འདི་ལོའི་ལོ་མཇུག་ཏུ་རྒྱ་ནག་དམར་ཤོག་ཚོགས་པའི་རྒྱལ་ཡོངས་ཚོགས་ཆེན་ཐེངས་ཉི་ཤུ་པ་སྐོང་འཚོགས་བྱ་རྒྱུུ་དང། ཚོགས་ཐོག་ཏུ་ཞི་ཅིང་ཕིང་མུ་མཐུད་ནས་རྒྱ་ནག་གི་སྲིད་འཛིན་བྱ་རྒྱུའི་སྟ་གོན་བྱེད་བཞིན་ཡོད། རྨིས་ལམ་དེའི་དོན་དུ་ཞི་ཅིང་ཕིང་གིས་འདས་པའི་མི་ལོ་བཅུ་ཕྲག་གཅིག་ལ་ཉེ་བའི་རིང་འབད་བརྩོན་ཡོད་རྒུ་བྱས་ཡོད་པ་དང་། ཐ་ན་རྒྱ་ནག་གི་རྩ་ཁྲིམས་ལའང་བཟོ་བཅོས་བྱས་ཏེ་མུ་མཐུད་ནས་སྲིད་དབང་བཟུང་རྒྱུུའི་ལམ་བུ་བཤངས་ཡོོད། ཡིན་ནའང། ཉེ་ལམ་ཞི་ཅིང་ཕིང་མུ་མཐུད་ནས་སྲིད་དབང་བཟུང་རྒྱུར་འགོག་རྐྱེན་བར་ཆད་འགྲོ་གཞིའི་གནད་དོན་གསར་པ་མང་པོ་ཞིག་ཐོན་བཞིན་ཡོད་ཅིང། དེའི་ནང་ནས་གཅིག་ནི་རྒྱ་ནག་ནང་ཏོག་དབྱིབས་རིམས་ནད་བསྐྱར་ལོག་བྱས་ཏེ་མི་དམངས་ས་ཡ་མང་པོ་རང་ཁྱིམ་དུ་བཀག་བསྡོམས་བྱས་ཡོད་པ་དེ་རེད། འཛམ་གླིིང་ཡོངས་སུ་ཏོག་དབྱིབས་རིམས་ནད་རྩ་བའི་ཆ་ནས་སྔོན་འགོག་ཐུབ་པ་མ་ཟད། འགོག་ཁབ་རྒྱག་འགོ་ཚུགས་རྗེས་རིམས་ནད་དེའི་ངར་ཤུགས་དེ་བས་ཀྱང་ཇེ་ཆུང་དུ་སོང་ནས་མིའི་ཚེ་སྲོག་ལ་སྔོན་མ་ལྟ་བུའི་ཉེན་ཁ་མེད་སྟབས། ཏོག་དབྱིབས་རིམས་ནད་ཐོན་ཀྱང་དེ་སྔ་ནང་བཞིན་ཁྱིམ་སྡོད་བཀག་རྒྱ་བསྡམས་པའི་ལམ་སྲོལ་དེ་ཡང་རྩ་བའི་ཆ་ནས་མེད་པ་བཟོས་ཡོད། ཡིན་ནའང།རྒྱ ་ནག་གི་གྲོང་ཁྱེར་ཆེ་ཤོས་ཧྲང་ཧའེ་ནང་དེང་སྐབས་རིམས་ནད་བསྐྱར་ལོག་རྒྱག་བཞིན་ཡོད་པ་དང་། རྒྱལ་སྤྱིའི་རྒྱུད་ལམ་ཁག་གི་ནང་ཐོན་པར་གཞིགས་ན་དེང་སྐབས་ཉིན་རེར་ཧྲང་ཧེའི་ནང་ནད་པ་གྲངས་ ༢༥༠༠༠ ནས་ ༢༧༠༠༠ ལྷག་ཙམ་ཐོན་བཞིན་ཡོད་པས་གྲངས་ཚད་དེ་ནི་ཆུང་ཆུང་ཞིག་གཏན་ནས་མིན། ད་ཆ་མི་འབོར་ས་ཡ་ཉི་ཤུ་ལྷག་ཙམ་ཡོད་པའི་ཧྲང་ཧའེ་གྲོང་ཁྱེར་དེ་ཕྱོགས་ཡོངས་ནས་སྒོ་རྒྱབ་ཡོད་པ་དང་། དུས་ཚོད་ངེས་ཅན་ཞིག་འདས་ཟིན་ཀྱང་ནད་པའི་གྲངས་ཚད་ད་དུང་ཉིན་རེ་བཞིན་མང་དུ་འགྲོ་བ་ལས་ཉུང་དུ་འགྲོ་གི་མེད་སྟབས་མི་དམངས་ཀྱི་འཚོ་བ་དང་།དཔལ་འབྱོར་སོགས་ཕྱོགས་གང་ཅིའི་ཐད་ལ་དཀའ་ངལ་འཕྲད་བཞིན་ཡོད། ཡིན་ནའང། རྒྱ་ནག་གཞུང་གིས་རྒྱ་ནག་དེ་བཞིན་ཏོག་དབྱིབས་རིམས་ནད་གཅིག་ཀྱང་མེད་པའི་རྒྱལ་ཁབ་ཀྱི་མཚན་སྙན་རྩོད་ཆེད་གྲོང་ཁྱེར་ཧྲིལ་པོ་སྒོ་རྒྱབ་ཡོད་པ་དང་།མི་མང་པོ་ཞིག་གིས་རིམས་ནད་ཀྱི་ངར་ཤུགས་དེ་སྔ་ལས་ཆུང་དུ་སོང་ཡོད་པ་མ་ཟད།འགོག་ཁབ་རྒྱབ་རྗེས་དེ་བས་ཀྱང་ཆུང་དུ་སོང་ཡོད་པས་ཚེ་སྲོག་ལ་དེ་སྔ་ནང་བཞིན་དེ་ཙམ་གྱི་ཉེན་ཁ་མེད་པའི་ངོས་འཛིན་བྱེད་ཀྱི་ཡོད་ཀྱང་། གཞུང་གིས་སོ་སོའི་མཚན་སྙན་རྩོད་ཆེད་གྲོང་ཁྱེར་ཧྲིལ་པོ་སྒོ་རྒྱབ་ཡོད་པ་མ་ཟད།ལོ་ན་ལྔ་དྲུག་ལས་གསོན་མེད་པའི་བྱིས་པར་ནད་འགོས་ཚེ་ཕ་མ་དང་ཁ་བྲལ་བཏང་ནས་གཞུང་གི་གཅིག་གྱུར་བཀོད་སྒྲིག་འོག་འཇོག་དགོས་ཀྱི་ཡོད་པ་དང་།ཕྲུ་གུ་དུ་དེ་ཚོ་གང་དུ་ཡོད་པ་དང་།ཇི་ལྟར་བལྟ་སྐྱོང་བྱེད་ཀྱི་ཡོད་པ་སོགས་ཕ་མ་གཏན་ནས་ཤེས་ཀྱི་མེད་ལ།ཏོག་དབྱིབས་རིམས་ནད་མ་ཡིན་པའི་ནད་པ་སྨན་ཁང་བསྟེན་གཏུགས་བྱེད་སྐབས་ཐོག་མར་ཏོག་ནད་མེད་པའི་ཡིག་ཆ་བསྟེན་དགོས་ཀྱི་ཡོད་པ་དང་།ཡིག་ཆ་མེད་ཚེ་སྨན་ཁང་དུ་གོམས་པ་གང་ཡང་སྤོ་ཆོག་གི་མེད་སྟབས་ནད་པ་ཁ་ཤས་སྨན་ཁང་གི་སྒོ་འགྲམ་དུ་ཚེ་སྲོག་ཤོར་བའི་གནས་ཚུལ་ཐོན་ཡོད།གནས་སྟངས་འདི་དག་གིས་རྐྱེན་པས་དེང་སྐབས་མི་མང་གིས་སྲིད་གཞུང་ལ་འཁོན་འཛིན་གྱི་རྣམ་འགྱུར་ཧ་ཅང་ཛ་དྲག་ཆགས་ཡོད། གནད་དོན་གཞན་ཞིག་ནི་མཐུན་ཕྱོགས་རྒྱལ་ཁབ་ར་ཤེ་ཡས་ཡུག་རིན་ལ་བཙན་འཛུལ་དམག་འཁྲུག་བསླངས་པ་དེ་རེད།ར་ཤེ་ཡས་ཐོག་མར་དུས་ཚོད་འཐུང་ཤོས་ཀྱི་ནང་ཡུག་རིང་དབང་དུ་བསྡུ་རྒྱུའི་འཆར་འགོད་ཡོངས་སུ་ཕམ་ཉེས་ཤོར་ཞིང་།ད་ཆ་ཟླ་ངོ་གཉིས་ལ་ཉེ་བ་སོང་ཟིན་ཀྱང་ཡུག་རིན་དབང་དུ་བསྡུ་རྒྱུའི་ཕུ་ཀྲིན་གྱི་རྨིས་ལམ་དེ་རྨིས་ལམ་རང་དུ་ལྷག་ཡོད་སྟབས། ཐེ་ཝན་དབང་དུ་བསྡུ་རྒྱུའི་ཞི་ཅིང་ཕིང་གི་རྨིས་ལམ་དེ་ཡང་རྨིས་ལམ་རང་དུ་ལྷག་རྒྱུ་ཡིན་པ་གསལ་པོ་ཆགས་ཡོད། གལ་ཏེ་ཐེ་ཝན་དབང་དུ་བསྡུ་རྒྱུའི་ཞི་ཅིང་ཕིང་གི་རྨིས་ལམ་དེ་ལེགས་གྲུབ་བྱུང་ཚེ་འདི་ལོའི་ལོ་མཇུག་ཏུ་སྐོང་འཚོགས་བྱ་རྒྱུའི་དམར་ཤོག་ཚོགས་པའི་རྒྱལ་ཡོངས་ཚོགས་ཆེན་ཉི་ཤུའི་ཐོག་ཞི་ཅིང་ཕིང་གིས་མུ་མཐུད་ནས་དབང་ཆ་བཟུང་རྒྱུའི་མཐུན་རྐྱེན་ཆེན་པོ་ཞིག་ཆགས་རྒྱུ་ཡིན་པ་གསལ་པོ་རེད།ཡིན་ནའང།ཕུ་ཀྲིན་ཕུ་ཤོར་བའི་དོན་དངོས་ལས་ཞི་ཅིང་ཕིང་ལ་བསླབ་བྱ་ནན་པོ་ཞིག་རག་ཡོད་པ་དེ་ནི་ཐེ་ཝན་དབང་དུ་བསྡུ་རྒྱུ་དེ་ལས་སླ་པོ་དང་སྟབས་བདེ་པོ་མིན་པ་གསལ་པོ་ཆགས་ཡོད་ལ།དེ་ཙམ་མ་ཟད་ཐེ་ཝན་ལ་ཡུག་རིན་དང་མི་འདྲ་བར་ཨ་རིས་སྲུང་སྐྱོབ་བྱ་རྒྱུའི་གྲོས་མཐུན་བཞག་ཡོད་པ་དེ་རེད།དེ་དང་ཆབས་ཅིག་ཡུག་རིན་དེ་ར་ཤེ་དང་བསྡུར་ནས་སྟོབས་ཤུགས་ཆུང་ཆུང་ཞིག་ཡིན་ཀྱང་།ཡུག་རིང་གི་སྙིང་སྟོབས་ཆེན་པོས་གདོང་ལེན་བྱས་པའི་རྒྱལ་ཁ་ལས་ཐེ་ཝན་ལ་དེ་བས་ཀྱང་གདེང་ཚོད་དང་བློ་ཁོག་གསར་པ་ཞིག་སྐྱེ་རུ་བཅུག་ཡོད་པ་དང་།དེའི་ཁྲོད་ནས་རྒྱ་ནག་གི་བཙན་འཛུལ་ལ་གདོང་ལེན་བྱེད་པའི་ཐབས་ལམ་གསར་པ་དང་བསམ་བློ་གསར་པ་མང་པོ་ཞིག་ཀྱང་རག་ཡོད།དེ་དང་ཆབས་ཅིག་ཉིན་འགའ་ཤས་ཀྱི་ནང་ཞི་ཅིང་ཕིང་དང་སྲིད་བློན་ལི་ཁཱ་ཆང་གཉིས་ཀྱི་ཉིན་རེའི་ལས་རིམ་དང་།མངའ་སྡེ་ཁག་གི་ནང་བལྟ་སྐོར་དུ་འགྲོ་སྐབས་ཕྱོགས་སོ་སོས་བཤད་པའི་སྐད་ཆ་དང་།སྐད་ཆའི་ནང་དོན། གཞུང་འབྲེལ་གསར་འགྱུར་རྒྱུད་ལམ་ཁག་གི་ནང་འགོད་སྤེལ་བྱེད་སྟངས་སོགས་ཕྱོགས་མང་པོའི་ཐད་ནས་ད་ལྟའི་རྒྱ་ནག་གི་ཆབ་སྲིད་ཀྱི་གནས་བབ་ལ་འཛིན་པའི་འགལ་ཟླའི་རང་བཞིན་ཤུགས་ཆེན་ཡོད་པ་གསལ་པོ་མཐོང་ཐུབ་ཀྱི་ཡོད།
