ཨུ་རུ་སུས་ཡུག་རིིན་ལ་བཙན་འཛུལ་དམག་འཁྲུག་བསླངས་ནས་བདུན་ཕྲག་གསུམ་ཙམ་འདས་ཟིན། ཕུ་ཀྲིན་གྱིས་ཐོག་མའི་སྔོན་དཔག་ལྟར་ན་ཉིན་གཉིས་ཙམ་གྱི་རིང་ཡུག་རིན་དེ་ཕྱོགས་ཡོངས་ནས་ཨུ་རུ་སུས་ཚོད་འཛིན་ཐུབ་རྒྱུ་ཡིན་པའི་ངོས་འཛིན་བྱས་ཡོད་ཀྱང་ཟླ་ ༢ ཚེས་ ༢༤ ཉིན་ཕུ་ཀྲིན་གྱིས་དངོས་སུ་དམག་དོན་གྱི་བྱ་སྤྱོད་སྤེལ་རྗེས་གཡུལ་སའི་ཐོག་གི་དངོས་ཡོད་གནས་ཚུལ་དང་ཕུ་ཀྲིན་གྱིས་སྔོན་དཔག་བྱས་པའི་གནས་ཚུལ་ཡོངས་སུ་ལྡོག་པའི་ཕྱོགས་ལ་འགྱུར་བ་མ་ཟད། རང་གི་མཐུན་གྲོགས་རྒྱ་ནག་གཞུང་གིས་ཀྱང་དམག་འཁྲུག་གི་འཕེལ་ཕྱོགས་དང་བསྟུན་ནས་ལང་ཕྱོགས་ཀྱང་ཁྱ་རེ་ཁྱོ་རེ་ཞིག་འཛིན་ཅིང་ཡོད་སྟབས། སྲིད་འཛིིན་ཕུ་ཀྲིན་ནི་གང་བྱ་འདི་བྱེད་མེད་པ་ཞིག་ཆགས་ཡོད། དེ་ཡང་ཨུ་རུ་སུས་ཡུག་རེན་ལ་བཙན་འཛུལ་གྱི་དམག་འཁྲུག་དངོས་སུ་བསླངས་པ་དང་། དེ་རྗེས་མཉམ་འབྲེལ་རྒྱལ་ཚོགས་ནང་ཨུ་རུ་སུས་ཡུག་རིན་ལ་བཙན་འཛུལ་དམག་འཁྲུགས་བསླངས་པའི་གནད་དོན་ཐོག་འོས་ཤོག་འཕེན་སྐབས་རྒྱལ་ཁབ་མང་ཆེ་བས་ཡུག་རེན་གྱི་ཕྱོགས་སུ་ལངས་ནས་རྒྱབ་སྐྱོར་དང་ཨུ་རུ་སུར་ངོ་རྒོལ་བྱས་ཡོད་ཀྱང་། རྒྱ་ནག་གཞུང་གིས་བར་གནས་སུ་བསྡད་ནས་ཡུག་རིང་ལ་རྒྱབ་སྐྱོར་བྱས་མེད་པ་མ་ཟད། ད་དུང་རྒྱ་ནག་གི་འབྲེལ་ཡོད་དཔོན་རིགས་ཚོས་ཡུག་རིན་གི་གནད་དོན་དེ་ནི་ལོ་རྒྱུས་དང་འབྲེལ་བའི་གནད་དོན་རྙོགས་འཛིང་ཅན་ཞིག་རེད་ཅེས་ཨུ་རུ་སུའི་འགྲེལ་བརྗོད་དང་འདྲ་བའི་གླེང་སློང་བྱས་ཡོད།
ཡིན་ནའང་། ཡུག་རིན་གྱིས་ཨུ་རུ་སུའི་དཔུང་དམག་ལ་གདོང་ལེན་བྱེད་པའི་སྙིང་སྟོབས་དང་ཐབས་བྱུས་ལ་འཛམ་གླིང་མི་མང་ཧ་ལས་སུ་བཅུག་པ་དང་། སྲིད་འཛིན་ཛེ་ལིང་སི་ནི་སྐབས་ཤིག་གི་རིང་རྒྱལ་སྤྱིའི་སྤྱི་ཚོགས་དང་འཛམ་གླིང་མི་དམངས་ཀྱིས་གླེང་གཞིའི་གཙོ་བོར་གྱུར་བའི་དཔའ་རྒོད་ཅིག་ཆགས་ཡོད། བདུན་ཕྲག་གསུམ་ལྷག་ཙམ་འདས་ཟིན་ཀྱང་ཨུ་རུ་སུའི་དམག་དཔུང་གིས་ཡུག་རེན་གྱི་གྲོང་ཁྱེར་གཅིག་ཀྱང་ཆ་ཚང་བར་དབང་དུ་བསྡུ་ཐུབ་མེད་ལ། དེ་ལས་ལྡོག་ཏེ་ཡུག་རེན་གྱི་དམག་དཔུང་དང་མི་དམངས་མཉམ་འབྲེལ་གྱི་སྟོབས་ཤུགས་ལ་བརྟེན་ནས་ཨུ་རུ་སུའི་དམག་འཐབ་གནམ་གྲུ་དང་། ཐད་འཕུར་གནམ་གྲུ། ལྕགས་གྲབས་འཁོར་ལོ་སོགས་འབོར་ཆེན་ཞིག་གཏོར་ཕམ་བཏང་བ་མ་ཟད། ཡུག་རེན་རྒྱལ་སྲུང་ཁང་ནས་སྤེལ་བའི་གནས་ཚུལ་ལ་བལྟས་ན། ད་བར་ཨུ་རུ་སུའི་དམག་མི་ཁྲི་གཅིག་ལ་ཉེ་བ་ཚེ་སྲོག་ཤོར་ཟིན་ལུགས་ཁྱབ་བསྒྲགས་བྱས་ཡོད་པ་དང་། སྟོབས་ཆེན་ཨུ་རུ་སུའི་མདུན་དུ་ཡུག་རེན་གྱིས་གདོང་ལེན་འདི་ལྟ་བུ་ཞིག་བྱེད་ངེས་ཡིན་པ་ཕུ་ཀྲིན་གྱི་བསམ་པའི་ཡུལ་དུ་གཏན་ནས་འཁོར་མེད་ཤས་ཆེ་ལ། ཞི་ཅིང་ཕིང་གི་བློ་ཡུལ་དུའང་རྩ་བ་ནས་འཆར་མེད་ཚོད་རེད། གང་ཡིན་ཞེ་ན། དམག་འཁྲུག་འགོ་ཚུགས་མ་ཐག་གི་ཐོག་མའི་བརྒྱུད་རིམ་དང་འགོ་མ་བཙུགས་གོང་རྒྱ་ནག་གཞུང་འབྲེལ་གྱིས་སྤེལ་བའི་གནས་ཚུལ་ལ་བལྟས་ན། ད་ཐེངས་ཀྱི་དམག་འཁྲུག་དེའི་ནང་ཕུ་ཀྲིན་ལ་གཟེངས་སུ་ཐོན་པའི་གྲུབ་འབྲས་ཐོབ་རྒྱུ་ཡིན་པ་དང་། དེ་ལ་བརྟེན་ནས་རྒྱ་ནག་གཞུང་གིས་ཀྱང་ཐེ་ཝན་དབང་དུ་བསྡུ་རྒྱུའི་མིག་དཔེ་བལྟ་ས་ཞིག་ཐོབ་རྒྱུ་ཡིན་པའི་འཆར་བཀོད་བྱས་ཡོད། དཔེར་ན། ཟླ་ ༢ ཚེས་ ༤ ཉིན་རྒྱ་ནག་གཞུང་འབྲེལ་གྱིས་སྤེལ་བའི་གསར་འགོད་གསལ་བསྒྲགས་ནང་། རྒྱ་ནག་དང་ཨུ་རུ་སུའི་འབྲེལ་ལམ་ནི་མུ་མཐའ་མེད་པའི་འབྲེལ་ལམ་ཞིག་ཡིན་ཞེས་བརྗོད་པ་མ་ཟད། ཨུ་རུ་སུའི་ཕྱོགས་ནས་ཀྱང་པེ་ཅིང་གི་དགུན་དུས་ཨོ་རྩལ་འགྲན་ཚོགས་མཇུག་སྒྲིལ་མ་བྱས་བར་ངང་སྒུག་བྱས་པ་དང་། ཨོ་རྩལ་འགྲན་ཚོགས་མཇུག་བསྒྲིལ་མ་ཐག་ཡུག་རེན་ལ་དངོས་སུ་བཙན་འཛུལ་གྱིས་ཧམ་སེམས་ཆེན་པོའི་ཐོག་ནས་དམག་འཁྲུག་བསླངས་ཡོད།
ཡིན་ནའང་། དམག་འཁྲུག་འགོ་ཚུགས་པའི་ཉིན་དེ་ནས་བཟུང་ད་བར་གྱི་གནས་ཚུལ་ལ་བལྟས་ན་ཡུག་རེན་གྱི་དམག་འཐབ་ནི་ཕུ་ཀྲིན་གྱི་མགོ་བོར་གཡོག་པའི་ཀོ་བ་རློན་པའི་ཞྭ་མོ་ཞིག་དང་འདྲ་བར་ཉིན་རེ་ལས་མ་བསྡད་པར་དམ་དུ་དམ་དུ་འགྲོ་བཞིན་ཡོད་པ་དང་། དེའི་ཐོག་རྒྱལ་སྤྱིའི་སྤྱི་ཚོགས་ཀྱིས་ཨུ་རུ་སུར་ཕྱོངས་ཡོངས་ནས་དཔལ་འབྱོར་གྱི་ཉེས་ཆད་ལྕི་མོ་བཅད་པ་ལ་སོགས་པའི་བྱ་ཐབས་དེ་ཚོས་ཕུ་ཀྲིན་ནི་ཧ་ལས་ཤིང་ཧོན་འཐོར་བ་དང་། ཞི་ཅིང་ཕིང་གིས་ཐེ་ཝན་དབང་དུ་བསྡུ་རྒྱུ་དེ་ཡང་རེ་ཐག་ཆད་པ་ལྟ་བུ་ཞིག་ཆགས་ཡོད་པ་མ་ཟད། ཐ་ན་ད་ཆ་རྒྱ་ནག་གཞུང་གིས་དམག་འཁྲུག་འགོ་ཚུགས་པའི་དུས་སྐབས་དང་མི་འདྲ་བའི་རྣམ་འགྱུར་གཞན་ཞིག་ཀྱང་བསྟན་གྱི་ཡོད་པ་སྟེ། དམག་འཁྲུག་མཚམས་འཇོག་གིས་ཞི་གྲོས་དགོས་པ་དང་།་ཡུག་རིན་མི་དམངས་ལ་གདུང་སེམས་མཉམ་སྐྱེད་ཡོད་ཟེར་བ། ཡུག་རིན་གྱི་མི་མང་ལ་མི་སྤྱོད་རིང་ལུགས་ཀྱི་རོགས་སྐྱོར་བྱེད་པ་སོགས་གཏམ་བཤད་སྤེལ་སྟངས་དང་ལང་ཕྱོགས་འཁྱེར་སྟངས་ལ་འགྱུར་ལྡོག་འགྲོ་བཞིན་ཡོད། ལྷག་པར་དུ་ཨ་རིའི་སྲིད་འཛིན་ཇོ་བོ་དཔལ་ལྡན་གྱིས་གལ་ཏེ་རྒྱ་ནག་གཞུང་གིས་ཨུ་རུ་སུར་རྒྱབ་སྐྱོར་བྱས་ཚེ་རྒྱ་ནག་ལའང་ཨུ་རུ་སུ་དང་འདྲ་བའི་དཔལ་འབྱོར་གྱི་ཉེས་ཆད་དྲག་པོ་གཅོད་རྒྱུ་ཡིན་ལུགས་ནན་བརྗོད་བྱས་ཡོད་སྟབས། རྒྱ་ནག་གཞུང་གིས་ཀྱང་ད་ཆ་ཕུ་ཀྲིན་འདམ་ཉོག་ནང་ནས་འདོན་ཐབས་བྱས་ཚེ་སོ་སོའི་རྒྱལ་ཁབ་ཀྱང་འདམ་རྙོགས་ནང་མཉམ་དུ་འཐིམ་རྒྱུ་ཡིན་པའི་ངོས་འཛིན་གསལ་པོ་ཞིག་ཐོབ་བཞིན་ཡོད།
