ཉེ་ལམ་ཞི་ཅིང་ཕིང་གིས་ཕྱི་འབྲེལ་སྲིད་ཇུས་སྤེལ་སྟངས་དང། ལྷག་པར་དུ་ཐའེ་ཝན་དང། ལྷོ་རྒྱ་ནག་རྒྱ་མཚོ། དེ་བཞིན་རྒྱ་དཀར་ནག་གཉིས་ཀྱི་ས་འཚམས་ཟེར་བའི་གནད་དོན་ཐད་ཞི་ཅིང་ཕིང་གི་སྲིད་ཇུས་སྤེལ་སྟངས་ལ་དབྱེ་ཞིབ་བྱེད་སྐབས། ར་ཤེ་ཡའི་སྲིད་འཛིན་ཧྤུ་ཀྲིན་གྱི་བྱེད་སྟངས་ལ་ལད་མོ་བྱེད་བཞིན་པའི་གནས་ཚུལ་ཐོན་མུས་རེད། དེ་ཡང་ར་ཤེ་ཡའི་སྲིད་འཛིན་ཧྤུ་ཧྲིན་ནི་ར་ཤེ་ཡའི་དམར་ཤོག་རིང་ལུགས་འཐོར་གཞིགས་སུ་ཕྱིན་པ་ནས་བཟུང་འདས་པའི་ལོ་ངོ་གསུམ་བཅུ་ལྷག་ཙམ་གྱི་རིང་དུས་ཡུན་རིང་ཤོས་ཀྱི་སྲིད་འཛིན་དེ་ཆགས་ཡོད། དེར་བརྟེན། ཞི་ཅིང་ཕིང་གིས་དམངས་གཙོའི་རྒྱལ་ཁབ་ཡིན་པའི་ར་ཤེ་ཡ་ལྟ་བུའི་ནང་ཧྤུ་ཀྲེང་ལ་དེ་ལྟ་བུའི་རྒྱལ་ཁབ་ཐོབ་དགོས་པའི་རྒྱུ་རྐྱེན་ལ་བསམ་བློ་གཏོང་སྐབས། གནད་དོན་མང་པོའི་ཁྲོད་ནས་གལ་ཆེ་ཤོས་གཅིག་ནི། ཧྤུ་ཀྲེང་གིས་མཐའ་མཚམས་ཀྱི་རྩོད་རྙོགས་དང་འབྲེལ་བའི་གནད་དོན་བེད་སྤྱོད་བྱས་ཏེ། རང་ཉིད་ཀྱི་འཇོན་ཐང་དང་དབང་གྲགས་ཆེ་རུ་གཏོང་ཐབས་བྱས་པ་དེ་རེད། དེ་ཡང་ཧྤུ་ཀྲེང་གིས་སྤྱི་ལོ་ ༢༠༡༤ ལོར་ཡུག་རན་གྱི་མངའ་ཁོངས་སུ་ཡོད་པའི་གླིང་ཕྲན་ཁ་ཤས་ར་ཤེ་ཡའི་ཁོང་གཏོགས་ཡིན་པའི་ངོས་འཛིན་གྱི་ཐོག་ནས་དམག་དྲངས་ཏེ་གླིང་ཕྲན་དེ་དག་ར་ཤེ་ཡའི་མངའ་ཁོངས་སུ་གཅིག་བསྡུས་བྱས་པར་བརྟེན། སྐབས་དེར་ར་ཤེ་ཡའི་ནང་གི་མི་མང་པོ་ཞིག་ཧྤུ་ཀྲེང་ནི་འཇོན་ཐང་དང་བློ་སྟོབས་ཆེ་བའི་སྲིད་འཛིན་ཞིག་ཡིན་པའི་ངོས་འཛིན་དང་གདེང་འཇོག་བྱས་པ་མ་ཟད། ཁོ་པ་མུ་མཐུད་ནས་སྲིད་འཛིན་བྱ་རྒྱུར་རྒྱབ་སྐྱོར་བྱས་པ་རེད། ཧྤུ་ཀྲེང་ལ་ཐོབ་པའི་རྒྱལ་ཁབ་དེས་ཞི་ཅིང་ཕིང་ལ་ཤུགས་རྐྱེན་ཐེབས་ནས་ཕྱོགས་གཅིག་ནས་རྒྱ་ནག་གི་རྒྱལ་གཅེས་རིང་ལུགས་དང་མི་རིགས་རིང་ལུགས་ཀྱི་བསམ་བློ་ཁྱབ་སྤེལ་ཤུགས་ཆེ་བྱས་ཏེ་རང་ཉིད་ཀྱི་དབང་ཆ་སྲ་བརྟན་བཟོ་བཞིན་ཡོད་པ་མ་ཟད། ལྷག་པར་དུ་ཐའེ་ཝན་དང་། རྒྱ་དཀར་ནག་གཉིས་ཀྱི་ས་འཚམས་ཀྱི་རྩོད་རྙོགས་ཟེར་བའི་གནད་དོན་ཐད་ཡང་ནས་ཡང་དུ་རྩོད་གཞི་སློང་བ་དང་། ཕ་རོལ་པོར་འཇིགས་སྐུལ་གྱི་ཉེན་བརྡ་བཏང་ནས་རང་ཉིད་ཀྱི་དབང་ཤུགས་སྲ་བརྟན་བཟོ་ཐོབས་བྱེད་བཞིན་ཡོད། ཡིན་ནའང། ཧྤུ་ཀྲེང་ལ་ཐོབ་པའི་གྲུབ་འབྲས་དེ་ལྟ་བུ་ཞིག་ཞི་ཅིང་ཕིང་ལ་དུས་ཡུན་འཐུང་འཐུང་ན་ཧ་ཅང་ཁག་པོ་ཆགས་ཡོད་པ་སྟེ། དེ་ཡང་ཡུག་རན་གྱི་གླིང་ཕྲན་དེ་དག་ལ་ཆ་མཚོན་ན་ཐའེ་ཝན་ལྟ་བུའི་རྒྱལ་སྤྱིའི་གནས་བབ་ཆེན་པོ་མེད་པ་ཟད། ཆབ་སྲིད་ཀྱི་ལམ་ལུགས་དང་བདེ་འཇགས་སོགས་ཕྱོགས་ག་ནས་བལྟས་ཀྱང་ཐའེ་ཝན་ནི་གལ་གནད་ཆེ་བའི་གནད་དོན་ཞིག་རེད། དེ་ཡང་ཐོག་མར་ཐའེ་ཝན་ནི་ཚད་མཐོ་ལ་ཆ་ཚང་བའི་དམངས་གཙོའི་སྤྱི་ཚོགས་གཅིག་ཆགས་ཡོད་པ་དང་། རྒྱ་ནག་ནི་སྲིད་དབང་གཅིག་བསྡུས་ཀྱི་རྒྱལ་ཁབ་ཆེ་ཤོས་དེ་ཆགས་ཡོད་པས། གལ་ཏེ་རྒྱ་ནག་གིས་དམག་ཤུགས་ལ་བརྟེན་ནས་ཐའེ་ཝན་བཙན་བཟུང་བྱས་ཚེ། དེ་ནི་ཐའེ་ཝན་གྱི་ ཕམ་ཁག་ཙམ་མ་ཟད། དམངས་གཙོའི་ཕམ་ཁ་ཞིག་ཀྱང་ཆགས་ཡོད་པས། ཨ་རིས་གཙོས་པའི་དམངས་གཙོའི་རྒྱལ་ཁབ་ཚོའི་ངོས་ནས་བཤད་ན་དེ་ནི་བློས་གཏོང་ཐབས་མེད་པའི་གནད་དོན་ཞིག་རེད། དེའི་རྐྱེན་གྱིས་རྒྱལ་སྤྱིའི་དམངས་གཙོའི་སྟོབས་ཤུགས་ཀྱིས་ཐའེ་ཝན་སྲུང་སྐྱོབ་བྱ་རྒྱུ་དེ་རང་ཉིད་སྲུང་སྐྱོབ་བྱ་རྒྱུ་ལྟ་བུར་ངོས་འཛིན་བྱེད་ཀྱི་ཡོད་པ་དང། ཉེ་ལམ་ནས་བཟུང་ཨ་རིས་གཙོས་པའི་དམངས་གཙོའི་རྒྱལ་ཁབ་ཁག་དང་ཐའེ་ཝན་མཉམ་ལས་བྱེད་པའི་འབྲེལ་བ་ཉིན་བཞིན་དམ་ཟབ་ཏུ་འགྲོ་བཞིན་ཡོད། འདི་ལོ་རྒྱ་ནག་མི་དམངས་སྤྱི་མཐུན་རྒྱལ་ཁབ་གསར་འཛུགས་བྱས་ཏེ་མི་ལོ་ ༧༢ འཁོར་བའི་དུས་དྲན་གྱི་སྔ་ནུབ་ཏུ་རྒྱ་ནག་གཞུང་གིས་དམག་འཐབ་གནམ་གྲུ་ ༡༥༠ ལྷག་ཙམ་ཐའེ་ཝན་མཚོ་གླིང་གི་མཁའ་ཐོག་ཏུ་འཕུར་བསྐྱོད་བྱས་ཏེ་ཐའེ་ཝན་བཙན་བཟུང་བྱ་རྒྱུ་ཡིན་པའི་སྡིག་སྐུལ་བྱེད་བཞིན་ཡོད། དེ་ནི་ཕྱོགས་གཅིག་ནས་རྒྱ་ནག་རྒྱལ་ནང་དུ་ད་ལྟའི་ཞི་ཅིང་གི་གཞུང་དེ་ཧ་ཅང་སྟོབས་དང་ལྡན་པ་ཞིག་ཡིན་པ་མཐོང་སྣང་བཟོ་རྒྱུ་དང་། ཕྱོགས་གཞན་ཞིག་ནས་རྒྱལ་སྤྱིའི་ཐོག་རྒྱ་ནག་གི་དམག་ཤུགས་ངོམས་གསོ་བྱ་རྒྱུ་དེ་རེད། དེ་ལྟར་ནའང་ཧྤུ་ཀྲེང་དང་ཞི་ཅིང་ཕིང་གི་གནས་སྟངས་ནི་རྩ་བ་མི་འདྲ་བ་ཞིག་ཆགས་ཡོད་པ་སྟེ། གཅིག་ནི་དམངས་གཙོའི་རྒྱལ་ཁབ་ཡིན་པ་དང། གཞན་དེ་ནི་དམར་ཤོག་གི་རྒྱལ་ཁབ་ཡིན་པ་མ་ཟད། འདས་པའི་མི་ལོ་བཅུ་ལ་ཉེ་བའི་རིང་ཞི་ཅིང་ཕིང་གིས་ལྐོག་ཟ་རུལ་སུངས་ཀྱི་མིང་ཐོག་ནས་རྒྱ་ནག་དམར་ཤོག་ཚོགས་པའི་ནང་ཁུལ་དུ་ཤུགས་རྐྱེན་དང་དབང་ཆ་ཡོད་པའི་དཔོན་རིགས་འབོར་ཆེན་ཞིག་རྩ་མེད་བཟོས་པར་བརྟེན། དམར་ཤོག་ཚོགས་པའི་ནང་ཁུལ་དུ་ཆགས་པའི་ཞི་ཅིང་ཕིང་གི་ཁ་གཏད་དེ་ཧ་ཅང་ཆེན་པོ་ཞིག་ཆགས་ཡོད་པ་སྟེ། དེ་སྔ་རྒྱ་ནག་དམར་ཤོག་ཚོགས་པ་གཅིག་གི་ནང་གཤོག་ཁག་གསུམ་ཡོད་པ་ནས་ད་ཆ་གཤོག་ཁག་བཞི་ཆགས་ཡོད་པ་སྟེ། ཧྲང་ཧའེ་གཤོག་ཁག་དང་། གུང་གཞོན་གཤོག་ཁག་ རྒྱལ་སྲས་གཤོག་ཁག་བཅས་དང། དེའི་ཐོག་ཞི་ཅིང་ཕིང་གི་གཤོག་ཁག་བཅས་གཤོག་ཁག་མི་འདྲ་བ་ཁག་བཞི་ཙམ་ཆགས་ཡོད། ཞི་ཅིང་ཕིང་གི་གཤོག་ཁག་ནི་གསར་དར་གྱི་གཤོག་ཁག་ཞིག་རེད། གཤོག་ཁག་གཞན་དག་གསུམ་གའི་ནང་གི་དཔོན་རིགས་མང་པོ་ཞིག་ཆམ་ལ་ཕབ་ཡོད། དཔེར་ན། དེ་སྔའི་དབུས་ཆབ་སྲིད་ཅུས་ཀྱི་རྒྱུན་ཟུར་དང་སྲིད་ཁྲིམས་ལྷན་ཁང་གི་དྲུང་ཟུར་ཀྲའུ་ཡུང་ཁང་དང་། དབུས་དམག་དོན་ལྷན་ཁང་གི་ཀྲུའུ་གཞི་གཞོན་པ་ཟུར་པ་ཀོའོ་སྦོའོ་ཞུང་དང་ཞུས་ཚའེ་ཧུའུ། དབུས་དྲུང་ཆེ་ལྷན་ཁང་གི་དྲུང་ཟུར་རླིས་ཅི་ཧྭ་དང་བཅས་པ་ནི་ཅང་ཙེ་མིན་གྱི་གཤོག་ཁག་དང་རྒྱལ་སྲས་གཤོག་ཁག་གང་རུང་གི་མི་སྣ་ཡོད་པ་དང་། ཁོ་ཚོའི་ཤུགས་རྐྱེན་གྱིས་ནུས་པ་ནི་ཧ་ཅང་ཆེན་པོ་ཞིག་རེད། ཞི་ཅིང་ཕིང་ལ་འཕྲད་བཞིན་པའི་དཀའ་ངལ་འདི་ལྟ་བུ་ཧྤུ་ཀྲེང་ལ་གཏན་ནས་མེད་པས་གལ་ཏེ་ཞི་ཅིང་ཕིང་གིས་ཧྤུ་ཀྲེང་གི་འཐབ་ཇུས་ལ་དཔེ་བལྟས་ཚེ་ཧ་ཅང་ཁག་པོ་ཡིན་པའི་ངོས་འཛིན་བྱེད་ཀྱི་ཡོད་པ་དང་། ཡང་དཔྱད་ཞིབ་འགའ་ཤས་ཀྱིས་ཞི་ཅིང་གི་སྲིད་དབང་བརྟན་པོ་ཆགས་ཟིན་པ་དང་། འཆར་ལོའི་ལོ་མཇུག་ཏུ་སྐོང་འཚོགས་བྱ་རྒྱུའི་རྒྱ་ནག་དམར་ཤོག་གི་རྒྱལ་ཡོངས་ཚོགས་ཆེན་ཐེངས་ཉི་ཤུའི་ཐོག་ཞི་ཅིང་ཕིང་གིས་མུ་མཐུད་ནས་དབང་ཆ་བཟུང་རྒྱུ་དང། གོམས་པ་རིམ་བགྲོད་ཀྱི་ཐོག་ནས་ཆ་རྐྱེན་གསར་སྐྲུན་བྱས་ཏེ་སྤྱི་ལོ་ ༢༠༢༥ ལོར་སླེབས་སྐབས་ཐའེ་ཝན་ལ་དམག་རྒྱག་གི་རེད་ཅེས་བརྗོད་ཀྱི་ཡོད།
