དེ་རིང་སྤྱི་ལོ་ ༢༠༢༡ ཟླ་ ༡༠ ཚེས་ ༡༩ ཉིན་རྒྱ་ནག་གཞུང་འབྲེལ་གྱི་གསར་འགྱུར་རྒྱུད་ལམ་ཁག་ནང་གནས་ཚུལ་སྤེལ་བར་གཞིགས་ན། ད་ལྟའི་བོད་རང་སྐྱོང་ལྗོངས་ཟེར་བའི་དམར་ཤོག་དྲུང་ཆེ་ཝུའུ་དབྱིང་ཇེ་ལོ་ནའི་རྒྱུ་རྐྱེན་གྱིས་རྐྱེན་པས་དམར་ཤོག་དྲུང་ཆེ་དང་། རྒྱུན་ལས་ཨུ་ཡོན། ཨུ་ཡོན་བཅས་ཀྱི་ལས་འགན་མི་འཁུར་བ་དང་། ཝང་ཅུན་ཀྲེན་བོད་རང་སྐྱོང་ལྗོངས་དམར་ཤོག་དྲུང་ཆེ་དང་། རྒྱུན་ལས་ཨུ་ཡོན། ཨུ་ཡོན་བཅས་ཀྱི་ལས་འགན་འཁུར་དགོས་པའི་ཐག་གཅོད་བྱས་ཡོད། དེ་ཡང་ཝང་ཅུན་ཀྲེང་ནི་སྤྱི་ལོ་ ༡༩༦༣ ལོར་རྒྱ་ནག་ཧྲན་ཏུང་ཞིང་ཆེན་རུ་སྐྱེས་པ་དང་། ཁོ་པ་བོད་རང་སྐྱོང་ལྗོངས་དམར་ཤོག་དྲུང་ཆེར་བསྐོ་བཞག་མ་བྱས་གོང་ཤིང་ཅང་ཡུ་གུར་རང་སྐྱོང་ལྗོངས་ཟེར་བའི་དམར་ཤོག་དྲུང་ཆེ་གཞོན་པ་དང་། སྲིད་ཁྲིམས་ཁང་གི་འགན་འཁུར་མྱོང་མཁན་ཞིག་ཆགས་ཡོད། ཝུའུ་དབྱིང་ཇེ་ནི་སྤྱི་ལོ་ ༡༩༥༦ ལོར་ཧྲན་ཏུང་དུ་སྐྱེས་པ་དང་། ཝང་ཅུང་ཀྲེང་དང་ཕ་ཡུལ་གཅིག་པ་ཆགས་ཡོད། སྤྱི་ལོ་ ༡༩༧༤ ལོར་བོད་དུ་སླེབས་པ་ནས་བཟུང་ད་བར་ལོ་བཞི་བཅུ་ལྷག་ཙམ་སོང་ཡོད། ལོ་རབས་བདུན་བཅུ་པ་ནི་རྒྱ་ནག་ནང་རིག་གནས་གསར་བརྗེ་ཆེན་པོའི་དུས་སྐབས་ཡིན་དང། སྲོལ་རྒྱུན་གྱི་ཆོས་དང་རིག་གཞུང་ལྟ་ཅི། ཐ་ན་དེང་སྐབས་ཀྱི་ཤེས་ཡོན་ཅན་ཚོ་ཡང་འབྱོར་ལྡན་གྲལ་རིམ་གྱི་རུལ་སུངས་ཀྱི་བསམ་བློ་ཡོད་པའི་ངོས་འཛིན་འོག་ག་དུས་ཡིན་ཀྱང་རྡུང་རྡེག་གཏོང་ཡུལ་ཞིག་ཆགས་ཡོད། དུས་སྐབས་དེའི་རིང་རྒྱ་ནག་རྒྱལ་ཡོངས་སུ་མཐོ་སློབ་འགྲིམས་པའི་དུས་སྐབས་ཡང་ཡོངས་སུ་འཚམས་ཆད་ཡོད། དེར་བརྟེན་སྤྱི་ལོ་ ༡༩༧༤ ལོར་ཝུའུ་དབྱིང་ཇེ་བོད་དུ་ཡོང་སྐབས་འཛིན་རིམ་བཅུ་གཉིས་ཀྱི་གནས་རིམ་ལས་ཐོན་མེད་པ་དང་། བོད་དུ་སླེབས་རྗེས་ཀོང་པོ་ཕྱུགན་ལས་རྭ་བར་ལས་ཀ་བྱས་ནས་བསྡད་པ་དང་། དེ་རྗེས་ལོ་གསུམ་ཙམ་སོང་རྗེས་ལྷ་ས་གྲོང་ཁྱེར་ནུབ་ཕྱོགས་ཁུལ་དུ་ཡོད་པའི་གློག་ལས་བཟོ་གྲྭར་ལས་ཀ་བྱས། ཁོ་པ་དེ་སྔ་བོད་རང་སྐྱོང་ལྗོངས་དམར་ཤོག་དྲུང་ཆེར་བསྐོ་བཞག་བྱེད་སྐབས། བོད་ལྗོངས་ནི་ངའི་ཕ་ཡུལ་གཉིས་པ་ཡིན་ཞེས་བརྗོད་མྱོང་ཡོད། ཝུའུ་དབྱིང་ཇེ་ཡིས་བོད་རང་སྐྱོང་ལྗོངས་དམར་ཤོག་དྲུང་ཆེ་བྱེད་རིང་བོད་ནང་སྔར་བཞིན་དམ་དྲག་ཁོ་ནའི་འོག་ནས་འཛིན་སྐྱོང་བྱས་ཡོད་པ་ལས་བཟང་ཕྱོགས་ཀྱི་འགྱུར་བ་ཅི་ཡང་བྱུང་མེད། དེ་རིང་ཚེས་ ༡༩ ཉིན་གྱི་སྔ་དྲོ་བོད་རང་སྐྱོང་ལྗོངས་ཀྱི་འགོ་ཁྲིད་ཚོགས་འདུ་སྐོང་འཚོགས་བྱས་པ་དང་། རྒྱ་ནག་དབུས་སྒྲིག་འཛུགས་པུའུ་ཡི་འགན་འཛིན་གཞོན་པ་ཙང་ཡི་ཁྲུན་གྱིས་གཏམ་བཤད་སྤེལ་བ་དང་། དེ་ཡང་ཁོ་པའི་གཏམ་བཤད་ནང་ད་ཐེངས་འགོ་ཁྲིད་ལེགས་སྒྲིག་བྱས་པ་དེ་ནི་དབུས་གཞུང་གིས་སྤྱི་ཡོངས་ལ་དམིགས་པ་དང་། ལས་ཀའི་དགོས་མཁོ་དང་བོད་རང་སྐྱོང་ལྗོངས་ཀྱི་འགོ་ཁྲིད་ཚན་ཁག་གསར་འཛུགས་བྱ་རྒྱུའི་དོན་དངོས་ལ་དམིགས་པ་ཞིག་ཡིན་སྐོར་ནན་བརྗོད་བྱས་ཡོད། ད་ཐེངས་བོད་རང་སྐྱོང་ལྗོངས་དམར་ཤོག་གི་དྲུང་ཆེ་གསར་པ་དེའི་ལོ་རྒྱུས་ཀྱི་རྒྱབ་ལྗོངས་སོགས་ལ་བལྟས་ན། བོད་ནང་སྔར་བཞིན་དམ་དྲག་ཅན་གྱི་སྲིད་ཇུས་རྒྱུན་འཁྱོངས་བྱ་རྒྱུ་ལས་བཟང་ཕྱོགས་ཀྱི་འགྱུར་བ་ཞིག་ཡོང་བའི་རེ་བ་དེ་ཙམ་མེད། གང་ཡིན་ཞེ་ན། ཁོ་པ་བོད་རང་སྐྱོང་ལྗོངས་ཟེར་བའི་དམར་ཤོག་གི་དྲུང་ཆེར་བསྐོ་བཞག་མ་བྱས་གོང་ཤིང་ཅང་ཡུ་གུར་རང་སྐྱོང་ལྗོངས་ཟེར་བའི་དམར་ཤོག་དྲུང་ཆེ་གཞོན་པ་དང་སྲིད་ཁྲིམས་ལྷན་ཁང་གི་འགན་འཁུར་བ་བྱེད་མྱོང་ཡོད། ཤིང་ཅན་ཡུ་གུར་རང་སྐྱོང་ལྗོངས་ནི་དེང་སྐབས་རྒྱ་ནག་རྒྱལ་ཡོངས་ཀྱི་ནང་ནས་དམ་དྲག་ཆེ་ཤོས་དེ་ཆགས་ཡོད། མ་ཟད་ཁོ་པ་ཤིང་ཅང་དུ་སྡོད་རིང་དམར་ཤོག་དྲུང་ཆེ་གཞོན་པ་དང་སྲིད་ཁྲིམས་ཁང་གི་འགན་འཁུར་བ་ཆགས་ཡོད་སྟབས། དེང་སྐབས་ཤིང་ཅན་ནང་དམ་དྲག་བྱེད་པའི་ཉམས་མྱོང་དེ་དག་བོད་རང་སྐྱོང་ལྗོངས་ནང་འཁྱེར་ཡོང་ནས་དེ་བས་དམ་དྲག་ཅན་གྱི་སྲིད་ཇུས་ཤིག་ལག་ལེན་བྱ་རྒྱུ་ཡིན་པ་གསལ་པོ་ཆགས་ཡོད་ལ། ཞི་ཅིང་ཕིང་གིས་ཁོ་པ་ཆེད་མངགས་བོད་དུ་མངགས་གཏོང་བྱེད་དགོས་དོན་ཡང་ཤིང་ཅང་ནང་གི་ཉམས་མྱོང་དེ་བོད་དུ་ཁྱབ་སྤེལ་བྱ་རྒྱུར་དམིགས་པ་ཞིག་ཡིན་སྲིད། དེ་དང་ཆབས་ཅིག་ཉིན་ཤས་གོང་བོད་རང་སྐྱོང་ལྗོངས་མི་དམངས་སྲིད་གཞུང་གི་འགོ་གཙོའི་ལས་གནས་ཡང་འཕོ་འགྱུར་བཏང་ཡོད་པ་དང་། དེ་ཡང་བོད་རང་སྐྱོང་ལྗོངས་མི་དམངས་སྲིད་གཞུང་གི་འགོ་གཙོ་ཆེ་དགྲ་ལྷའི་ཚབ་ལ་ཡན་ཅིན་ཧའེ་ཞེས་མི་རིགས་བོད་པ་ཡིན་པ་གང་ཞིག་ལ་རུས་མི་རྒྱ་ཡིན་པ་ཞིག་བོད་རང་སྐྱོང་ལྗོངས་མི་དམངས་སྲིད་གཞུང་གི་འགོ་གཙོར་བསྐོ་བཞག་བྱས་ཡོད། ཡན་ཅིང་ཧའེ་ནི་སྤྱི་ལོ་ ༡༩༦༢ མཚོ་སྔོན་ནས་སྐྱེས་པ་དང་། མཚོ་སྔོན་མི་རིགས་སློབ་གྲྭ་ནས་མཐར་ཕྱིན་པ་ཞིག་རེད་འདུག
