བྱེད་བཞིན་ཡོད་ཅིང། དམངས་གཙོར་དགའ་ཞེན་ཆེ་བའི་རྒྱལ་ཁབ་ཁག་གིས་རྒྱ་ནག་གི་བྱ་སྤྱོད་དེ་དག་འཚམས་འཇོག་དགོས་པའི་ཉེན་བརྡ་བཏང་ཡོད་ཀྱང་། རྒྱ་ནག་གི་ཕྱོགས་ནས་རྒྱལ་སྤྱིའི་ཉེན་རྡ་དེ་དག་ལ་རྩིས་མེད་གཏོང་རྐྱང་བྱེད་ཀྱི་ཡོད་པས་ང་ཚོས་རྒྱ་ནག་གི་སྡིག་སྐུལ་ལ་དོགས་གཟོན་དང་གདོང་ལེན་གྱི་གྲ་སྒྲིག་ཡོད་ཅེས་འགྲེལ་བརྗོད་བྱས་ཡོད། རྒྱ་ནག་གི་དྲག་པོའི་འཇིག་སྐུལ་དང་ཐའེ་ཝན་གྱི་མཁའ་དབྱིངས་སུ་འཛུལ་བཞིན་པའི་གནམ་གྲུ་དེ་དག་ལ F-16 རྟགས་ཅན་གྱི་ཐའེ་ཝན་རང་ཉིད་ཀྱི་དམག་གི་གནམ་གྲུས་རྗེས་དེད་བྱས་ཏེ་ཕྱིར་ལོག་དགོས་པའི་ཉེན་བརྡ་བཏང་ཡོད་པ་མ་ཟད། ཐའེ་ཝན་གྱི་རྒྱལ་སྲུང་དང་དམག་དོན་སོགས་འབྲེལ་ཡོད་ཚན་པས་ཀྱང་རྒྱ་ནག་གི་བྱ་སྤྱོད་དེ་དག་ལ་ཉིན་མཚན་མེད་མེད་པར་སོ་བལྟ་དང་ཞིབ་འཇུག་བྱེད་མུས་ཡིན་པ་དང་། འཚམས་འདིར་ཨ་རིའི་ཕྱི་སྲིད་ལྷན་ཁང་དང་དེ་མིན་འབྲེལ་ཡོད་ཚན་པ་ཁག་ནས་ཀྱང་ཆེད་དུ་གསར་འགོད་ལྷན་ཚོགས་སྐོང་འཚོགས་བྱས་ཏེ་རྒྱ་ནག་གི་བྱ་སྤྱོད་དེ་དག་ནི་མངའ་ཁུལ་གྱི་ཞི་བདེ་ལྷིང་འཇགས་ལ་འཁྲུག་རྩོད་སློང་གཞི་ཞིག་ཡིན་པ་དང་། ཨ་རིས་ཐའེ་ཝན་གྱི་ཞི་བདེ་དང་བདེ་འཇགས་སྲུང་སྐྱོབ་བྱ་རྒྱུའི་ཐད་ང་ཚོའི་ཆོད་སེམས་ནི་ཧ་ཅང་བརྟན་པོ་དང་འགྱུར་བ་མེད་ཅེས་གསལ་སྟོན་བྱས་ཡོད། ཐའེ་ཝན་གྱི་རྒྱལ་སྲུང་བློན་ཆེན་ཆེའུ་གོའོ་ཀྲན་གྱིས་འགྲེལ་བརྗོད་བྱས་དོན། རྒྱ་ནག་གི་དམག་གི་གནམ་གྲུས་ང་ཚོའི་ས་ཐིག་ཁུལ་དུ་འཕུར་བསྐྱོད་བྱེད་བཞིན་ཡོད་པ་དེས་ང་ཚོའི་སྐམ་མཚོ་མཁའ་གསུམ་གྱི་དམག་དཔུང་ལ་གནོན་ཤུགས་ཡོང་གི་ཡོད་ནའང། དེ་དང་ཕྱོགས་མཚུངས་ང་ཚོར་རང་ཉིད་ཀྱི་དམག་དོན་གྱི་སྟོབས་ཤུགས་ཆེ་རུ་གཏོང་དགོས་པ་དང་། དམག་རྒྱག་གི་ནུས་པ་ཆེ་རུ་གཏོང་དགོས་པའི་ངོས་འཛིན་ཐོབ་ཀྱི་འདུག་ཅེས་ནན་བརྗོད་བྱས་ཡོད་པ་དང་། ཡང་ཉེ་ལམ་ཐའེ་ཝན་གྱི་སྲིད་འཛིན་ཚའེ་ཝན་ཝུན་གྱིས་བདེ་འཇགས་ཀྱི་དུས་དེབ་གཅིག་གི་ཐོག་ད་ལྟའི་ཐའེ་ཝན་གྱི་གནས་སྟངས་དང་འབྲེལ་བའི་རྩོམ་ཡིག་གཅིག་སྤེལ་ཡོད་པ་དང་། ཁོང་གི་རྩོམ་ཡིག་ནང་རྒྱལ་སྤྱིའི་སྤྱི་ཚོགས་ནས་དམགས་གཙོའི་ལམ་ལུགས་ཡིན་པའི་ཐའེ་ཝན་དང་མཉམ་འབྲེལ་དགོས་པའི་རིན་ཐང་གསལ་པོ་མཐོང་དགོས་པ་དང་། གལ་ཏེ་ཐའེ་ཝན་དེ་རྒྱ་ནག་དམར་པོའི་སྲིད་དབང་གི་འོག་ལ་ཤོར་ཚེ་ཨེ་ཤེ་ཡ་དང་ཞི་བདེ་རྒྱ་མཚོའི་མངའ་ཁུལ་གྱི་བདེ་འཇགས་དང་དམངས་གཙོའི་ལམ་ལུགས་ལ་ཕམ་ཉེས་ཀྱི་མཇུག་འབྲས་ཚབས་ཆེན་ཡོང་རྒྱུ་རེད་ཅེས་ནན་བརྗོད་བྱས་ཡོད། རྒྱ་ནག་གི་བྱ་སྤྱོད་དེ་དག་གིས་རྐྱེན་པས་ཐའེ་ཝན་རང་ཉིད་ཀྱི་དམག་དོན་གྱི་སྟོབས་ཤུགས་ཡར་རྒྱས་གཏོང་རྒྱུར་སྐུལ་མ་དང་ཤུགས་རྐྱེན་ཆེན་པོ་ཐེབས་ཡོད་ལ། ཐའེ་ཝན་གྲོས་ཚོགས་ནས་ཀྱང་དམག་དོན་ཡར་རྒྱས་ཀྱི་དོན་དུ་འབད་བརྩོན་ཡོད་ཚད་བྱེད་དགོས་པའི་ངོས་འཛིན་བྱེད་བཞིན་ཡོད་མུས་རེད། ཡང་སྙིང་རྒྱ་ནག་གིས་ཐའེ་ཝན་དེ་དབུག་ཐེངས་གཅིག་ལ་འཁྱུར་མེད་གཏོང་ཐུབ་བམ། རྒྱ་ནག་གི་བྱ་སྤྱོད་དེ་འདྲ་ཞིག་སྤེལ་ཚེ་ཨ་རིས་གཙོས་པའི་རྒྱལ་སྤྱིའི་དམངས་གཙོའི་རྒྱལ་ཁབ་ཚོས་བལྟས་མོ་བལྟས་ན་སྡོད་སྲིད་དམ། འདི་ནི་སུས་ཀྱང་ཁ་མཚོན་གཅོད་དཀའ་བའི་དྲི་བ་ཞིག་རེད། དེ་ལྟར་ནའང་། འདས་པའི་མི་ལོ་བདུན་བཅུའི་གོང་རྒྱ་ནག་པེ་ཅིང་དུ་གྲོས་མཐུན་དོན་ཚན་བཅུ་བདུན་འཇོག་སྐབས་བོད་ཀྱི་སྐུ་ཚབ་ཚོགས་པའི་ཚོགས་གཙོ་ང་ཕོད་ཀྱིས་ཐའེ་ཝན་དང་འབྲེལ་བའི་འཆར་སྣང་ཞིག་བཤད་ཡོད་པ་སྟེ། དེ་ཡང་ལོ་དེའི་ཟླ་ ༥ ཚེས་ ༡ ཉིན་ནི་རྒྱལ་སྤྱིའི་ངལ་རྩོལ་དུས་ཆེན་ཡིན་པ་དང་། དེ་ཉིན་གནམ་བདེའི་སྒོ་མོའི་ཐང་ཆེན་དུ་མཛད་སྒོ་ཆེན་པོ་ཞིག་སྐོང་འཚོགས་བྱས་ཏེ་མའོ་ཙེ་ཏུང་སོགས་རྒྱ་ནག་གི་འགོ་ཁྲིད་ཚང་མ་མཉམ་བཞུགས་བྱས་ཡོད་པ་མ་ཟད། བོད་ཀྱི་སྐུ་ཚབ་ཚོགས་པའི་ཚོགས་མི་རྣམས་ཀྱང་མཛད་སྒོ་དེར་མཉམ་བཞུགས་བྱེད་དུ་བཅུག་པ་རེད། སྐབས་དེ་དུས་གནམ་བདེ་སྒོ་མོའི་ཐང་ཆེན་ཐོག་བོད་དང་། ཤིང་ཅང། ཐའེ་ཝན་བཅས་ཀྱི་མིང་འཁོད་པའི་འཕྲེད་དར་གསུམ་གྱི་སྟེང་དུ་སྒང་ཕུག་ཆེན་པོ་རེད་བཏགས་ཡོད་པ་དང་། གོང་གསལ་འཕྲེད་དར་རེ་རེའི་ཐོག་ས་གནས་དེ་དག་བཅིངས་འགྲོལ་གཏོང་དགོས་ཞེས་འཁོད་ཡོད། དེ་ཉིན་གནམ་གཤིས་ཡག་པོ་མེད་པའི་དབང་གིས་སྒང་ཕུག་གཅིག་ལྷག་པར་འཁྱེར་ནས་འཇུ་གར་ཕྱིན་ཀྱང་འཇུ་མ་ཐུབ་པ་རེད། སྐབས་དེ་དུས་བོད་ཀྱི་སྐུ་ཚབ་ཚོགས་པའི་ཚོགས་གཙོ་ང་ཕོད་ཀྱིས་རྒྱ་ཡིག་ཤེས་ཀྱི་མེད་སྟབས། ཉེ་འགྲམ་དུ་ཡོད་པའི་སྟག་ལྷ་ཕུན་ཚོགས་བཀྲིས་ལགས་སུ་སྒང་ཕུག་དེ་དག་གི་ཐོག་ཡི་གེ་ག་རེ་འབྲིས་འདུག་གམ་ཅེས་སྐད་ཆ་དྲིས་པར། སྟག་ལྷ་ཕུན་ཚོགས་བཀྲིས་ནས་བོད་དང་། ཐའེ་ཝན། ཤིང་ཅང་བཅས་བཅིངས་འགྲོལ་གཏོང་དགོས་ཞེས་འཁོད་འདུག་ཅེས་བརྗོད་པ་དང་། ལྷག་པས་འཁྱེར་བའི་སྒང་ཕུག་དེའི་ཐོག་ཐའེ་ཝན་བཅིངས་འགྲོལ་གཏོང་དགོས་ཅེས་འཁོད་འདུག་བརྗོད་པར། ང་ཕོད་ནས་ཨཱ་ལས་ད་བྱས་ནས་ཐའེ་བཅིངས་འགྲོལ་གཏོང་ཡས་དེ་ཁག་པོ་ཆག་གི་ཡོད་པ་འདྲ་ཞེས་བརྗོད་ཡོད། ང་ཕོད་ཀྱིས་བཤད་པ་ལྟར་ལོ་ངོ་བདུན་བཅུ་འདས་ཟིན་ཀྱང་ཐའེ་ཝན་དེ་སྔར་བཞིན་རང་བཙན་གྱི་རྒྱལ་ཁབ་ལྟ་བུའི་ངོ་བོར་གནས་ཡོད།
