རྒྱ་ནག་གཞུང་གིས་རྒྱ་ནག་དེ་རྒྱ་ནད་ཀྱི་འཆིང་ཐག་འོག་ནས་བཅིངས་གྲོལ་གཏོང་རྒྱུ་ཡིན་པའི་འུད་སྒྲོག་བྱེད་ཀྱི་ཡོད་ཀྱང་། ཉེ་ལམ་ཟླ་བ་གསུམ་པ་ནས་བཟུང་རྒྱ་ནག་གི་གྲོང་ཁྱེར་མི་འབོར་ཆེ་ཤོས་ཧྲང་ཧའེ་དེ་སླར་ཡང་རྒྱ་ནད་ཀྱིས་བཙན་འཛུལ་བྱས་ཏེ་གྲོང་ཁྱེར་ཧྲིལ་པོ་སྒོ་བརྒྱབ་ནས་བསྡད་དགོས་བྱུང་ཡོད་ཅིང་། ད་བར་ཟླ་བ་གཅིག་ལ་ཉེ་བ་འདས་ཟིན།རྒྱ་ནག་གཞུང་གིས་རྒྱ་ནག་དེ་རིམས་ནད་ལས་རྣམ་པར་རྒྱལ་བའི་རྒྱལ་ཁབ་གཅིག་ཡིན་པའི་མཚན་སྙན་ཐོབ་པའི་ཆེད་དུ་འཛམ་གླིང་ཐོག་རྒྱལ་ཁབ་སུས་ཀྱང་བྱེད་མྱོད་མེད་པའི་ཆེས་དམ་དྲག་ཅན་གྱི་བཀག་བསྡོམས་ཤིག་བྱས་ཏེ་མི་མང་གི་ཚེ་སྲོག་དང་བདེ་འཇགས་ཀྱི་ཐད་ཏོག་དབྱིབས་རིམས་ནད་ལས་ལྷག་པའི་དཀའ་ངལ་བཟོ་བཞིན་ཡོད་།
དེ་ཡང་ཨུ་རུ་སུས་ཡུག་རིམ་ནང་བཙན་འཛུལ་དམག་འཁྲུག་རྒྱག་འགོ་ཚུགས་རྗེས་ཡུལ་དེའི་རྒྱལ་ས་ཀིབ་ནང་ཡོད་པའི་རྒྱ་མི་ཞིག་གིས་རང་ཉིད་ལ་བྱུང་བའི་དངོས་བྱུང་གནས་ཚུལ་ཟིན་ཐོར་བཀོད་པའི་ནང། ཡུག་རིན་དམག་འཁྲུག་འགོ་ཚུགས་རྗེས་ཡུལ་དེའི་རྒྱལ་ས་ཀིབ་དེ་བཞིན་བཙན་འཛུལ་དམག་འཁྲུག་གི་གོད་ཆགས་འོག་གནས་ཡོད་སྟབས། གྲོང་མི་རྣམས་ཀྱང་བདེ་འཇགས་ཀྱི་ཆེད་དུ་ཡིབ་སྡོད་བྱེད་དགོས་ཀྱི་ཡོད་ཀྱང་། ཉིན་ལྟར་ཚག་ཤ་དང་ཚལ་རིག་འདྲ་མིན་ལ་ལོངས་སུ་སྤྱོད་རྒྱུ་བྱུང་ཡོད། དེ་ལྟར་ཉིན་ཤས་སོང་རྗེས་ ཁོ་པ་ཡུག་རིན་གྱི་རྒྱལ་ས་ཀིབ་ནས་རོ་མ་ཎི་ཡའི་རྒྱལ་ཁབ་ནང་བྲོས་བྱོལ་དུ་སོང་ཡོད། རོ་མ་ཎི་ཡའི་གཞུང་ནས་ཡུག་རིན་གྱི་སྐྱབས་བཅོལ་བ་ཚོར་མ་ཁྱབ་པ་མེད་པའི་སེམས་འཁུར་དང་བལྟ་རྟོགས་བྱེད་བཞིན་ཡོད་པ་ལྟར། ཧྲང་ཧའེ་ནས་ཡིན་པའི་རྒྱ་མི་དེར་ཡང་དེ་དང་གཅིག་མཚུགས་ཀྱི་བལྟ་རྟོགས་བྱས་ཡོད་པ་མ་ཟད། ད་དུང་ཁོ་པ་རྒྱ་མི་ཡིན་པའི་ཆ་ནས་ཆེད་དུ་རྒྱ་ནག་གི་ཁ་ལག་སྤྲོད་བཞིན་ཡོད་སྐོར་འགྲེལ་བརྗོད་ཡོད།
ཉིན་ཤས་རྗེས་ཁོ་པ་གནམ་གྲུར་བསྡད་ནས་རྒྱ་ནག་གི་གྲོང་ཁྱེར་ཏཱ་ལན་དུ་འབྱོར་བ་དང་། ཕྱི་རྒྱལ་ནས་སླེབས་པའི་མི་ཚང་མ་མགྲོན་ཁང་ནང་ཉིན་བཅུ་བཞི་ཟུར་བཀག་བྱེད་ཀྱི་ཡོད་སྟབས། ཁོ་པ་ཡང་དེ་གར་ཉིན་བཅུ་བཞི་ཟུར་བཀག་བྱས། བསམ་ཡུལ་ལས་འདས་པ་ཞིག་ལ་མགྲོན་ཁང་དུ་ཉིན་བཅུ་བཞི་ཟུར་བཀག་བྱེད་རིང་སྔ་དགོང་ཉིན་གསུམ་གྱི་ཁ་ལག་ཚང་མ་ཐུག་པ་ཆུ་ལ་སྦང་པ་གཅིག་པུ་བཏུང་ནས་སྡོད་དགོས་བྱུང་ཡོད། ཟུར་བཀག་གྲོལ་རྗེས་ཧྲང་ཧའེ་རུ་རང་ཁྱིམ་དུ་སླེབས་ནས་ལྷོད་ལྷོད་བྱས་ནས་བསྡད་ཆོག་བསམ་ཀྱང་། རང་ཁྱིམ་དུ་དངོས་སུ་སླེབས་སྐབས་ཕྱི་ལ་ཉོ་ཆ་རྒྱག་པར་འགྲོ་མི་ཆོག་པ་དང་། སྲིད་གཞུང་ནས་བལྟ་རྟོགས་བྱེད་མཁན་སོགས་ཅི་ཡང་མེད་སྟབས་ད་ཆ་ཁོ་པ་རང་ཁྱིམ་དུ་ལྟོག་སྐོམ་བརྒྱབ་ནས་བསྡད་ཡོད་ཅེས་བྱས་ཡོད། ཁོ་པ་དམག་འཁྲུག་གོད་ཆགས་འོག་གི་ཡུག་རིན་ནང་ཤ་དང་ཚལ་རིག་ལ་སོངས་སུ་སྤྱོད་རྒྱུད་ཡོད་པ་དང་། རོ་མ་ཎི་ཡར་སྐྱབས་བཅོལ་དུ་སྡོད་རིང་རིན་མེད་ཁ་ལག་ལ་ལོངས་སུ་སྤྱོད་རྒྱུ་བྱུང་ཡོད་ཀྱང་། རྒྱ་ནག་དུ་མགྲོན་ཁང་ནང་ཉིན་ལྟར་སྐམ་ཐུག་ཆུ་ལ་སྦང་ནས་འཐུང་དགོས་བྱུང་བ་དང་། དེ་རྗེས་རང་ཁྱིམ་ལ་དངོས་སུ་སླེབས་རྗེས་ཟ་རྒྱུ་མེད་པར་གྲོད་པ་སྟོང་པར་བསྡད་ཡོད་ཅེས་འགྲེལ་བརྗོད་བྱས་ཡོད།
རྒྱལ་ཁོངས་ཁེ་ན་ཀྲ་ནས་ཡིན་པའི་རྒྱ་མི་ཞིག་ཉེ་ལམ་ཧྲང་ཧའེ་རུ་བསྐྱོད་པའི་ལམ་བར་གྱི་དཀའ་སྡུག་རྣམས་ཟིན་ཐོར་བཀོད་པའི་ནང། ཧྲང་ཧེའི་ནང་ཏོག་དབྱིབས་རིམས་ནད་ཀྱིས་རྐྱེན་པས་རིམ་བཞིན་ཁྱིམ་སྡོད་བཀའ་རྒྱ་བསྡམས་བཞིན་ཡོད་སྟབས། ཁེ་ན་ཀྲ་ནས་ཡོང་བའི་རྒྱ་མི་དེས་སྔོན་ཚུད་ནས་གནམ་གྲུའི་འཛིན་སྦྱང་ཉོས་ཏེ་ཁེ་ན་ཀྲར་ཕྱིར་ལོག་བྱ་རྒྱུའི་གྲ་བསྒྲིགས་བྱས། གནམ་གྲུ་ཟླ་ ༤ ཚེས་༩ ཉིན་འཕུར་ཡས་ཡིན་ཡང་ཁོ་པས་བརྟན་ཆའི་ཆེད་ཉིན་གཅིག་གི་སྔོན་ཚུད་ནས་གནམ་ཐང་དུ་བསྐྱོད་སྐབས། བསམ་ཡུལ་ལས་འདས་པ་ཞིག་ལ་ཚེས་བརྒྱད་ཉིན་ནས་བཟུང་ཧྲང་ཧའེ་ནས་ཁེ་ན་ཀྲར་འཕུར་མཁན་གྱི་གནམ་གྲུ་བཀག་བསྡོམས་བྱས་སྟབས། ཁེ་ན་ཀྲར་འགྲོ་རྒྱུ་དེ་སྟོང་ཟད་དུ་སོང་ཡོད། དེང་སྐབས་ཧྲང་ཧའེི་གྲོང་ཁྱེར་ནང་ཕྱི་རྒྱལ་ནས་ཕར་འགྲོ་ཚུར་འོང་བྱེད་མཁན་གྱི་འགྲུལ་པ་ཡིན་ཚེ་རང་ཉིད་གནས་ཡུལ་གྱི་ས་གནས་ནས་ཕྱི་རྒྱལ་དུ་འགྲོ་སྐབས་ཚུར་ཕྱིར་ལོག་བྱ་རྒྱུ་མིན་ཞེས་ཡིག་ཆའི་ཐོག་ས་ཡིག་རྒྱག་དགོས་ཀྱི་ཡོད་སྟབས།འགྲུལ་པ་མང་པོ་ཞིག་རང་ཉིད་སྡོད་སའི་མགྲོན་ཁང་ནས་ཐོན་ཟིན་པ་དང་། གནམ་ཐང་ནས་གནམ་གྲུ་བཀག་བསྡོམས་བྱས་པའི་རྐྱེན་གྱིས་འགྲོ་ས་སྡོད་ས་མེད་པར་ལུས་ཀྱི་ཡོད། རྒྱལ་ཁོངས་ཁེ་ན་ཀྲ་ནས་ཡིན་པའི་རྒྱ་མི་དེ་ཡང་མགྲོན་ཁང་ནས་ཐོན་སྐབས་ཡིག་ཆའི་ཐོག་ཕྱིར་ལོག་བྱ་རྒྱུ་མིན་པའི་ས་ཡིག་བཀོད་ཟིན་པ་དང་། ཁོ་པ་འགྲོ་སའི་གནམ་གྲུ་བཀག་བསྡོམས་བྱས་པ་བཅས་ཀྱིས་ད་ཆ་ཁོ་པ་འགྲོ་ས་སྡོད་ས་མེད་པར་ལུས་ཡོད། ཧྲང་ཧའེ་གནམ་ཐང་དུ་དེ་ལྟ་བུའི་དཀའ་ངལ་འཕྲད་པའི་འགྲུལ་པས་ཁེངས་ཡོད་ཅིང་། འགྲུལ་པ་འགའ་ཤས་ནི་བདུན་ཕྲག་གཅིག་ལྷག་ཙམ་གནམ་ཐང་དུ་ལུས་ཡོད་ཀྱང་ད་དུང་གནམ་གྲུའི་འཛིན་སྦྱང་མ་རག་པར་ལུས་ཡོད། གནས་སྟངས་དེ་འདྲའི་འོག་འགྲུལ་པ་ཚང་མས་ཧྲང་ཧའེ་ནས་ཕྱི་རྒྱལ་དུ་འགྲོ་མཁན་ཞིག་ཡིན་ཕྱིན་རྒྱལ་ཁབ་སུ་ཡིན་མི་བལྟ་བར་འཛིན་སྦྱང་རག་ཐབ་བྱེད་ཀྱི་ཡོད།རྒྱ་ནག་མ་ཡིན་པའི་རྒྱལ་ཁབ་གང་རུང་ཞིག་ལ་སླེབས་ན་དེ་ནས་གཡས་བསྐོར་གཡོན་སྐོར་བྱས་ཏེ་སོ་སོའི་རྒྱལ་ནང་དུ་ལོག་ཆོག་གི་ཡོད། དཀའ་ངལ་གཞན་ཞིག་ནི་གནམ་ཐང་དུ་ཁ་ལག་ལག་དང་ཟས་རིགས་སོགས་ཧ་ལམ་ཉོ་ས་མེད་སྟབས་མི་མང་པོའི་བསམ་པར་གནས་དེ་ནི་ཧ་ལམ་དམག་འཁྲུག་གི་ཆོད་ཆགས་ཆེན་པོ་ཞིག་གི་འོག་ཚུད་པ་ལྟ་བུའི་སྣང་བ་ཡོང་གི་འདུག་ཅེས་འགྲེལ་བརྗོད་བྱས་ཡོད།
ཡང་ཧོང་ཀོང་ནས་ཡིན་པའི་རྒྱ་མི་ཞིག་ཟླ་བ་གསུམ་པའི་ཟླ་མཇུག་ཏུ་ཧྲང་ཧའེ་རུ་བསྐྱོད་ཡོད། ཧྲང་ཧའེ་རུ་མགྲོན་ཁང་ནང་སྡོད་རིང་ཉིན་བཅུ་བཞི་ཟུར་བཀག་བྱས་ནས་བསྡད་དགོས་ཀྱི་ཡོད་པ་དང་། དེའི་རིང་མགྲོན་ཁང་གི་ཁ་ལག་སྐྱོ་པོ་ཡིན་སྟབས་སྔ་དགོང་ཉིན་གསུམ་གྱི་ལྟོ་དུས་ཚང་མས་གྲོད་པ་གཏན་ནས་རྒྱག་གི་མེད་པར་བརྟེན། ཉེ་འཁོར་གྱི་ཟ་ཁང་སོགས་ནས་ཁ་ལག་འཕར་མ་མངགས་དགོས་ཀྱི་ཡོད།དེ་ལྟར་ཉིན་མ་རིམ་སོང་གིས་ཧྲང་ཧའེ་ནང་ནད་ཡམས་ཁྱབ་གདལ་ཇེ་སྡུག་ཏུ་སོང་ནས་འགྲོ་བསྐྱོད་བཀག་བསྡོམས་བྱས་སྟབས།མགྲོན་ཁང་དང་དེའི་ཉེ་འཁོར་གྱི་ཟ་ཁང་སོགས་ནས་ཁ་ལག་མངགས་ཉོ་བྱ་རྒྱུ་དེ་ཡང་མེད་པ་ཆགས་སྟབས།མཐར་མགྲོན་ཁང་གི་འགྲམ་དེར་མོག་མོག་བཟོ་མཁན་ཞིག་ཡོད་ཅིང་། ཁོ་པར་རིན་གོང་མཐོ་པོ་ཚེ་ཁོ་པས་སྔ་དྲོ་ཆུ་ཆོད་བཞི་པ་ཙམ་ནས་ལྐོག་ལྐོག་སུད་སུད་ཀྱིས་མགྲོན་ཁང་ནང་མོག་མགོ་སྐྱེལ་བར་ཡོང་གི་ཡོད། དེ་ལྟར་ཉིན་གཅིག་གི་ལྟོ་དུས་གསུམ་པོ་ཚང་མ་མོག་མོག་དེ་ལས་གཞན་ཅི་ཡང་མེད།དེ་ལྟར་ཉིན་མ་འཁྱོལ་ཐབས་བྱས་པ་དང་མཐར་ཟུར་བཀག་གི་དུས་ཚོད་ཀྱང་རྫོགས་གྲབས་ཡོད་སྟབས། ཧྲང་ཧའེ་དུ་སྡོད་རྒྱུ་ཧ་ཅང་ཁག་པོ་ཆགས་རྒྱུ་རེད་བསམ་དེ་ཐོག་མའི་འཆར་གཞི་བསྒྱུར་ནས་ཧོང་ཀོང་དུ་ ཕྱིར་ལོག་བྱ་རྒྱུའི་ཐག་གཅོད་བྱས།མགྲོན་ཁང་ནས་ཧྲང་ཧའེ་གནམ་ཐང་བར་འགྲོ་བསྐྱོད་བྱེད་མཁན་གྱི་རླང་འཁོར་ལྟ་ཅི།གཞུང་ལམ་ཐོག་ཕར་འགྲོ་ཚུར་འོང་བྱེད་མཁན་གྱི་རླང་འཁོར་ཀྱང་གཅིག་ཀྱང་མཐོང་རྒྱུ་མེད་ལ།མགྲོན་ཁང་ནང་དུའང་མུ་མཐུད་ནས་ཞག་སྡོད་ཆོག་གི་མེད་ཅིང།ཁྲོམ་ནས་ཁ་ལག་ཀྱང་ཉོ་རྒྱུ་མེད་སྟབས།ཁོ་པའི་བསམ་པར་ད་ཆ་རང་ཉིད་ཆགས་རྟེན་གཞི་རྟེན་མེད་པའི་སྤྲང་པོ་སྤྲང་རྐྱང་ཆགས་འདུག་བསམ་པའི་བསམ་བློ་འཁོར་བྱུང་ཞེས་བརྗོད་ཡོད། མཐར་ཁོ་པས་གནམ་ཐང་བར་དུ་གོམས་པ་བརྒྱབ་འགྲོ་རྒྱུའི་བློ་ཐག་བཅད། ཁོ་པ་སྡོད་སའི་མགྲོན་ཁང་ནས་ཧྲང་ཧའེ་གནམ་ཐང་བར་གོམས་པ་རྒྱབ་ནས་ཕྱིན་ན་ཚོུད་དགུ་ཡི་འགྲུལ་བཞུད་བྱེད་དགོས་ཀྱི་ཡོད་ཅིང། སྐབས་རེ་གཞུང་ལམ་ནས་མ་ཕྱིན་པར་ལམ་ཆུང་དང་གྲོང་གསེབ་་བརྒྱུད་ནས་འགྲོ་སྐབས་གྲོང་གསེབ་གང་སར་ཕྱི་མིག་འགྲོ་བསྐྱོད་མི་ཆོག་པའི་ཆེད་གང་སར་ལྕགས་དྲ་བཏང་ནས་བཞག་ཡོད་སྟབས། གྲོང་གསེབ་ཚོར་སྐབས་རེ་ཞུ་བ་འཐེན་པ་དང་།སྐབས་རེ་དངུལ་སྤྲད་ནས་ཐར་ཐབས་བྱེད་པ།མི་མེད་པའི་ས་ཆར་སླེབས་སྐབས་ལྕགས་དྲའི་གསེང་ལ་འཛུལ་ནས་ཐར་ཐབས་བྱེད་པ།དེ་ལྟར་བྱས་ཏེ་མཐར་ལག་པ་དང་ངོ་གདོང་སོགས་ལ་རྨ་ཡང་མང་པོ་བཟོས་ལུགས་འགྲེལ་བརྗོད་བྱས་ཡོད།
དེ་བཞིན་དུ་གྲོང་ཁྱེར་དེའི་ས་ཁུལ་སོ་སོའི་མི་མང་གིས་ས་གནས་ཀྱི་འབྲེལ་ཡོད་འགོ་ཁྲིད་ཚོར་རང་ཉིད་ཀྱི་དཀའ་ངལ་དང་བདེ་སྡུག་གོང་ཞུ་བྱས་ཀྱང་ཐག་གཅོད་བྱེད་མཁན་གཅིག་ཀྱང་མེད། ས་ཁུལ་གྱི་འགོ་ཁྲིད་ཚོས་དེ་ལས་མང་བའི་དཀའ་ངལ་དང་སྡུག་ངལ་མང་པོ་ཞིག་དྲངས་ནས་ཁོ་ཚོའི་སྒང་ལ་ཡོད་པའི་རིམ་པ་གོང་མའི་འགོ་ཁྲིད་ཚོར་བདེ་སྡུག་ཇི་ཙམ་ཞུས་ཀྱང་ཐག་གཅོད་བྱེད་མཁན་དང་ལམ་སྟོན་བྱེད་མཁན་གཅིག་ཀྱང་མེེད་པ་མ་ཟད།ཐ་ན་ཁོ་ཚོའི་ཁ་པར་ཡང་ལེན་གྱི་མི་འདུག་ཅེས་སྡུག་སྐད་ཤོར་ཡོད། དེ་སྔ་རྒྱ་མི་ཞིག་དང་ཨ་རི་བ་ཞིག་ཕན་ཚུན་གཏམ་གླེང་བྱེད་སྐབས།རྒྱ་མི་དེས་ཨ་རི་བ་དེ་ལ་ཁྱེད་ཚོ་དངོས་གནས་གྱོང་པོ་འདུག ཏོག་དབྱིབས་རིམས་ནད་ལ་ཞེད་སྣང་ཁྱོན་བྱེད་ཀྱི་མི་འདུག་ཅེས་བརྗོད་པར།ཨ་རི་བ་དེས་རྒྱ་མི་དེར་ང་ཚོ་ལས་ཁྱེད་ཚོ་གྱོང་བ་འདུག ཁྱེད་ཚོས་ཏོག་དབྱིབས་རིམས་ནད་མ་གཏོགས་ན་ཚ་གཞན་དག་ལ་ ཞེད་སྣང་གཏན་ནས་མི་འདུག་ཅེས་གོ་རྒྱུ་ཡོད་པའི་ལན་འདེབས་བྱས་ཡོད། དེང་སྐབས་ཧྲང་ཧའེ་ནང་ཏོག་དབྱིབས་རིམས་ནད་མེད་པའི་དཔང་ཡིག་མེད་ཚེ་། སྦྲུ་མ་མངལ་ཤོར་གྱི་ཡོད་ནའང་ཤོར་དུ་འཇུག་རྐྱང་རེད་ལ།ནད་པ་དབུགས་ཆད་ཀྱི་ཡོད་ནའང་ཆད་དུ་འཇུག་གི་ཡོད།
རྒྱ་ནག་གི་སྲིད་དོན་དབྱེ་ཞིབ་པ་འགའ་ཤས་ཀྱིས་བརྗོད་ན་། གནས་ཚུལ་འདི་དག་ནི་རྒྱ་ནག་དམར་ཤོག་ཚོགས་པའི་ནང་ཁུལ་འཐབ་རྩོད་ཀྱི་མཚོན་རྟགས་གཅིག་ཡིན་པའི་འགྲེལ་བརྗོད་བྱེད་ཀྱི་ཡོད། དེ་ཡང་འདས་པའི་མི་ལོ་བཅུ་ལ་ཉེ་བའི་རིང་ཞི་ཅིང་ཕིང་ལ་ཁ་གཏད་ཧ་ཅང་ཤུགས་ཆེན་པོ་ཞིག་ཆགས་ཡོད་པ་དང་། གལ་ཏེ་ཧྲང་ཧའེ་གྲོང་ཁྱེར་ནང་རིམས་ནད་ལ་གདོང་ལེན་བྱེད་པའི་ལས་དོན་ཡག་པོ་མ་བྱུང་བར་མི་དམངས་ཀྱི་སེམས་ཁམས་ལ་དོག་ཕོག་བྱུང་ཚེ་། དེའི་མཐའ་མའི་འགན་འཁྲི་དེ་ཞི་ཅིང་ཕིང་གིས་འཁུར་དགོས་པ་དང་། དེ་ལ་བརྟེན་ནས་ཞི་ཅིང་ཕིང་གིས་མུ་མཐུད་ནས་སྲིད་དབང་བཟུང་བའི་འཆར་གཞི་དེ་ཕམ་ཉེས་འགྲོ་བའི་ཉེན་ཁ་ཡོད། དེའི་རྐྱེན་གྱིས་ཞི་ཅིང་ཕིང་དང་དགྲ་ཟླ་དགྲ་ཤེད་ཡིན་པའི་འགོ་ཁྲིད་ཚོས་དམིགས་ཡུལ་ཡོད་པ་དང་འཆར་གཞི་ཡོད་པའི་སྒོ་ནས་ཆབ་སྲིད་ཀྱི་ཟློོས་གར་འཁྲབ་བཞིན་པ་རེད་ཅེས་བརྗོད་ཀྱི་ཡོད།
