འབྲེལ་མཐུད།
བསྟན་འཛིན་པ་སངས། (བོད་སྐད། ཧིན་དྷི། ཨིན་ཇི།) +༩༡ ༩༦༦༧༡༤༥༧༧༢ tenpassang@studentsforfreetibet.org
བསྟན་འཛིན་བཀྲ་ཤིས། ( ཧིན་དྷི་དང་ཨིན་ཇི། ) +༩༡ ༨༨༠༠༥༣༤༨༤༧ tibetparty4@gmail.com
༄༅།།ཕྱི་ཟླ་ ༡༠ ཚེས་ ༢༢ རེས་གཟའ་པ་སངས་ཉིན། བཞུགས་སྒར་རྡ་རམ་ས་ལར། འཛམ་གླིང་ས་ཕྱོགས་གང་སའི་བོད་མི་དང་བོད་དོན་རྒྱབ་སྐྱོར་བ་རྣམས་གོ་ལའི་གནམ་གཤིས་ཚབ་ཆེའི་འགྱུར་བ་འགོག་པའི་ལས་འགུལ་དེ་བཞིན། ཕྱི་ལོ་༢༠༢༡ ཟླ ༡༠ ཚེས་ ༣༡ ནས་ ཟླ་མ ༡༡ ཚེས་ ༡༢ བར། ཨིན་ཡུལ་གྱི་གྲོང་ཁྱེར་གྷ་ལ་སི་ཀོ་དུ་འཁོར་ཡུག་ཚོགས་ཆེན་ COP༢༦ འཚོགས་པའི་གོང་དུ། བོད་ཀྱི་ཚབས་ཆེའི་གནམ་གཤིས་འགྱུར་ལྡོག་གི་ཆེད་གོ་རྟོགས་དང་ལས་འགུལ་སྤེལ་རྒྱུ་ཡིན།
དཔལ་རི་སིའི་གྲོས་ཆོད་ནང་། ས་གོ་ལའི་ཚ་དྲོད་ ༢°C དང་། བྱུང་ན། ༡.༥ °C ལས་ལྷག་མི་བརྒལ་བར་ཚོད་འཛིན་བྱས་རྒྱུའི་ཐག་གཅོད་བྱུང་ཡོད། ཡིན་ན་ཡང་། ནུབ་ཡུ་རོབ་དང་རྒྱ་ཁྱོན་མཚུངས་པའི་ཨི་ཤ་ཡ་ཡི་འབུར་དུ་ཐོན་པའི་སྙིང་ལྟ་བུ་རྒྱ་མཚོའི་ངོས་ནས་མཐོ་ཚད་མི་ཊར ༤༠༠༠ དུ་ཆགས་པའི་བོད་ཀྱི་ཚ་དྲོད་ནི། དེ་དག་གི་ལྡབ་གཉིས་འཕར་གྱིན་ཡོད་པས། ཚབས་ཆེའི་འགྱུར་བ་དེ་བརྟེན་ནས། ཆར་ཆུ་བབ་ཚད་སོགས་ལ་འགྱུར་བ་ཆེན་པོ་ཕྱིན་སྟབས། གཏན་ཆགས་ཀྱི་གངས་རིའི་འཁྱགས་རོམ་ཊོན་ཐེར་འབུམ་ ༨ བཞུར་འགྲོ་བཞིན་ཡོད། དེའི་དབང་གིས་བོད་ཀྱི་ཆུའི་འབྱུང་ཁུངས་ལ་བརྟེན་ནས་འཚོ་མཁན་འཛམ་གླིང་གི་མི་འབོར་ཐེར་འབུམ ༡.༥ ལྷག་ཙམ་ལ་ཆུའི་དཀའ་ངལ་འཕྲད་བཞིན་ཡོད།
དེར་བརྟེན་ COP༢༦ དང་རྒྱ་ནག་ལ།ང་ཚོའི་དགོས་འདུན་ནི།
- འཛམ་གླིང་ཐོག་བོད་མཐོ་སྒང་གི་ཁོར་ཡུག་དེའི་གལ་གནད་ COP༢༦ གིས་ངོས་འཛིན་བྱེད་དགོས་པ་མ་ཟད། འཛམ་གླིང་གི་ཁོར་ཡུག་སྐོར་གླེང་སློང་གི་སྙིང་པོར་འཇོག་དགོས།
- བོད་མི་དང་། ལྷག་པར་དུ་བོད་ཀྱི་འབྲོག་པ་ས་ཡ་གཉིས་ལྷག་རྣམས་ལ་འཚོ་གནས་རང་དབང་གི་གཞི་རྩའི་འགྲོ་བ་མིའི་ཐོབ་ཐང་ལོངས་སུ་སྤྱོད་ཐུབ་པ་བྱ་དགོས་པ་དང་། རང་མོས་ཀྱི་ཐོག་ནས་གནམ་གཤིས་འགྱུར་ལྡོག་ལྟར་རྩ་ཐང་སྟེང་དུ་འཚོ་བ་སྐྱེལ་ཐུབ་པ་དགོས་རྒྱུ།
- བོད་དང་བོད་ཀྱི་ཆུའི་འབྱུང་ཁུངས་ལ་བརྟེན་ནས་འཚོ་བའི་རྒྱལ་ཁབ་རྣམས་ཀྱིས་མཉམ་རུབ་ཐོག་ནས་གནམ་གཤིས་འགྱུར་ལྡོག་ལ་བརྟེན་པའི་ཚོད་འཛིན་དང་། ཕྱི་གསལ་ནང་གསལ་གྱི་ཐོག་ནས་ཕུག་རྒྱང་རིང་པོའི་སྐྱོང་ཐབས་བྱེད་ཐུབ་པ་བྱ་དགོས།
བོད་ཀྱི་གཞོན་ནུ་ལྷན་ཚོགས་ཀྱི་སྤེན་པ་ཚེ་རིང་ནས་གསུང་དོན།
སླེབས་ལ་ཉེ་བའི་ཨིན་ཡུལ་གྱི་གྲོང་ཁྱེར་གྷི་ལ་སི་གྷོ་ནང་རྒྱལ་ཁབ་ ༡༩༠ ལྷན་དུ་འཚུགས་རྒྱུའི་ COP༢༦ ཚོགས་ཆེན་ཐོག རྒྱལ་ཁབ་སོ་སོའི་ཁ་རླུང་སྦགས་རྩོག་ཉུང་དུ་ཇི་ལྟར་གཏོང་རྒྱུའི་འཆར་གཞི་དང་། ༢༠༡༥ ལོའི་དཔལ་རི་སིའི་གྲོས་ཆོད་དུ་ས་གོ་ལའི་ཚ་དྲོད་ ༡.༥°C ལས་མ་བརྒལ་བའི་ཐག་གཅོད་དེ་གང་འདྲ་བྱས་ཏེ་ལག་ལྟར་བྱ་རྒྱུའི་སྐོར་ལ་གྲོས་མོལ་བྱ་རྒྱུ་རེད།
བོད་མི་རྣམས་ནས་རྒྱལ་སྤྱིའི་ཐོག་བོད་མཐོ་སྒང་དེ་ཡུན་རིང་སྲུང་སྐྱོབ་དང་གཅེས་སྐྱོང་གི་གལ་གནད་ཐབས་ལམ་རྣམས་གྲོས་མོལ་གྱི་བརྗོད་གཞིར་ངེས་པར་ཚུད་ཐུབ་པ་བྱེད་དགོས།
རྒྱ་ནག་གི་བཙན་གནོན་འོག་ཏུ་ཡོད་པའི་བོད་མི་རྣམས་ལ་སྨྲ་བརྗོད་རང་དབང་ཐད་དམ་དྲག་ཤུགས་ཆེན་ཡོད་པར་བརྟེན། རྒྱལ་སྤྱིའི་གནམ་གཤིས་འགྱུར་ལྡོག་གི་སྐོར་ལ་གླེང་སློང་བྱེད་སྐབས་བོད་མི་རྣམས་ཀྱི་བསམ་ཚུལ་ཤོད་དབང་མེད་སྟབས། བསམ་ཚུལ་དེ་དག་སླེབས་ཐུབ་པ་བྱ་རྒྱུ་ནི་ཧ་ཅང་གལ་ཆེན་པོ་ཡིན། དེར་མ་ཟད། ཉམས་ཆག་འགྲོ་སླ་བའི་བོད་མཐོ་སྒང་གི་སྐྱེ་ཁམས་ཁོར་ཡུག་དང་། ཆུའི་འབྱུང་ཁུངས། ཚད་ལས་བརྒལ་བའི་གཏོར་སྐྱོན་གྱི་རིགས་རྣམས་འཕྲལ་མར་མཚམས་འཇོག་བྱ་དགོས།
བོད་ཀྱི་བུད་མེད་ཚོགས་པའི་དབང་ལགས་ཀྱིས་གསུང་དོན།
བོད་ཀྱི་གནམ་གཤིས་འགྱུར་ལྡོག་གི་གོད་ཆག་འདི་བོད་ཀྱི་གནད་དོན་ཙམ་མ་ཡིན་པར་རྒྱལ་སྤྱིའི་གནད་དོན་ཞིག་ཡིན། བྱས་ཙང་། འཛམ་གླིང་ས་ཕྱོགས་གང་སར་ཡོད་པའི་བོད་མི་དང་བོད་དོན་རྒྱབ་སྐྱོར་བ་རྣམས་ནས་རྒྱལ་སྤྱིའི་ས་གོ་ལའི་གནམ་གཤིས་འགྱུར་ལྡོག་གི་ལས་འགུལ་དེར་མཉམ་ཞུགས་དང་རྒྱབ་སྐྱོར་བྱེད་བཞིན་ཡོད། རྒྱ་ནག་གིས་བོད་ཐོག་འཛིན་པའི་ཡར་རྒྱས་གཏོང་རྒྱུའི་སྲིད་བྱུས་དེ་བོད་ཀྱི་དངོས་ཡོད་གནས་ཚུལ་ཆ་མ་བཞག་པའི་ཐོག་ནས་བྱུང་བ་ཞིག་རེད། རྒྱ་གཞུང་གིས་རང་ཉིད་ཀྱི་ནོར་འཁྲུལ་ལ་ཁས་ལེན་མ་བྱས་པར། འདས་པའི་ལོ་རྒྱུས་ནང་གསལ་བ་ལྟར། སྲིད་བྱུས་དེ་དག་དྲང་བདེན་མ་ཡིན་པ་མ་ཟད། བོད་མི་རྣམས་ཀྱི་དགོས་འདུན་དང་བསམ་ཚུལ་ལ་བརྩི་འཇོག་མ་བྱས་པར་བཙན་ཤེད་ཀྱི་ཐོག་ནས་ལག་བསྟར་བྱེད་ཀྱི་ཡོད་པ་བཅས།
བཞུགས་སྒར་རྡ་རམ་ས་ལའི་ས་གནས་འགོ་འཛིན་ཁོར་ཡུག་སྡེ་ཚན། བོད་ཀྱི་དགུ་བཅུ་གསུམ་ལས་འགུལ་ཚོགས་པ། རྒྱལ་སྤྱིའི་བོད་དོན་འབྲེལ་མཐུད་ལས་ཁང་། ལྷ་སྤྱི་ཚོགས་ཞབས་ཞུ་ཁང་། བོད་རྒྱལ་ཡོངས་མང་གཙོ་ཚོགས་པ། བོད་རང་བཙན་སློབ་ཕྲུག་ཚོགས་པ། བོད་ཀྱི་བུད་མེད་ལྷན་ཚོགས། བཅས་ཚོགས་པ་བདུན་ཐུན་མོང་ནས། ཕྱི་ལོ་༢༠༢༡ ཟླ་ ༡༠ ཚེས་ ༢༢ ཉིན།