ཞི་ཅིང་ཕིང་གི་ནང་མི་ཚང་མར་ཉེས་ཆད།

ཉེ་ལམ་ཨ་རིའི་སྤྱི་མཐུན་ཚོགས་པའི་གྲོས་ཚོགས་འཐུས་མི་ཚོས་རྒྱ་ནག་གཞུང་གི་གནས་ཡོད་མི་སྣ་དང་དེའི་གཉེན་ཉེ་སོགས་ཀྱི་ནང་མི་ཚང་མར་ཉེས་ཆད་གཅད་རྒྱུའི་གྲོས་གཞི་བཏོན་ཡོད། གྲོས་གཞི་དེའི་ནང་ཐ་ན་རྒྱ་ནག་གི་ད་ལྟའི་སྲིད་འཛིན་ཞི་ཅིང་ཕིང་དང་དེའི་ནང་མི་ཚུད་ཡོད་པ་མ་ཟད། རྒྱ་ནག་དམར་ཤོག་ཚོགས་པའི་རྒྱལ་ཡོངས་འཐུས་མི་ཚོགས་ཆེན་གྱི་འཐུས་མི་རྣམས་ཀྱང་ཚུད་ཡོད་ཚུལ་བསྟན་འདུག དེ་ལ་བལྟས་ན་རྒྱ་ནག་གི་མཐོ་རིམ་མི་སྣ་གཅིག་ཀྱང་མ་ལུས་པ་ཉེས་ཆད་གཅོད་པའི་ཁྲིམས་གཞི་དེའི་ནང་ཚུད་ཀྱི་ཡོད་པ་མ་ཟད། ཁོ་ཚོའི་ནང་མི་བུ་ཕྲུག་ཚང་མ་ཡང་ཚུད་ཀྱི་ཡོད། གལ་ཏེ་གྲོས་གཞི་དེ་དངོས་སུ་གྲོས་འཆམ་བྱུང་ཚེ་རྒྱ་ནག་དང་ཨ་རིའི་དབར་ལ་སླར་ཡང་རྣོ་ངར་ཅན་གྱི་གྲང་དམག་གསར་པ་ཞིག་འགོ་འཛུགས་ཉེན་ཡོད། མ་ཟད་ད་ཐེངས་ཀྱི་གྲོས་གཞི་དེས་འདི་ལོའི་ལོ་མཇུག་ཏུ་སྐོང་འཚོགས་བྱ་རྒྱུའི་རྒྱ་ནག་དམར་ཤོག་ཚོགས་པའི་རྒྱལ་ཡོངས་ཚོགས་ཆེན་ཐེངས་ཉི་ཤུའི་གྲོས་རིམ་ཁག་བདེ་བླགས་ཡོང་རྒྱུ་དང་། ཞི་ཅིང་ཕིང་གི་མ་འོངས་པའི་ལས་འཆར་མང་པོ་ཞིག་ཕམ་ཉེས་འགྲོ་རྒྱུའི་ཉེན་ཁ་ཡོད། ད་ལྟའི་གནས་སྟངས་ལ་གཞིགས་ན། ཞི་ཅིང་ཕིང་གིས་མུ་མཐུད་ནས་སྲིད་དབང་གཟུང་རྒྱུ་རྩོད་མེད་ཆགས་ཟིན་པ་མ་ཟད། ཁྲིམས་ཐོག་གི་འགལ་རྐྱེན་མང་པོ་ཞིག་ཀྱང་ལམ་བཤངས་རྒྱབ་ཟིན་པ་རེད། ཏེང་ཞའོ་ཧྤེང་གི་དུས་སྐབས་སུ་རྒྱ་ནག་གི་འགོ་ཁྲིད་ལམ་ལུགས་དེ། ཚེ་གང་རིང་དབང་འཛིན་བྱེད་པའི་མའོ་ཙེ་ཏུང་གི་ལམ་སྲོལ་བསྒྱུར་བཅོས་བྱས་ཏེ་ལས་ཡུན་དང་ལོ་ཚད་གཉིས་ཀ་ཚད་བཀག་བཟོས་ཡོད་པ་དང་། ཅང་ཙེ་མིན་དང་ཧུའུ་ཅིན་ཐའོ་གཉིས་ཀས་ལམ་ལུགས་དེ་གཞི་རྩར་བཟུང་ནས་རྒྱུན་འཛིན་པ་གསོ་སྐྱོང་དང་ལས་རྒྱུན་རྩིས་སྤྲོད་བྱས་ཡོད་ཀྱང་། ཞི་ཅིང་ཕིང་གིས་ཏེང་ཞའོ་ཧྤིང་གིས་གསར་གཏོད་བྱས་པའི་ལམ་སྲོལ་མང་པོ་ཞིག་འགྱུར་བ་བཏང་ནས། དེའི་ནང་དུ་གལ་གནད་ཆེ་ཤོས་ཀྱི་གནད་དོན་གཅིག་ནི་འགོ་ཁྲིད་ཀྱི་ལས་ཡུན་དང་ལོ་ནའི་ཚད་བཀག་གི་འགོག་རྐྱེན་མེད་པར་བཟོས་ཡོད། ཐ་ན་དེང་སྐབས་ཏེང་ཞའོ་ཧྤེང་གི་སྲིད་ཇུས་ཡོངས་ཀྱི་བླ་སྲོག་ལྟ་བུའི་བསྒྱུར་བཅོས་སྒོ་དབྱེ་ཞེས་པའི་ཚིག་དེ་ཡང་གཞུང་འབྲེལ་གཏམ་བཤད་དང་ཡིག་ཆའི་ནང་ཧ་ལམ་མཐོང་དཀོན་པའི་གནས་སྟངས་ཤིག་ཆགས་ཡོད། དེར་བརྟེན། ཞི་ཅིང་ཕིང་ལ་ཏང་ནང་ཁུལ་དུ་ཁ་གཏད་རང་བཞིན་གྱི་འགལ་རྐྱེན་དེ་ཆུང་ཆུང་ཞིག་གཏན་ནས་མིན། སྤྱི་ལོ་ ༢༠༡༢ ལོ་ནས་བཟུང་ཞི་ཅིང་ཕིང་གིས་སྲིད་དབང་བཟུང་རྗེས་ཀྲའུ་ཡུང་ཁང་དང་། སྦོའོ་ཤི་ལའེ། ཞུས་ཚའེ་ཧུའུ། ཀོའོ་སྦོའོ་ཞུང་། རླིང་ཅིས་ཧྭ་སོགས་རྒྱ་ནག་གི་ཆབ་སྲིད་སྡིངས་ཆའི་ཐོག་སྟག་གཟིགས་འདྲ་བའི་དཔོན་རིགས་མང་པོ་ཞིག ཁོ་ཚོའི་ཕྱོགས་གཏོགས་མ་ལག་དང་བཅས་པ་ཚར་གཅོད་བྱས་ཡོད་པས་དམར་ཤོག་ཚོགས་པའི་ནང་ཁུལ་དུ་ཆགས་པའི་ཞི་ཅིང་ཕིང་གི་ཁ་གཏད་ཀྱི་སྟོབས་ཤུགས་དེ་ཆུང་ཆུང་ཞིག་གཏན་ནས་མིན་ལ། དེའི་ཐོག་ཨ་རིའི་གྲོས་ཚོགས་ནས་ཁྲིམས་གཞི་དེ་འདྲ་ཞིག་ལ་གྲོས་འཆམ་བྱས་ཚེ་དེང་སྐབས་ཞི་ཅིང་ཕིང་གིས་ཡིད་ཆེས་བྱེད་སའི་ཏང་སྲིད་དམག་གསུམ་གྱི་འགོ་ཁྲིད་དང་། ཁོ་ཚོའི་བུ་རྒྱུད་དང་བཅས་པར་ཉེས་ཆད་ཕོག་གི་ཡོད་པས། དམར་ཤོག་ཚོགས་པ་ནང་ཁུལ་དུ་སླར་ཡང་ཞི་ཅིང་ཕིང་གིས་མུ་མཐུད་ནས་སྲིད་དབང་འཛིན་དགོས་མིན་ཐད་རྩོད་རྙོག་གསར་པ་དང་འཐབ་རྩོད་གསར་པ་ཞིག་འགོ་འཛུགས་བྱེད་ཉེན་ཡོད་པ་དང་། སྡུག་ས་ནས་བཤད་ན། བསམ་ཡུལ་ལས་འདས་ཤིང་ཁྲག་དྲི་བྲོ་བའི་གདོང་གཏུགས་ཀྱི་གནས་ཚུལ་ཡང་ཐོན་མི་སྲིད་པ་མིན། དེ་དང་ཆབས་ཅིག་ཏུ་ཉིན་ཤས་གོང་ཨ་རིའི་གྲོས་ཚོགས་འོག་མའི་ནང་ཟླ་བ་མང་པོའི་རིང་གྲོས་བསྡུར་བྱས་ཏེ་བོད་དོན་ལ་སྔར་ལས་ལྷག་པའི་རྒྱབ་སྐྱོར་བྱ་ཆེད་བོད་དོན་བདེན་རྒྱབ་ཀྱི་ཁྲིམས་གཞི་གསར་པ་ཞིག་ལ་མང་མོས་ཀྱིས་ཚད་མཐོའི་རྒྱབ་སྐྱོར་ཞུས་པའི་ཐོག་ནས་ཐག་གཅོད་བྱུང་ཡོད་པ་དང་། གཞན་ཡང་ཁྲིམས་གཞི་དེའི་ནང་ཨ་རིའི་གཞུང་གི་ངོས་ནས་བོད་དོན་དེ་བཞིན། ཨ་རིིའི་ཕྱི་འབྲེལ་གནད་དོན་ནང་གི་གལ་གནད་ཆེ་བའི་གནད་དོན་ཞིག་ལ་ངོས་འཛིན་བྱས་ཡོད་པ་དང། དེ་ཡང་རྒྱ་ནག་གཞུང་གིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གི་སྐུའི་ཡང་སྲིད་དང་། བོད་ཀྱི་སྤྲུལ་སྐུའི་ཡང་སྲིད་ངོས་འཛིན་བྱེད་ཕྱོགས་ཀྱི་ཐད། རྒྱ་ནག་གཞུང་གིས་ཐེ་བྱུས་བྱས་པ་དེ་ངོས་ལེན་མེད་ལུགས་སོགས་གསལ་སྟོན་གནང་ཡོད་པ་མ་ཟད། ཨ་རིའི་ཕྱི་སྲིད་ལས་ཁུངས་ནང་བོད་དོན་དམིགས་བསལ་འབྲེལ་མཐུད་པའི་གནས་བབ་དེ་ཡང་ཇེ་མཐོར་གཏང་དགོས་པ་དང། པེ་ཅིང་དུ་ཡོད་པའི་ཨ་རིིའི་གཞུང་ཚབ་ཁང་དུ་བོད་དོན་དང་འབྲེལ་བའི་ལས་དོན་བྱེད་མཁན་ཕྱི་འབྲེལ་གྱི་མི་སྣ་ཞིག་ཆེད་མངགས་བསྐོ་བཞག་བྱེད་དགོས་པ། ལྷག་པར་དུ་པེ་ཅིང་ལ་ཡོད་པའི་ཨ་རིའི་གཞུང་ཚབ་ཁང་གི་ལས་བྱེད་ཚོར་བོད་སྐད་སློབ་ཁྲིད་ཀྱི་སྦྱོང་བརྡར་སྤྲོད་དགོས་པ་སོགས་གནད་དོན་མང་པོ་ཞིག་ཐག་གཅོད་བྱས་ཡོད་འདུག །